រាជធានីភ្នំពេញ ៖ ជនជាតិវៀតណាមចំនួន១៨នាក់(ស្ដ្រី៧នាក់) ត្រូវបានកម្លាំងនគរបាលនៃអគ្គនាយកដ្ឋានអន្តោប្រវេសន៍ក្រសួង មហាផ្ទៃ ធ្វើការបណ្តេញចេញតាមច្រកទ្វារអន្តរជាតិក្អមសំណ ក្រោយពីបានរកឃើញកំពុងស្នាក់នៅ និងបំពេញការងារដោយខុស ច្បាប់នៅក្នុងរាជធានីភ្នំពេញ និងខេត្តសៀមរាប ។
ការបណ្តេញចេញនេះ បានធ្វើឡើងកាលពីព្រឹកថ្ងៃទី ២៥ តុលា នៅអគ្គ នាយក ដ្ឋានអន្តោប្រវេសន៍ ដែលមានទីតាំងនៅខាងមុខអាកាសយានដ្ឋានអន្តរជាតិភ្នំពេញ ដោយមានការចូលរួមពីលោកឧត្តមសេនីយ៍ត្រី ផេង វណ្ណា អនុប្រធាននាយកដ្ឋានសុើបអង្កេតនិងអនុវត្តនីតិវិធី ។
លោកឧត្តមសេនីយ៍ត្រី ផេង វណ្ណា មានប្រសាសន៍ថា យោងតាមការណែនាំរបស់លោកនាយឧត្តមសេនីយ៍ សុខ ផល អគ្គនាយកនៃអគ្គនាយកដ្ឋានអន្តោប្រវេសន៍ ធ្វើយ៉ាងណាពង្រឹងច្បាប់អន្តោប្រវេសន៍ឱ្យមានប្រសិទ្ធភាពនោះ កម្លាំងនគរបាលនៃនាយកដ្ឋានស៊ើបអង្កេតនិងអនុវត្តនីតិវិធី បានប្រតិបត្តិយ៉ាងយកចិត្តទុកដាក់ ដោយចុះធ្វើការត្រួតពិនិត្យកន្លែងស្នាក់នៅ និងទីតាំងធ្វើការងាររបស់ជនបរទេសជាច្រើនកន្លែងនៅតាមបណ្តាខេត្ត និងរាជធានីភ្នំពេញ ។
លោកឧត្តមសេនីយ៍ត្រី បានបន្តទៀតថា ជាក់ស្តែងក្នុងថ្ងៃនេះដែរ បានធ្វើការបណ្តេញចេញនូវជនអន្តោប្រវេសន៍ជាជនជាតិវៀត ណាម ប្រុស-ស្រីចំនួន១៨នាក់(ស្ដ្រី៧នាក់) ទៅតាមច្រកទ្វារអន្តរជាតិក្អមសំណ ។ ក្រុមជនជាតិវៀតណាម ដែលត្រូវបណ្តេញ ចេញ ទាំង១៨នាក់នេះ គឺធ្វើឡើងក្រោយពីរកឃើញកំពុងស្នាក់នៅ និងបំពេញការងារដោយខុសច្បាប់នៅក្នុងខេត្តសៀមរាប និងរាជធានីភ្នំពេញ ។ពួកគេទាំងនេះបានលួចចូលមកស្នាក់នៅ និងបំពេញការងារនៅក្នុងប្រទេសកម្ពុជាយើង តាមច្រករបៀងមួយចំនួនដែលមានព្រំប្រទល់ជាប់នឹងប្រទេសរបស់យើង ។
លោកឧត្តមសេនីយ៍ត្រី ផេង វណ្ណា បានធ្វើការផ្តាំផ្ញើថា ការឃាត់ខ្លួននិងការបណ្តេញចេញជនបរទេសនេះ មិនមែនធ្វើឡើងតែលើជនជាតិវៀតណាមឡើយ គឺធ្វើឡើងគ្រប់ជនជាតិទាំងអស់ដែលចូលមកស្នាក់នៅ និងបំពេញការងារដោយខុសច្បាប់នៅក្នុងប្រទេសកម្ពុជា ។ ប្រសិនបើបងប្អូនណាមានបំណងចង់ចូលមកស្នាក់នៅ និងបំពេញការងារនៅក្នុងប្រទេសកម្ពុជានោះ គឺបងប្អូនត្រូវតែបំពេញលិខិតស្នាមឱ្យបានត្រឹមត្រូវ និងស្របទៅតាមច្បាប់ទើបបាន ៕
ចែករំលែកព័តមាននេះ