រាជធានីភ្នំពេញ ៖ មហាសន្និបាតលើកទី១៣៣ សហភាពអន្តរសភា ហៅកាត់ថា IPU បានបញ្ចប់ទៅប្រកបដោយផ្លែផ្កាល្អជាច្រើន ជាពិសេសការចាប់អារម្មណ៍ខ្លាំងទៅលើការពង្រឹងតួនាទីសមាជិកសភា ក្នុងការអនុវត្តគោលការណ៍នៃច្បាប់មនុស្សធម៌អន្តរជាតិ និងអនុសញ្ញាអន្តរជាតិស្តីពីការការពារជនភៀសខ្លួន ។
លោកហ៊ុន ម៉ានី សមាជិកគណៈកម្មការ កិច្ចការបរទេស សហប្រតិបត្តិការអន្តរជាតិ ឃោសនាការ និងព័ត៌មាន និងជាសមាជិកក្រុមប្រឹក្សាភិបាលនៃវេទិកាសមាជិកសភាវ័យក្មេង តំណាងឲ្យតំបន់អាស៊ី-ប៉ាស៊ីហ្វិករបស់ IPU បានលើកឡើងក្នុងសន្និសីទកាសែតនៅអាកាសយានដ្ឋានអន្តរជាតិភ្នំពេញ នាព្រឹកថ្ងៃទី២៣ តុលា ក្រោយពីគណៈប្រតិភូកម្ពុជាត្រឡប់មកពីមហាសន្និបាត ថា មហាសន្និបាតសហភាពអន្តរសភាមានរយៈពេល៥ថ្ងៃ ចាប់ពីថ្ងៃទី១៧ដល់២១ តុលា រៀបចំឡើងនៅមជ្ឈមណ្ឌលសន្និសីទអន្តរជាតិទីក្រុងហ្សឺណែវ ប្រទេសស្វីស ដែលមានសមាជិកសភាចូលរួមចំនួន៦៧០នាក់ ក្នុងនោះមានប្រធាន និងអនុប្រធានសភាចូលរួមចំនួន៩៤រូបមកពី១៣៥ប្រទេស ។
លោកហ៊ុន ម៉ានី គូសបញ្ជាក់ថា មហាសន្និបាតនេះ បានអនុម័តលើសេចក្ដីសម្រេចស្ដីពីលទ្ធិប្រជាធិបតេយ្យក្នុងយុគសម័យឌីជីថល ការគំរាមកំហែងដល់ភាពផ្ទាល់ខ្លួន សេរីភាពបុគ្គល សេចក្ដីសម្រេចតួនាទីសហភាពអន្តរសភា សមាជិកសភា អង្គការអន្តរជាតិ អង្គការក្នុងតំបន់ក្នុងការការពារការគាំទ្រជាបន្ទាន់ទៅដល់ជនទាំងឡាយដែលក្លាយខ្លួនជាជនភៀសខ្លួនដោយសារសង្គ្រាមជម្លោះផ្ទៃក្នុង ស្ថានភាពសង្គម សេដ្ឋកិច្ច យោងតាមច្បាប់មនុស្សធម៌អន្ដរជាតិ និងសន្ធិសញ្ញាអន្ដរជាតិ ធ្វើចំណាកស្រុកប្រកបដោយយុតិ្តធម៌ ភាពឆ្លាតវៃ និងមនុស្សធម៌ ។ លោកថា ចំពោះករណីសិទ្ធិមនុស្សសម្រាប់សមាជិកសភា ត្រូវបានគណៈកម្មាធិការសិទ្ធិមនុស្សសម្រាប់សមាជិកសភា ស្នើសុំទៅក្រុមប្រឹក្សាភិបាលអនុម័តសម្រេចទៅលើករណី មួយចំនួនកើតមាននៅ១៣ប្រទេសក្នុង៥តំបន់ (អាហ្វ្រិក អាម៉េរិក អាស៊ី អឺរ៉ុប និងមជ្ឈិមបូព៌ា) ក្នុងនោះមិនមានការលើកឡើងចំពោះកម្ពុជានោះទេ ។
គួរបញ្ជាក់ថា មហាសន្និបាតលើកទី១៣៤ របស់ IPU នឹងប្រព្រឹត្តនៅទីក្រុង LUSAKA ប្រទេស Zambia ចាប់ពីថ្ងៃទី១៩ដល់២៣មីនា ឆ្នាំ២០១៦ ខាងមុខ ៕
ចែករំលែកព័តមាននេះ