ខេត្តកណ្តាល ៖ មន្ត្រីកងរាជអាវុធហត្ថម្នាក់បានស្លាប់ភ្លាមៗនៅនឹងកន្លែងដោយសារជិះម៉ូតូទៅបុកជាមួយរថយន្តសាំងយ៉ុងមួយគ្រឿងដែលកំពុងបើកបរក្នុងទិសដៅបញ្ច្រាសគ្នា កាលពីវេលាម៉ោង៤ និង៣០នាទីទៀបភ្លឺ ថ្ងៃទី២៦ តុលា ២០១៥ លើកំណាត់ផ្លូវជាតិលេខ១ត្រង់ចំណុចចន្លោះបង្គោលគីឡូលេខ៤៣-៤៤ ស្ថិតក្នុងភូមិព្រែកត្រែង ឃុំសំរោងធំ ស្រុកកៀនស្វាយ។
ជនរងគ្រោះឈ្មោះវ៉ន ផានិត ភេទប្រុស អាយុ២៥ឆ្នាំ ជាមន្ត្រីកងរាជអាវុធហត្ថខណ្ឌដង្កោ រាជធានីភ្នំពេញ ជិះម៉ូតូម៉ាកវ៉េវអ៊ី ពណ៌ខ្មៅ ពាក់ស្លាកលេខភ្នំពេញ១BN៣៦៣៦ មានស្រុកកំណើតនៅភូមិធ្លក ឃុំក្រោលគោ ស្រុកស្វាយជ្រំ ខេត្តស្វាយរៀង ចំណែករថយន្តម៉ាកសាំងយ៉ុង ពណ៌ស ពាក់ស្លាកលេខភ្នំពេញ២AD៦៦៤៩ ក្រោយកើតហេតុអ្នកបើកបរបានបើកទ្វាររថយន្តរត់គេចខ្លួនបាត់ស្រមោល។
បើតាមប្រភពខ្លះនិយាយថា មុនពេលកើតហេតុគេឃើញជនរងគ្រោះជិះម៉ូតូម្នាក់ឯងក្នុងទិសដៅពីអ្នកលឿងទៅភ្នំពេញ ពេលមកដល់ចំណុចខាងលើបានបើកវ៉ារថយន្តមិនស្គាល់ម៉ាកមួយគ្រឿងបើកស្របទិសគ្នាក៏ជ្រុលចង្កូតទៅបុករថយន្តម៉ាកសាំងយ៉ុងដែលកំពុងបើកបញ្ច្រាសទិសគ្នាចំពីមុខពេញទំហឹងបណ្តាលឱ្យអ្នកបើកម៉ូតូហោះផ្លោងឡើងលើបោកផ្ទប់នឹងកញ្ចក់រថយន្ត ហើយធ្លាក់បោកមកលើថ្នល់ជាតិមួយជាន់ទៀតបណ្តាលឱ្យដាច់ខ្យល់ស្លាប់ភ្លាមៗនៅនឹងកន្លែង។
រីឯម៉ូតូជាប់នៅខាងមុខរថយន្តអូសប្រហែល៥០ម៉ែត្រទើបរថយន្តអស់ល្បឿនទៅមុខលែងរួច៕
ចែករំលែកព័តមាននេះ