បុរសម្នាក់ ប្រឈមជាប់គុក ពី៥ទៅ១០ឆ្នាំ ចម្លងជំងឺកូវីដ-១៩ដោយចេតនាដល់មនុស្ស៥នាក់ទៀត
រាជធានីភ្នំពេញ ៖ អនុគណៈកម្មការស្រាវជ្រាវជំងឺកូវីដ-១៩ បានអោយដឹងនៅថ្ងៃទី០៧ ឧសភា ២០២១នេះថា បុរសម្នាក់ឈ្មោះ ពេជ កុសល ត្រូវបានតុលាការ…
រាជធានីភ្នំពេញ ៖ អនុគណៈកម្មការស្រាវជ្រាវជំងឺកូវីដ-១៩ បានអោយដឹងនៅថ្ងៃទី០៧ ឧសភា ២០២១នេះថា បុរសម្នាក់ឈ្មោះ ពេជ កុសល ត្រូវបានតុលាការ ចេញដីកាសម្រេចឲ្យឃុំខ្លួនជាបណ្ដោះអាសន្ន ពីបទ មិនអនុវត្តតាមវិធានសុខាភិបាល ចំពោះការធ្វើចត្តាឡីស័ក ដែលបណ្ដាលឲ្យមនុស្សចំនួន ៥នាក់ បានឆ្លងមេរោគកូវីដ-១៩ និងអ្នកពាក់ព័ន្ធផ្ទាល់ និងប្រយោលជាង១០០នាក់ ត្រូវធ្វើចត្តាឡីស័ក ។
អនុគណៈកម្មការស្រាវជ្រាវជំងឺកូវីដ-១៩ បានបន្តអោយដឹងថា តាមការស្រាវជ្រាវ ៖
-ថ្ងៃទី២១ ខែមីនា ឆ្នាំ២០២១ ឈ្មោះ ពេជ កុសល បានជួបមិត្តភក្ដិម្នាក់ នៅអូរឫស្សី ដោយឈប់ម៉ូតូបើករបាំងមួកសុវត្ថិភាពនិយាយគ្នា ។
-ថ្ងៃទី២២ ខែមីនា ឆ្នាំ២០២១ ឈ្មោះ ពេជ កុសល បានដឹងថា មិត្តភក្ដិដែលបានជួបខាងលើ វិជ្ជមានកូវីដ-១៩ ក៏សម្រេចចិត្តទៅធ្វើតេស្ដ នៅមន្ទីរពេទ្យមិត្តភាពខ្មែរ-សូវៀត ទទួលបានលទ្ធិផល អវិជ្ជមាន និងបន្តធ្វើចត្តាឡីស័ក នៅផ្ទះរបស់ខ្លួន ។
-ថ្ងៃទី២៧ ខែមីនា ឆ្នាំ២០២១ ឈ្មោះ ពេជ កុសល បានទៅធ្វើតេស្ដជាលើកទី២ នៅវិទ្យាល័យបឹងត្របែក ទទួលបានលិទ្ធផល អវិជ្ជមាន និងបន្តធ្វើចត្តាឡីស័កនៅផ្ទះរបស់ខ្លួន ។
-ថ្ងៃទី២ ខែមេសា ឆ្នាំ២០២១ ឈ្មោះ ពេជ កុសល បានទៅធ្វើតេស្ដជាលើកទី៣ (មូលហេតុប្រពន្ធជាអ្នកលក់ខោអាវនៅផ្សារអូរឫស្សី) នៅវិទ្យាល័យបឹងត្របែក និងត្រូវធ្វើចត្តាឡីស័ក ដើម្បីរងចាំលទ្ធផលធ្វើតេស្ដរបស់ខ្លួនក្នុងរយៈពេល៣ថ្ងៃ ។
-ថ្ងៃទី៤ ខែមេសា ឆ្នាំ២០២១ (បិទផ្សារអូរឫស្សី) ឈ្មោះ ពេជ កុសល និងប្រពន្ធ បានចាក់ចេញពីផ្ទះ ដែលជាកន្លែងធ្វើចត្តាឡីស័ក នៅម៉ោង១៣ និង៣០នាទី ធ្វើដំណើរទៅដល់ផ្ទះម្ដាយ នៅស្រុកព្រៃកប្បាស ខេត្តតាកែវ នៅម៉ោង ១៥និង៣០នាទី តាមរយៈម៉ូតូ ។ ពេលទៅដល់ បានទៅបង់សំណាញ់ចាប់ត្រី ជាមួយប្អូនប្រុស ២នាក់, ពេលល្ងាចទៅលេងបាល់ទះ ជាមួយអ្នកភូមិ ៨នាក់ ។
-ថ្ងៃទី៥ ខែមេសា ឆ្នាំ២០២១ នៅម៉ោង ១០និង៣០នាទី គ្រូពេទ្យបានទាក់ទងទៅឈ្មោះ ពេជ កុសល ប្រាប់ពីលទ្ធផលធ្វើតេស្ដ វិជ្ជមាន និងត្រូវយកទៅព្យាបាល តែសាម៉ីខ្លួនបែរជា នៅខេត្តតាកែវទៅវិញ ។
សកម្មភាពរបស់ ឈ្មោះ ពេជ កុសល គឺមានចេតនា មិនអនុវត្តតាមវិធានសុខាភិបាល ចំពោះការធ្វើចត្តាឡីស័ក និងបានចម្លងមេរោគកូវីដ-១៩ ទៅមនុស្សចំនួន ៥នាក់ និងអ្នកពាក់ព័ន្ធផ្ទាល់ និងប្រយោលជាង ១០០នាក់ ។ ការល្មើសនឹងវិធានសុខាភិបាល ចំពោះការធ្វើចត្តាឡីស័ក និងចម្លងដោយចេតនានូវជំងឺកូវីដ-១៩ ដល់អ្នកដទៃ គឺជាអំពើខុសច្បាប់ ។
យោងតាមមាត្រា៩ នៃច្បាប់ ៖ បទចម្លងដោយចេតនា នូវជំងឺកូវីដ-១៩ ដល់អ្នកដទៃ ត្រូវផ្ដន្ទាទោសដាក់ពន្ធនាគារពី ៥ឆ្នាំ ទៅ១០ឆ្នាំ ។
មាត្រា១៣ និងកថាខណ្ឌ ៣ មាត្រា ២២ នៃអនុក្រឹត្យ ៖ បុគ្គលដែលមិនអនុវត្តកាតព្វកិច្ច ក្នុងពេលធ្វើចត្តាឡីស័ក ត្រូវផ្តន្ទាទោសជាពិន័យអន្តរការណ៍ពី ៥ សែនរៀល ទៅ ២លានរៀល ។
ច្បាប់ស្តីពីវិធានការទប់ស្កាត់ការឆ្លងរាលដាលនៃជំងឺកូវីដ-១៩ និងជំងឺឆ្លងកាចសាហាវ និងប្រកបដោយគ្រោះថ្នាក់ធ្ងន់ធ្ងរផ្សេងទៀត ។
អនុក្រឹត្យស្ដីពីវិធានការសុខាភិបាលដើម្បីទប់ស្កាត់ការឆ្លងរាលដាលនៃជំងឺកូវីដ-១៩ និងជំងឺឆ្លងកាចសាហាវនិងប្រកបដោយគ្រោះថ្នាក់ធ្ងន់ធ្ងរផ្សេងទៀត ៕
ចែករំលែកព័តមាននេះ