ខេត្តកណ្ដាល ៖ បុរសម្នាក់ដោយសារតែមានជំងឺប្រចាំកាយព្យាបាលមិនជា និងជំពាក់លុយគេច្រើន គ្មានលទ្ធភាពរកសងគេក៏បញ្ចប់ជីវិតដោយចង.កសម្លាប់ខ្លួន ត្រូវបានគេប្រទះឃើញនៅព្រៃក្រោយផ្ទះបង្កការភ្ញាក់ផ្អើលកាលពីម៉ោង៩យប់ថ្ងៃទី២២ តុលា នៅចំណុចក្នុងព្រៃថ្លុកតាអ៊ុយ ស្ថិតក្នុងភួមិទួលទ្រា ឃុំព្រែកក្មេង ស្រុកល្វាឯម ។
មន្ត្រីនគរបាលស្រុកល្វាឯម បានឲ្យដឹងថា បុរសដែលចង.កធ្វើអត្តឃាតខាងលើ ឈ្មោះ សុខ ប៊ុនធឿន អាយុ៥២ឆ្នាំ ជាកសិករ មានទីលំនៅភូមិឃុំកើតហេតុខាងលើ ។
មន្ត្រីនគរបាល បានបន្តថា អស់រយៈពេលប្រហែលជា៣ឆ្នាំកន្លងមកហើយ ក្នុងគ្រួសារបុរសរងគ្រោះជំពាក់លុយធានាគារមួយ និងកន្លែងផ្សេងៗទៀតសរុបចំនួនប្រហែល
(មួយម៉ឺនដុល្លារ) ដោយបុរសរងគ្រោះមិនមានមុខរបរអ្វីដែលអាចរកសងគេបាន និងមានជំងឺប្រចាំកាយពិបាកចិត្តពេក តែងតែនិយាយប្រាប់បងប្អូន និងអ្នកជិតខាងថា «ខ្ញុំអាយុមិនបានវែងទេ ពិបាកចិត្តមានជំងឺប្រចាំកាយ ណាមួយជំពាក់លុយគេច្រើនពេក» ។
លុះមកដល់ថ្ងៃកើតហេតុ វេលាម៉ោង២រសៀល បុរសរងគ្រោះ ក៏បានប្រាប់កូនប្រុសឈ្មោះ ចន ផានិត ថា ឪពុកទៅភូមិព្រែកតាអុង ហើយក៏ទៅបាត់រហូតដល់វេលាម៉ោង៤រសៀលថ្ងៃដដែល ប្រពន្ធកូនមិនឃើញត្រឡប់មកផ្ទះវិញក៏នាំគ្នាដើររករហូតដល់ម៉ោង៩យប់ទទួលបានដំណឹងថា ជនរងគ្រោះយកកង់ទៅផ្ញើគេនៅភូមិទួលទ្រាហើយដើរចុះទៅព្រៃខាងក្រោយផ្ទះ ។ ក្រុមគ្រួសារបានដើររកក្នុងព្រៃក៏ឃើញជនរងគ្រោះចង.កនឹងក្រមាជាប់ដើមរាំងស្លាប់បាត់ទៅហើយ ក៏នាំគ្នាស្រាយយកសពមកផ្ទះ ។
ករណីខាងលើនេះ នគរបាលបានបង្កើតគណៈកម្មការដើម្បីធ្វើកោសល្យវិច័យពិនិត្យសាកសព រួមមាន គ្រូពេទ្យឃុំ ក្រុមប្រឹក្សាឃុំ លោកមេភូមិ ក្រុមគ្រួសារសព នគរបាលប៉ុស្តិ៍/ស្រុក ជាលទ្ធផលបង្ហាញឱ្យឃើញថា បុរសរងគ្រោះបានចង.កសម្លាប់ខ្លួនពិតប្រាកដមែន ហើយក៏ប្រគល់ឲ្យក្រុមគ្រួសារយកទៅធ្វើបុណ្យតាមប្រពៃណី ៕
ចែករំលែកព័តមាននេះ