រាជធានីភ្នំពេញ ៖ ដោយមើលឃើញសេដ្ឋកិច្ចកម្ពុជាមានការរីកចម្រើនលើគ្រប់វិស័យ ហើយតម្រូវការនៃការប្រើប្រាស់ផលិតផលមានគុណភាព ដែលមានតម្លៃថ្លៃៗនៅកម្ពុជាកំពុងមានពេញនិយមពីពលរដ្ឋកម្ពុជា បានជំរុញឲ្យក្រុមហ៊ុនអីុតាលីប្រមាណ៧០ មកតាំងបង្ហាញផលិតផលរបស់ខ្លួនជាលើកដំបូងនៅមជ្ឈមណ្ឌលសន្និបាត និងពិព័រណ៍កោះពេជ្រ កាលពីពេលថ្មីៗនេះដើម្បីស្វែងរកដៃគូតំណាងចែកចាយនៅកម្ពុជា ។
លោក Beatrice Bridi ប្រធានគ្រប់គ្រងនិងរៀបចំគម្រោង Prometeo ឱ្យដឹងថា ៖ «នេះជាលើកទីមួយហើយដែលក្រុមហ៊ុនអីុតាលីនាំយកផលិតដូចជា គ្រឿងឧបភោគបរិភោគ គ្រឿងសម្អាង គ្រឿងសង្ហារិម គ្រឿងបរិក្ខារពេទ្យ គ្រឿងត្រាក់ទ័រ គ្រឿងម៉ាស៊ីនឧស្សាហកម្ម និងកសិកម្ម សម្ភារគ្រឿងសំណង់ និងម៉ូទ័របូមទឹកមកដាក់តាំងបង្ហាញនៅកម្ពុជា ។ ការដាក់តាំងនៅពេលនេះ គឺយើងមានគោលបំណងនាំចូលផលិតផលអីុតាលីដែលមានគុណភាពមកចែកចាយ ដាក់លក់ និងស្វែងរកដៃគូតំណាងចែកចាយលក់បន្តនៅកម្ពុជា ។ នៅក្នុងឱកាសដាក់តាំងបង្ហាញផលិតផលពេលនេះ យើងបាននាំយកក្រុមហ៊ុនចំនួន៧០ ស្មើនឹង៦៤ស្តង់មកដាក់តាំងលក់ផលិតផលរបស់ខ្លួនក្នុងពិព័រណ៍ផលិតផលអីុតាលី» ។
សម្រាប់ទីផ្សារនៅប្រទេសកម្ពុជា លោក Beatrice Bridi ឲ្យដឹងថា ៖ «ខ្ញុំយល់ឃើញថា ប្រទេសកម្ពុជា ជាប្រទេសទីផ្សារសេរីហើយការនាំចូលផលិតផលអីុតាលីនៅមិនទាន់ទូលំទូលាយនៅឡើយទេ ។ ដូច្នេះវាជាឱកាសមួយក្នុងការផ្សព្វផ្សាយ និងនាំចូលផលិតផលដែលមានគុណភាពពិតៗពីប្រទេសអីុតាលី ដើម្បីឆ្លើយតបទៅនឹងតម្រូវការអតិថិជននៅកម្ពុជា ។ នៅថ្ងៃអនាគត យើងនឹងផ្សព្វផ្សាយផលិតផលអីុតាលីឲ្យបានគ្រប់តំបន់នៅអាស៊ី តាមរយៈការតាំងពិព័រណ៍ផលិតផលអីុតាលីបន្ថែមទៀត»។
ដោយឡែកសម្រាប់ក្រុមហ៊ុន CBMS ដែលជាក្រុមហ៊ុននាំចូលផលិតផលអីុតាលីផ្តាច់មុខពីក្រុមហ៊ុន IMER លោក ឡៅ សាក់ ប្រធានគ្រប់គ្រងទូទៅ ឲ្យដឹងថា ៖ «គោលបំណងដែលក្រុមហ៊ុននាំយកផលិតផលអីុតាលីមកចូលរួមតាំងបង្ហាញនៅក្នុងពិព័រណ៍អុីតាលីនាពេលនេះ គឺដើម្បីអតិថិជនកម្ពុជាយល់ដឹងកាន់តែច្បាស់របស់ផលិតផលអីុតាលី ហើយចង់បង្ហាញថា ក្រុមហ៊ុនយើងមានផលិតផលគ្រប់ប្រភេទដែលបំពេញតាមតម្រូវរបស់ក្រុមហ៊ុនសាងសង់នៅកម្ពុជាបាន» ។
