ប្រទេសរុស្ស៊ីកាលពីថ្ងៃទី២៤ តុលា បានបន្តការផ្តួចផ្តើមគំនិតខាងការទូតជុំវិញជម្លោះនៅស៊ីរី ហើយប្រមុខការទូតប្រទេសនេះនិយាយថា ត្រៀមជួយពួកឧទ្ទាមក្រុមកងទ័ពស៊ីរីសេរី ASL បន្ទាប់ពីកិច្ចប្រជុំជាមួយក្រុមត្រីភាគី គឺសហរដ្ឋអាមេរិក អារ៉ាប៊ី សាអ៊ូឌីត និងតួកគី ព្រមទាំងកិច្ចព្រមព្រៀងសហប្រតិបត្តិការមួយជាមួយប្រទេសហ្សកដានីមក ។
ក្នុងបទសម្ភាសន៍មួយជាមួយទូរទស្សន៍រុស្ស៊ី RUSSIYA-1 រដ្ឋមន្ត្រីការបរទេស លោកស័រហ្គេយឡាវរ៉ូវ អះអាងថា រុស្ស៊ីត្រៀមជួយទ្រទ្រង់ដល់ក្រុមប្រឆាំងស្នេហាជាតិ ក្នុងនោះរួមមានក្រុម ASL ពីអាកាសផងដែរ ។
ប្រមុខការទូតរុស្ស៊ីមានប្រសាសន៍ថា ប្រការសំខាន់គឺខិតទៅរកបណ្តាមនុស្សដែលជាតំណាងនៃបណ្តាក្រុមប្រដាប់អាវុធ ដែលប្រយុទ្ធប្រឆាំងភេរវកម្ម ។
ប្រាកដណាស់ ការប្រកាសនេះរបស់លោកឡាវរ៉ូវ ត្រូវបានបណ្តាតំណាងរបស់ ASL បដិសេធដោយចោទរុស្ស៊ីថា វាយប្រហារជាពិសេសលើបណ្តាក្រុមឧទ្ទាមនិយមកណ្តាល តាំងពីចាប់ផ្តើមយុទ្ធនាការវាយប្រហារតាមអាកាសរបស់ខ្លួនពីដំណាច់ខែកញ្ញាមក ។ អ្នកនាំពាក្យវិមានក្រឹមឡាំង លោកឌីមីទ្រី ប៉េស្កូវ ថ្លែងថា ក្រុងមូស្គូនៅពុំទាន់អាចកំណត់ដឹងថា តើក្រុមណាខ្លះជាក្រុមប្រឆាំងនិយមកណ្តាលនៅស៊ីរីឡើយ ។
លោកឡាវរ៉ូវ ក៏អះអាងផងដែរពីក្តីសង្ឃឹមថា អាចនាំបណ្តាភាគីក្នុងជម្លោះស៊ីរីមកកាន់តុចរចានាពេលឆាប់ៗនេះ ហើយយល់ថា ចាំបាច់ត្រូវរៀបចំការបោះឆ្នោតប្រធានាធិបតី និងសភានៅស៊ីរី ។ សំណើបែបនេះក៏ត្រូវបានពួកឧទ្ទាមស៊ីរីគាំទ្រដោយពួកលោកខាងលិចបដិសេធដែរ ដោយនិយាយថា រុស្ស៊ីសាកល្បងពង្វាងសំណើរបស់ប្រជាជនស៊ីរី សម្រាប់ការចាកចេញរបស់លោកអាសាដ ។
នៅលើទីលានការវាយប្រហារតាមអាកាសរបស់រុស្ស៊ីនៅបន្តខណៈប្រធានសភាស៊ីរី លោកជីហាដ អាល់ឡាហ៍ហាម អះអាងថា ប្រតិបត្តិការរួមរុស្ស៊ី-ស៊ីរីប្រឆាំងពួកឧទ្ទាម និងពួកជីហាដចាប់ផ្តើមផ្តល់លទ្ធផលធំៗហើយ ៕
ចែករំលែកព័តមាននេះ