ខេត្តសៀមរាប ៖ កុមារី២នាក់បងប្អូនបង្កើតដែលមានទេពកោសល្យផ្នែកគូរគំនូរទទួលបានការគាំទ្រ និងកោតសរសើរយ៉ាងខ្លាំងពីភ្ញៀវទេសចរជាតិ និងអន្តរជាតិ ជាពិសេសមានការចាប់អារម្មណ៍ពីបណ្ដាញសង្គមFacebook និងទទួលស្គាល់ពីសមត្ថភាពដ៏អស្ចារ្យរបស់ក្មួយៗទាំង២នាក់នោះ ត្រូវបានមន្ត្រីអាជ្ញាធរជាតិអប្សរាប្រាប់ឱ្យដឹងថា ខាងអជ្ញាធរអប្សរាបានជួយឧបត្ថម្ភគ្រួសារក្មួយៗទាំង២នាក់នេះ និងសន្យាជួយសម្រួលដល់ការសិក្សារៀនសូត្ររបស់កុមារីទាំងពីរនាក់ ទាំងថ្នាក់ចំណេះដឹងទូទៅ ថ្នាក់ជំនាញគូររូប និងថ្នាក់ភាសាបរទេសផងដែរ។
មន្ត្រីដដែលបានបន្តថា ការឧបត្ថម្ភគាំទ្រទាំងនេះ គឺជាការយកចិត្តទុកដាក់របស់លោក សុខ សង្វារ អគ្គនាយករងអាជ្ញាធរជាតិអប្សរាក្នុងឱកាសដែលលោកបានដឹកនាំក្រុមការងារចុះទៅសួរសុខទុក្ខដល់ផ្ទះក្មួយស្រីទាំងពីរនាក់ និងក្រុមគ្រួសារដែលរស់នៅភូមិភ្លង់ ឃុំលាងដៃ ស្រុកអង្គរធំ ខេត្តសៀមរាប កាលពីព្រឹកថ្ងៃទី២៣ តុលា ២០១៥នេះ។
មន្ត្រីដដែលបានបញ្ជាក់ថា លុះព្រឹកថ្ងៃទី២៤ អាជ្ញាធរអប្សរាក៏បានឧបត្ថម្ភនូវសម្ភារសិក្សាដូចជា សម្ភារគូររូប កៅអី ក្ដារខៀន, កង់២គ្រឿង រួមនឹងគ្រឿងឧបភោគ បរិភោគមួយចំនួនទៀតដល់ក្រុមគ្រួសាររបស់ក្មួយស្រីទាំងពីរនាក់នោះផងដែរ។
សូមបញ្ជាក់ផងដែរថា កុមារីដែលមានទេពកោសល្យផ្នែកគូរគំនូរទាំងពីរនាក់បងប្អូននោះ មានឈ្មោះ ប្រម ដានី ហៅស្រីណុច មានអាយុ៦ឆ្នាំ រៀនថ្នាក់ទី១ ទើបឡើង(ថ្នាក់ទី២ឆ្នាំថ្មី) និងបងស្រី ឈ្មោះ ប្រម និត ហៅ ស្រីនិត មានអាយុ១២ឆ្នាំ រៀនថ្នាក់ទី៧ នៃវិទ្យាល័យសម្តេចតេជោ ហ៊ុន សែន អង្គរធំ ដែលមានម្ដាយ ឈ្មោះ ធួក រី អាយុ៤៩ឆ្នាំ ជាមេផ្ទះ និងជាអ្នកធ្វើស្រែចំការ និងឪពុកឈ្មោះ ព្រឿង ប្រម អាយុ៥០ឆ្នាំ បច្ចុប្បន្នជាសន្តិសុខ នៅក្រុមហ៊ុនឯកជនមួយនៅក្រុងសៀមរាប។
នៅក្នុងឱកាសនេះដែរក្មួយស្រីទាំង២នាក់បងប្អូន ក៏បាននាំគ្នាគូរគំនូរដ៏ស្រស់ស្អាតដើម្បីទុកជាអនុស្សាវរីយ៍ដល់លោក សុខ សង្វារ អគ្គនាយករងអាជ្ញាធរជាតិអប្សរាផងដែរ៕
ចែករំលែកព័តមាននេះ