រាជធានីភ្នំពេញ ៖ ក្រោមការប្រកាសរបស់លោកនាង ស៊ីវត្ថា អ្នករៀបចំការប្រដាល់ប្រចាំស្ថានីយទូរទស្សន៍បាយ័នបានឱ្យដឹងថា កីឡាករកម្ពុជា៤រូបរួមមានឡៅ ស៊ីណាត ម៉ឺន សុភា ឡុង សុវណ្ណឌឿន និងវង្ស ណយ ដែលទើបលាចាកសិក្ខាបទ បានជាប់កុងត្រាមិនអាចឡើងប្រកួតនៅសង្វៀនទូរទស្សន៍ណាមួយទេ រហូតគម្រប់១២សប្ដាហ៍ ចាប់ពីពាក់កណ្ដាលខែក្រោយ ។ នោះគឺដោយសារកីឡាករល្បីឈ្មោះទាំង៤រូបត្រូវជាប់ឈ្មោះប្រកួតដណ្ដើមជើងឯកគូប៊ូតាវគ្គ៤ ។
លោកនាង ស៊ីវត្ថា ថ្លែងថា ចាប់ពីពេលនេះតទៅកីឡាករទាំង៤រូបមិនអាចចេញប្រកួតនៅក្នុងព្រឹត្តិការណ៍ប្រដាល់ណាមួយក្រៅពីកម្មវិធី «ជើងឯកប្រដាល់លេខ១គូប៊ូតាវគ្គ៤» នោះទេ ដរាបណាកម្មវិធីមួយនេះមិនទាន់បញ្ចប់។ លោកថ្លែងបញ្ជាក់នៅក្នុងវេទិកាសន្និសីទសារព័ត៌មានកាលពីថ្ងៃទី២៥ តុលា នៅទូរទស្សន៍ BTV បឹងស្នោថា នេះជាការប្រដាល់ទម្ងន់ធ្ងន់ដ៏កម្រដែលប៉ុស្ដិ៍បាយ័នបានសម្រាំងយកកីឡាករជើងខ្លាំង និងល្បីឈ្មោះឲ្យមកល្បងសមត្ថភាពតែម្ដង ដើម្បីរំលេចព្រឹត្តិការណ៍ប្រដាល់ស្វែងរកជើងខ្លាំងក្នុងចំណោមពួកគេ ឲ្យធ្វើជាម្ចាស់ជើងឯកក្រុមហ៊ុនគូប៊ូតាវគ្គ៤ ។ លោកនិយាយថា កីឡាករទាំង៤រូបជាប់កុងត្រាក្រុមហ៊ុនគូប៊ូតាហើយ អញ្ចឹងពួកគាត់អត់អាចទៅប្រកួតនៅកន្លែងណាបានទេ គឺសូម្បីតែមិនទាន់ដល់ថ្ងៃប្រកួតក៏ត្រូវទុកពេលសម្រាប់តែហ្វឹកហាត់ដែរ ។ លោកថា ការប្រកួតនេះចាប់ដំណើរការនៅដើមខែវិច្ឆិកានេះ ប៉ុន្តែដោយសារតែកីឡាករឡៅ ស៊ីណាត មិនទាន់បញ្ចប់ការប្រកួតដណ្ដើមជើងឯកក្រុមហ៊ុនខារ៉ាបាវ និងកីឡាករវង្ស ណយ ទើបតែសឹកពីបួសហើយត្រៀមខ្លួនមិនទាន់ ទើបត្រូវលើកទៅថ្ងៃអាទិត្យទី១៥ វិច្ឆិកា វិញ ចាប់ពីម៉ោង១រសៀលនៅ BTV។ លោកបញ្ជាក់ថា ការប្រកួតនឹងធ្វើរៀងរាល់សប្ដាហ៍មួយគូម្ដង ដោយកីឡាករម្នាក់ត្រូវប្រកួតវិលជុំ៣លើកម្នាក់ ហើយអ្នកមានពិន្ទុខ្ពស់ជាងគេ២រូបត្រូវឡើងទៅប្រកួតយកជើងឯក និងប្រាក់លានតែម្ដង ។ ព្រឹត្តិការណ៍នេះ ជ្រើសយកកីឡាករទាំង៤ដែលសុទ្ធតែល្បីឈ្មោះ និងជាជើងចាស់ក្នុងពិភពប្រដាល់ដើម្បីលើកស្ទួយជីវភាពពួកគេឲ្យទទួលបានប្រាក់ចំណូល ក្នុងពេលដែលមានកីឡាករស្រករក្រោយកាន់តែមានសមត្ថភាពរុញច្រាន ។ អញ្ចឹងហើយទើបលោកបានទាំងអនុញ្ញាតឲ្យឡៅ ស៊ីណាត ដែលជាបេក្ខភាពត្រូវទទួលខ្សែក្រវាត់ជើងឯកក្រុមហ៊ុនខារ៉ាបាវក្នុងពេលដ៏ខ្លី ឲ្យមានលទ្ធភាពបានប្រកួតនៅក្នុងព្រឹត្តិការណ៍នេះដើម្បីឲ្យគេទទួលបានប្រាក់កម្រៃថែមទៀត ។
លោកឆាលឺមឆៃ គីទីប៊ុនតន អគ្គនាយកក្រុមហ៊ុនគូប៊ូតា បានថ្លែងប្រាប់ថា ការប្រកួតនេះ អ្នកដណ្ដើមបានចំណាត់ថ្នាក់លេខ១ទទួលបាន៤ពាន់ដុល្លារ និងលេខ២បាន២ពាន់ដុល្លារ ។ ក្នុងនោះកីឡាករដែលត្រូវប្រកួតក្នុងវគ្គសន្សំពិន្ទុក៏ទទួលបានប្រាក់តម្លៃខ្លួនខ្ពស់ណាស់ដែរ ជាថ្នូរនឹងការចុះកុងត្រាមិនទទួលប្រកួតនៅសង្វៀនប៉ុស្ដិ៍ផ្សេងមុនពេលការប្រកួតបានបញ្ចប់។ លោកថា នេះជាការប្រកួតដែលក្រុមហ៊ុនចាប់អារម្មណ៍ដោយសារតែវត្តមានកីឡាករទាំង៤ គឺសុទ្ធតែជាជើងខ្លាំងមានស្នាដៃ និងកេរ្តិ៍ឈ្មោះនៅលើសង្វៀនប្រដាល់ដូចគ្នា ៕
ចែករំលែកព័តមាននេះ