លោកបន្តទៀតថា ៖ «នៅពេលកន្លងមកផលិតផលដែលក្រុមហ៊ុននាំមកអីុតាលីនេះមានការគាំទ្រច្រើនពីក្រុមហ៊ុនសាងសង់ធំៗនៅក្នុងស្រុក ហើយឧបករណ៍ទាំងនោះមានដូចជា ម៉ាស៊ីនបាញ់បូកស៊ីម៉ង់ត៍ ដែលផ្តល់នៅភាពងាយស្រួល និងជំរុញឲ្យការសាងសង់មានសន្ទុះលឿន ធ្វើឲ្យក្រុមហ៊ុនចំណេញទាំងពេលវេលា និងកម្លាំងពលកម្មច្រើនក្នុងការសាងសង់» ។
លោកបញ្ជាក់ថា ៖ «ផលិតផលអីុតាលីដែលក្រុមហ៊ុនបាននាំចូល គឺមានភាពងាយស្រួលក្នុងការប្រើប្រាស់និងមានគុណភាពខ្ពស់ បើធៀបនឹងផលិតផលមកពីប្រទេសផ្សេងទៀត តួយ៉ាងដូចជា ម៉ាស៊ីនក្រឡុកស៊ីម៉ង់ត៍របស់អុីតាលីដែលប្រើម៉ូទ័រ មានទម្ងន់ស្រាល ងាយស្រួលក្នុងផ្លាស់ប្តូរទីតាំងខុសពីផលិតផលប្រទេសផ្សេង ។ នៅថ្ងៃអនាគតផលិតផលអីុតាលីនឹងមានការគាំទ្រច្រើន ព្រោះនៅពេលបច្ចុបុ្បន្នវិស័យសំណង់នៅកម្ពុជាមានការអភិវឌ្ឍច្រើន ហើយក្រុមហ៊ុនបរទេស និងអ្នកវិនិយោគដែលចូលកម្ពុជា ពួកគាត់ត្រូវការជាពិសេសនូវឧបករណ៍ដែលមានគុណភាព និងផ្តល់សុវត្ថិភាពដល់កម្មករ» ។
លោក ស្រី ចន្ធី អ្នកវិភាគសេដ្ឋកិច្ចឯករាជ្យ មានប្រសាសន៍ថា ៖ «សព្វថ្ងៃនេះមុខម្ហូបអីុតាលីជាច្រើនកំពុងតែបម្រើឲ្យពលរដ្ឋកម្ពុជាដែលមានជីវភាពធូរធារ និងមានទាំងភោជនីយដ្ឋានបម្រើអាហារកុម្ម៉ង់ជាដើម ។ ខ្ញុំមិនប្រាកដថា ភោជនីយដ្ឋាននានាមានមុខម្ហូបថ្មីជាក់លាក់នៅឡើយ ។ ពួកគេគួរតែរកទិញសិទ្ធិផ្តាច់មុខលើមុខម្ហូបទាំងនោះ»។
លោកបន្តថា ៖ «រហូតមកដល់ពេលនេះកម្ពុជាបានផ្គត់ផ្គង់នូវសម្ភារសំណង់សំខាន់ៗពីប្រទេសថៃ ចិន និងវៀតណាម ។ បណ្តាទីផ្សារទាំងនោះគឺមានតម្លៃសមរម្យ ប៉ុន្តែមិនទាន់មានស្តង់ដាខ្ពស់ឡើយ ចំណែកការរចនា ក៏មិនទាន់សម័យដូចនឹងបណ្ដាប្រទេសលោកខាងលិចដែរ» ។
លោកបញ្ជាក់ផងដែរថា ៖ «ចំពោះការចាប់ដៃគូវិនិយោគរវាងប្រទេសកម្ពុជា និងអីុតាលី អ្នកវិនិយោគកម្ពុជាអាចនឹងចាប់អារម្មណ៍វិនិយោគនាំចូលផលិតផលអីុតាលីមកកម្ពុជា ។ វាអាចក្លាយជាទីផ្សារដែលជាប់ចំណាត់ថ្នាក់បានផងដែរ ដោយសារតែប្រជាពលរដ្ឋកម្ពុជាមានទំនោរប្រើប្រាស់សម្ភារ ក៏ដូចជាការរចនាពីប្រទេសលោកខាងលិច ព្រមទាំងមានគុណភាពគ្រាន់បើផងដែរ» ៕
ចែករំលែកព័តមាននេះ