ប្រទេសមីយ៉ាន់ម៉ា ៖ ថ្នាក់ដឹកនាំនិយ័តករអគារខ្ពស់ៗរបស់មីយ៉ាន់ម៉ាព្រមានថា គ្រឿងសំណង់មួយចំនួនបានដាក់លក់ដោយក្លែងបន្លំជាផលិតផលមានគុណភាពខ្ពស់ ខណៈជាក់ស្តែង ផលិតផលទាំងនោះនៅមានកម្រិតក្រោមលក្ខណៈស្តង់ដា ដែលជាក្តីបារម្ភទៅលើការអនុវត្តសំណង់អគារមានគុណភាពទាប ។
ទោះជាយ៉ាងណា គោលការណ៍ក្នុងការផ្តល់ពិន្ទុដល់បណ្តាក្រុមហ៊ុនសាងសង់ក្នុងក្រុងយ៉ាំងហ្គូន អាចជួយដល់ក្រុមហ៊ុនអភិវឌ្ឍន៍ដើម្បីបែងចែកឲ្យដាច់ដោយឡែកពីគ្នារវាងអ្នកកំពុងធ្វើតេស្តសាកល្បងគ្រឿងសំណង់ អ្នកកាត់បន្ថយតម្លៃ និងអ្នកទទួលយកផលិតផលក្លែងក្លាយ ។
នាយកប្រតិបត្តិរបស់គណៈកម្មការត្រួតពិនិត្យសំណង់ក្នុងគម្រោងអគារខ្ពស់ (CQHP) ចំណុះឲ្យក្រសួងសំណង់មីយ៉ាន់ម៉ា លោក Khin Maung Tint ថ្លែងថា ៖ «បណ្តាក្រុមហ៊ុនសំណង់នានាគួរតែធ្វើតេស្តលើគុណភាពគ្រឿងសំណង់មុននឹងយកទៅប្រើប្រាស់» ។
លោកបន្ថែមថា ៖ «សម្ភារសំណង់ដែលមានគុណភាពល្អចាំបាច់ត្រូវធានាថា អគារនោះនឹងមានអាយុកាលយូរអង្វែង ប៉ុន្តែគ្រឿងសំណង់ខ្លះនៅលើទីផ្សារ គឺគ្មានគុណភាពខ្ពស់ឡើយ ស្របពេលដែលពួកគេអះអាងពីកត្តានេះ» ។
ក្រុមហ៊ុនសំណង់លើកឡើងថា សម្ភារសំណង់ជាច្រើនប្រភេទ ដូចជា ដែកសរសៃមូលត្រូវបានគេកត់សម្គាល់ដោយការបិទតែមបង្ហាញពីគុណភាព និងភាពរឹងមាំរបស់វា ។ ទោះជាយ៉ាងណា ក៏មានមួយចំនួនបានធ្វើដោយក្លែងបន្លំផងដែរ ។
ចំណែកនាយកប្រតិបត្តិក្រុមហ៊ុនសំណង់ MKT Construction លោក Myo Myint ថ្លែងថា ៖ «ខ្ញុំសង្កេតឃើញថា មានអ្នកជំនួញមួយចំនួនបានបញ្ជូនគ្រឿងសំណង់អត់យីហោទៅជាមានយីហោដើម្បីបង្កើនតម្លៃ និងប្រាក់ចំណេញរបស់ពួកគេ» ។
រីឯក្រុមហ៊ុនសំណង់ខ្លះទៀតបានកាត់បន្ថយនូវនិន្នាការនេះ ។ ពួកគេគួរតែធ្វើតេស្តសម្ភារសំណង់របស់ពួកគេដោយខ្លួនឯង ដើម្បីឲ្យច្បាស់ពីគុណភាពមុននឹងប្រើប្រាស់សម្រាប់គម្រោង ។
