ខេត្តប៉ៃលិន ៖ កីឡាករប្រដាល់សេរីម្នាក់ឈ្មោះ លឹម ប៉ោហាន ហៅវង្ស ណយ អាយុ២៦ឆ្នាំ រស់នៅភូមិផ្សារព្រំ ឃុំស្ទឹងកាច់ ស្រុកសាលាក្រៅ ដែលធ្លាប់មានឈ្មោះបោះសម្លេងធ្វើឱ្យមហាជនចាំមិនភ្លេចរហូតមកដល់ពេលនេះបានកោសក់បួសរយៈពេល១អាទិត្យហើយនៅក្នុងវត្តរតនសោភ័ណ ហៅវត្តកោងកាង ស្ថិតក្នុងភូមិវត្ត សង្កាត់ប៉ៃលិន ក្រុងប៉ៃលិន ដើម្បីសងគុណឪពុកម្តាយ និងមានហេតុផលផ្សេងៗមួយចំនួនទៀតផងដែរ ហើយនៅវេលាម៉ោង៩ព្រឹកថ្ងៃទី២៣ តុលា ២០១៥នេះ រូបគេនឹងលាចាកសិក្ខាបទ (សឹកពីបួស) វិញ ហើយមិនទាន់ដឹងថា នៅបន្តអាជីពជាអ្នកប្រដាល់ទៀតឬយ៉ាងណានោះទេ ?
ប្រភពព័ត៌មានពីព្រះសង្ឃ ឈ្មោះ វង្ស ណយ ជាកីឡាករប្រដាល់សេរី ដែលទើបបួសបានរយៈពេល១អាទិត្យហើយនឹងសឹកទៅវិញបានរៀបរាប់ឱ្យដឹងថា រូបគេមានឪពុក ឈ្មោះ លឹម គ្រី អាយុ៦០ឆ្នាំ ជាកសិករ ម្តាយឈ្មោះ សាន ស៊ីថន អាយុ៥៩ឆ្នាំ តែពួកគាត់បានលែងលះគ្នាអស់រយៈពេលជាច្រើនឆ្នាំមកហើយ ដោយមានបងប្អូនចំនួន៧នាក់ ស្រី២នាក់ ប្រុស៥នាក់ កូនខ្លះនៅរស់នៅភូមិខាងលើ ខ្លះទៀតតាមឪពុកទៅរស់នៅចំណុចឡែម ក្នុងភូមិដូង ឃុំកំរៀង ស្រុកកំរៀង ខេត្តបាត់ដំបង ។
ប្រភពបន្តទៀតថា កាលពីមិនទាន់បួសជាព្រះសង្ឃ រូបគេបានចូលហាត់ប្រដាល់ក្បាច់គុណបុរាណខ្មែរជាមួយលោកគ្រូម្នាក់ ឈ្មោះ ឆេង ទូច អាយុប្រហែល៤៦ឆ្នាំ នៅក្នុងក្លឹបសុវណ្ណគីរី ក្នុងភូមិ-ឃុំខាងលើ តាំងពីឆ្នាំ២០០៤មកម្ល៉េះ ហើយក៏បានចូលប្រដាល់តាមភូមិ-ឃុំនានាក្នុងខេត្តប៉ៃលិន និងខេត្តផ្សេងៗទៀតជាច្រើនរហូតដល់ល្បីក៏ឡើងលើសង្វៀនទូរទស្សន៍ជាច្រើនដូចជា CTN, TV5, TV3, និង SEATVផងដែរ ។
ក្នុងការប្រដាល់ម្តងៗតែងតែមានចាញ់នឹងឈ្នះជារឿងធម្មតា ហើយក៏រូបគេមានការសប្បាយ និងពេញចិត្តចំពោះមុខអាជីពមួយនេះ ព្រោះធ្វើឱ្យខ្លួនអាចជៀសឆ្ងាយពីគ្រឿងញៀន នាំមកនូវសុខភាពល្អ និងចេះទប់កំហឹងរបស់ខ្លួន ។
ប្រភពបញ្ជាក់ទៀតថា ក្នុងការបួសរយៈពេល១អាទិត្យគិតចាប់តាំងពីថ្ងៃសុក្រទី១៦ តុលា រហូតមកដល់ព្រឹកថ្ងៃសុក្រទី២៣ នេះ ក្នុងគោលបំណង ១-ចង់សងគុណឪពុកម្តាយដែលបានបង្កើតរូបគេមក ព្រោះបងប្អូនទាំងអស់គ្មាននរណាម្នាក់បានបួសរៀនឡើយ ២-ចង់ឱ្យជាប់សាច់ញាតិជាមួយព្រះពុទ្ធសាសនា និងស្វែងយល់វិធីសាស្ត្រខ្លះៗ ក្នុងការធ្វើឱ្យចិត្តស្ងប់សុខ ៣-លាបំណន់ដែលខ្លួនធ្លាប់ស្បថសច្ចាចំពោះរឿងផ្សេងៗមួយចំនួន ៤-ចង់លើកតម្លៃព្រះពុទ្ធសាសនា បន្ទាប់ពីខ្លួនបានស្រឡាញ់វិស័យកីឡា ៥-ចង់យល់ដឹងពីការបួសជាសង្ឃមានការលំបាក ត្រូវអត់ធ្មត់ទ្រាំទ្រដើរបិណ្ឌបាត្រយ៉ាងណា?
នៅម៉ោង១០ព្រឹកនេះ អ្នកយកព័ត៌មានមិនអាចទាក់ទងសុំការបំភ្លឺបានទេពីអន្ទិតវង្ស ណយ ទាក់ទងនឹងរឿងថាតើលោកនៅបន្តអាជីពជាអ្នកប្រដាល់ទៀតឬយ៉ាងណា?
ចែករំលែកព័តមាននេះ