រាជធានីភ្នំពេញ ៖ ការប្រកួតបាល់ទាត់ពានរង្វាន់យុវជនអន្តរក្រសួង-ស្ថាប័នលើកទី៣ឆ្នាំ២០១៥ បានបើកដំណើរការជាផ្លូវការហើយកាលពីថ្ងៃសុក្រទី២៣ តុលា កន្លងទៅនេះ នៅលើទីលានបាល់ទាត់ Premium Sport Club ។
ការប្រកួតនេះបានការអញ្ជើញចូលរួមជាគណៈអធិបតីពីសំណាក់លោកស្រីដាំ ដារិនី ប្រធានស្ដីទីសហភាពសហព័ន្ធយុវជនកម្ពុជា និងលោកសុខ សប្បាយណា ប្រធានគណៈ កម្មការកីឡាបាល់ទាត់យុវជនអន្តរក្រសួង-ស្ថាប័ន ។ តាមការឱ្យដឹងពីគណៈកម្មការរៀបចំការប្រកួតបានឱ្យដឹងថា ការប្រកួតបាល់ទាត់ពានរង្វាន់យុវជនអន្តរក្រសួង-ស្ថាប័នឆ្នាំនេះមានកីឡាករចុះឈ្មោះចូលរួមចំនួន២៥ក្រុម ចែកចេញជា៦ពូល។ ប្រកួតធ្វើឡើងតាមរូបមន្តជម្រុះតាមពូល ដើម្បីរកក្រុមដែលមានពិន្ទុច្រើនជាងគេក្នុងមួយពូល២ក្រុមឡើងទៅប្រកួតជម្រុះនៅវគ្គបន្ត ។
ដោយឡែក សម្រាប់ការប្រកួតនៅជុំទី១ កាលពីថ្ងៃសុក្រ និងថ្ងៃសៅរ៍ទី២៣និង២៤ តុលា កន្លងទៅនេះ មានទាំងអស់៤ប្រកួត ។ នៅថ្ងៃសុក្រមាន២ប្រកួត ក្រុមក្រសួងសុខាភិបាលឈ្នះក្រុមក្រសួងបរិស្ថាន៤-១ និងក្រុមក្រសួងប្រៃសណីយ៍ និងទូរគមនាគមន៍ បានយកឈ្នះក្រុមអាជ្ញាធរសវនកម្មជាតិ៥-១ ។ ចំណែកថ្ងៃសៅរ៍ដែលមាន២ប្រកួតដែរនោះ ក្រុមក្រសួងការងារបណ្ដុះបណ្ដាលវិជ្ជាជីវៈ បានយកឈ្នះក្រុមក្រសួងព័ត៌មាន៦-១ និងក្រុមធនាគារជាតិ នៃកម្ពុជា បានយកឈ្នះក្រុមក្រសួងដែនដីនគររូបនីយកម្ម និងសំណង់៦-១ ។
លោកស្រីដាំ ដារិនី បានផ្ដាំផ្ញើដល់កីឡាករទាំងអស់ត្រូវលេងនៅក្នុងស្មារតីសាមគ្គីភាព មិត្តភាព ចេះអធ្យាស្រ័យឱ្យគ្នាទៅវិញទៅមក និងត្រូវគោរពតាមបទបញ្ជាប្រកួត។ លោកស្រីក៏បានលើកឡើងពីអត្ថប្រយោជន៍នៃការលេងកីឡា ដែលនាំមកនូវសុខភាពផ្លូវកាយ ផ្លូវចិត្តនិងប្រាជ្ញាស្មារតីផងដែរ ៕
ចែករំលែកព័តមាននេះ