លោក Yan Aung អ្នកគ្រប់គ្រងទូទៅរបស់ក្រុមហ៊ុនសំណង់ Asia Construction ថ្លែងថា ៖ «បណ្តាក្រុមហ៊ុនសំណង់ភាគច្រើនបានប្រើប្រាស់គ្រឿងសំណង់គ្មានយីហោត្រឹមត្រូវ ខណៈដែលសម្ភារទាំងនោះមានតម្លៃធូរថ្លៃ» ។
លោកបន្ថែមថា ៖ «ប៉ុន្តែយើងតែងធ្វើតេស្តគុណភាពគ្រឿងសំណង់មុននឹងប្រើវា គឺស្របទៅតាមមជ្ឈមណ្ឌលធ្វើឲ្យមានលក្ខណៈបទដ្ឋាន ISO» ។
ចំណែកសមាគមវិស្វកម្មមីយ៉ាន់ម៉ា ក៏បានដំណើរការនូវទីពិសោធន៍ត្រួតពិនិត្យគុណភាពសម្រាប់បេតុង និងដីនៅការិយាល័យកណ្តាលនៅឃុំ Hlaing ។
លោក Khin Maung Tint លើកឡើងថា ៖ «មានក្រុមហ៊ុនក្នុងរង្វង់ចំនួន៨ ដែលមានគុណសម្បត្តិគ្រប់គ្រាន់ក្នុងការធ្វើតេស្តពង្រឹងគុណភាពសំណង់ ។ នាយកដ្ឋានរបស់យើងមានទំនួលខុសត្រូវលើការធ្វើតេស្តគ្រឿងសំណង់ចំពោះគម្រោងអគារជាង១២ ហើយគណៈកម្មការអភិវឌ្ឍន៍ក្រុងអាចទទួលខុសត្រូវចំពោះគម្រោងតូចជាងនេះ» ។
លោក Yan Aung អ្នកផ្តល់ប្រឹក្សាលើអចលនទ្រព្យ បញ្ជាក់ថា ៖ «ទោះជាយ៉ាងណាការគ្រប់គ្រងគុណភាពអាចមានតម្លៃថ្លៃ ហើយក្រុមហ៊ុនសំណង់នានា ជានិច្ចកាលតែងគេចវេះក្នុងរឿងនេះ ។ ចំណែកបណ្តាក្រុមហ៊ុនសំណង់តូចៗកម្រនឹងធ្វើតេស្តគុណភាពណាស់ ដោយមួយចំនួនផ្តោតត្រឹមតែតម្លៃប៉ុណ្ណោះ ។ ចំណែកហាងលក់គ្រឿងសំណង់ក្លែងក្លាយមួយចំនួនបានបញ្ចុះតម្លៃ ប៉ុន្តែហាងដទៃទៀតគិតថា ផលិតផលរបស់ពួកគេមិនមែនជារបស់ពិតឡើយ» ។
សម្ភារសំណង់ធូរថ្លៃ និងអត់ស្លាកយីហោ ក៏មានការពេញនិយមផងដែរក្នុងទីផ្សារ នេះបើការឲ្យដឹងពីម្ចាស់ហាងដុំ និងលក់រាយបង្ហើបឱ្យដឹង ។
អ្នកលក់គ្រឿងសំណង់បោះដុំ និងរាយម្នាក់នៅ Saw Bwar Gyi Gone ឲ្យដឹងថា ពុំមានមធ្យោបាយណាដែលអាចដឹងពីគុណភាពនៃសម្ភារសំណង់អត់យីហោ ដោយគ្មានការធ្វើតេស្តនោះឡើយ» ។
ទោះជាយ៉ាងណា មានបញ្ហាជាច្រើនក្នុងទីផ្សារអចលនទ្រព្យដែលបានកើនឡើងប៉ុន្មានឆ្នាំមុននេះ ដោយគ្មានច្បាប់ទម្លាប់ និងធ្វើនិយ័តកម្មឱ្យបានត្រឹមត្រូវ ៕
ចែករំលែកព័តមាននេះ