ខេត្តត្បូងឃ្មុំ ៖ ស្របពេល ភ្លៀងធ្លាក់លាយឡំនិងខ្យល់កន្ត្រាក់ខ្លាំង កើតមានស្ទើរតែទូទាំងខេត្តក្រុង ក្នុងប្រទេសកម្ពុជា នាល្ងាចថ្ងៃទី០៦ ឧសភា ២០២១នេះ នៅលើបណ្តាសង្គមហ្វេសប៊ុកមានការចែកចាយរំលែកបន្តយ៉ាងច្រើន នូវរូបភាពប៉ុន្មានសន្លឹក ពីគណនីមួយឈ្មោះថា Lida Sea អមដោយសារដាក់ថា «ដើមពោធិ៍ ប្រវត្តិស្នេហា រឿងទុំទាវ នៅស្រុកត្បូងឃ្មុំ ដែលមានដើមពោធិ៍ជើងខាល ជាសាក្សី ពេលនេះ ត្រូវខ្យល់បោកបក់ដួលរលំហើយ ឱដើមឈើស្នេហ៌អើយ មានអារម្មណ៍ថា សោកស្តាយខ្លាំងណាស់ ដើមពោធិ៍សាក្សីស្នេហ៌ប្រវត្តិសាស្ត្រ» ។
នាម៉ោង៨យប់ថ្ងៃទី០៦ ឧសភានេះ តាមការបញ្ជាក់អោយដឹងពីលោក ម៉ៅ ឌុង នាយករដ្ឋបាលសាលាខេត្តត្បូងឃ្មុំ បានប្រាប់អ្នកសារព័ត៌មានកោះសន្តិភាពថា ដើមពោធិ៍ ដែលបានរលំបាក់នោះ គឺជាដើមពោធិ៍ អ្នកតាក្រហម.ក ដែលដុះនៅជិតដើមពោធិ៍ ទុំ និងទាវ នៅជើងខាល ក្នុងខេត្តត្បូងឃ្មុំ ។ លោក ម៉ៅ ឌុង អះអាងប្រាប់តាមទូរស័ព្ទថា មិនមែនជាដើមពោធិ៍ ទុំទាវ នោះទេ ។
លោកនាយករដ្ឋបាលសាលាខេត្តត្បូងឃ្មុំ ប្រាប់បន្ថែមថា បន្ទាប់ពីទទួលបានព័ត៌មាន ដែលបានចុះផ្សាយនៅតាមបណ្ដាញសង្គមរួចមក ឯកឧត្តមបណ្ឌិត ជាម ច័ន្ទសោភ័ណ អភិបាលនៃគណៈអភិបាលខេត្ត បានចាប់ឲ្យជំនាញព្រមទាំង អាជ្ញាធរមូលដ្ឋានចុះទៅពិនិត្យមើល នៅព្រលប់ថ្ងៃទី០៦ ឧសភា ពេលទៅដល់ឃើញ ដើមពោធិ៍មួយដើមធំ ដែលរលំបាក់ ដោយខ្យល់កន្ត្រាក់នោះគឺជាដើមពោធិ៍ អ្នកតាក្រហមក ដែលដុះនៅចម្ងាយប្រមាណ ៥០ម៉ែត្រ ពីដើមពោធិ៍ “ទុំទាវ” នៅក្នុងភូមិជើងខាល ឃុំម៉ង់រៀវ ស្រុកត្បូងឃ្មុំ ។ ទោះជាយ៉ាងណា អាជ្ញាធរនឹងធ្វើការរៀបចំ ដាំដើមពោធិ៍ ដែលរលំនោះ ឡើងវិញ ។
តាមរយៈសាច់រឿង “ទុំទាវ”បានកើតឡើងនៅភូមិ ពោធិ៍ជើងខាល ឃុំមង់រៀវ ស្រុកត្បូងឃ្មុំ ខេត្តត្បូងឃ្មុំ សព្វថ្ងៃនេះ ។ យោងតាមសម្តីអ្នកស្រុកបាននិយាយតៗគ្នាថា បច្ចុប្បន្ននេះ ដើមពោធិ៍ “ទុំ” នៅម្ខាងផ្លូវជាតិលេខ៧ និងដើមពោធិ៍ “ទាវ” នៅទល់មុខគ្នាចម្ងាយប្រហែល ៤០០ម៉ែត្រ ៕
ចែករំលែកព័តមាននេះ