រាជធានីភ្នំពេញ ៖ នៅថ្ងៃសៅរ៍ ទី២៤ តុលា ការប្រកួតប្រដាល់២សង្វៀនត្រូវគេចាប់អារម្មណ៍ថាបានទទួលការយកចិត្តទុកដាក់ពីអ្នកស្នេហាប្រដាល់យ៉ាងពិសេសតែម្ដង ។ នៅលើសង្វៀនទូរទស្សន៍អាស៊ីអាគ្នេយ៍(SEA-TV) វេលាម៉ោង៨ព្រឹក កីឡាករជើងខ្លាំង២រូបគឺឈឿន ឆៃដែន និងផាន់ គ្រាន់ ត្រូវគេឱ្យប៉ះកណ្ដាប់ដៃជាមួយថៃ ចំណែកនៅវេលាល្ងាចថ្ងៃដដែល កីឡាករកម្ពុជានិងថៃរឹតតែត្រូវស្វាគមន៍គ្នាដោយភាពតានតឹងបំផុតនៅលើសង្វៀនទូរទស្សន៍ប៉ុស្តិ៍លេខ៥ (TV5) ។
កីឡាករឈឿន ឆៃដែន នឹងត្រូវគេឲ្យស្វាគមន៍ភ្ញៀវមកពីប្រទេសថៃនៅវេលាព្រឹកស្អែក ដើម្បីរំលេចព្រឹត្តិការណ៍អន្តរជាតិរៀងរាល់២សប្ដាហ៍ម្ដងនៅលើសង្វៀនទូរទស្សន៍អាស៊ីអាគ្នេយ៍ ។ កីឡាករថៃឈ្មោះ Phach Nam Ek ដែលអ្នកណាក៏ស្គាល់ថា ជាជើងខ្លាំងទៅហើយ នឹងបើកឆាកប្រយុទ្ធជាមួយកីឡាករល្បីឈ្មោះរបស់កម្ពុជាមួយនេះ ។ អ្នកទាំងពីរនឹងឡើងប៉ះគ្នាក្រោមក្រសែភ្នែកតាមដានពីអ្នកទស្សនាកកកុញ ។ កីឡាករកម្ពុជាគឺជាជើងខ្លាំង និងជាគ្រាប់ពេជ្រប្រចាំក្លិបនិរោធមានជ័យ ហើយនៅលើសង្វៀនគេកម្រទទួលបរាជ័យណាស់ បើទោះជាគូប្រកួតដែលត្រូវប៉ះគ្នាគឺជាម្ចាស់ខ្សែក្រវាត់ និងល្បីថាជាជើងខ្លាំងនៅក្នុងប្រទេសថៃក្ដី ។ ប៉ុន្តែពេលខ្លះគេស្ពាយភាពអាម៉ាស់ ព្រោះតែចាញ់ក្រោមដៃកីឡាករធម្មតាដែលនឹកស្មានមិនដល់ផងដែរ នៅពេលគូប្រកួតហាក់ចាប់បាននូវចំណុចខ្សោយរបស់គេនៅផ្នែកណាមួយ។ យ៉ាងណាក៏ដោយ កីឡាករឈឿន ឆៃដែន ត្រូវគេមើលឃើញថា មានគុណសម្បត្តិច្រើនជាងគុណវិបត្តិ ដោយមានភាពច្បាស់លាស់ក្នុងការវាយលុកក៏ល្អមិនចាញ់កីឡាករកម្ពុជាដែលឈរក្នុងលំដាប់ជួរមុខផ្សេងទៀតនោះដែរ ។
កីឡាករថៃ និងកីឡាករកម្ពុជាគូនេះ ត្រូវគេអះអាងថាមានតួលេខចាញ់ដៃគូស្មើគ្នា ដោយប្រវត្តិនៃការឡើងរេញរបស់អ្នកទាំងពីរមានសភាពខុសគ្នាតែបន្តិចបន្តួចប៉ុណ្ណោះ ។ កីឡាករថៃ Phach Nam Ek ធ្លាប់ប្រកួតបាន៧០លើក ឈ្នះ៥៨លើក ចាញ់១១លើក និងស្មើ១លើក។ ឯឈឿន ឆៃដែន ធ្លាប់ប្រកួតបាន៧១លើក ឈ្នះ៥៩លើក ចាញ់១១លើក និងស្មើ១លើកនិងមានកម្ពស់ប្រហាក់ប្រហែលគ្នា ។ អ្នកទាំង២ប្រកួតគ្នាក្នុងប្រភេទទម្ងន់៦០គីឡូក្រាម ខណៈកីឡាករថៃត្រូវគេមើលឃើញថាល្អជាង ជាពិសេសកម្លាំងស៊ុហ្វ អញ្ចឹងហើយទើបការប្រកួតមួយគូនេះ មានគេចាំមើលច្រើន ។
កីឡាករផាន់ គ្រាន់ ដែលជាគូឯកនៅក្នុងព្រឹត្តិការណ៍ ត្រូវគេឲ្យប៉ះប្រកួតជាមួយកីឡាករថៃឈ្មោះPhlay Noy នៅវេលាព្រឹកនោះដែរ។ អ្នកទាំង២ប្រកួតគ្នាក្នុងប្រភេទទម្ងន់៦៥គីឡូក្រាម។ គ្រាប់ពូជដ៏សំខាន់របស់ក្លិបគជសារកីឡា ហាក់មានជំនឿចិត្តច្រើនក្នុងការយកឈ្នះទៅលើកីឡាករថៃ បើទោះជាមានតួលេខបញ្ជាក់ថា គេមានប្រវត្តិឡើងរេញ និងឈ្នះច្រើនជាងកីឡាករផាន់ គ្រាន់ ។ ជើងខ្លាំងរូបនេះ ប្រកាសដោយចំហថា មិនចាញ់សម្រាប់ព្រឹកស្អែកនោះទេ ដោយសារតែមុនគេឡើងប្រកួត គឺបានហ្វឹកហាត់ និងរំឭកក្បាច់គុនដិតដល់ ។ ប៉ុន្តែភាគីថៃក៏អះអាងដូចគ្នាថាកីឡាកររបស់ខ្លួន គឺជាជើងខ្លាំងម្នាក់ដែលមានថ្វីដៃធ្លាប់បំបាក់កីឡាករខ្មែរកន្លងមកផងដែរ។ កីឡាករថៃ មានស្ថិតិធ្លាប់ប្រកួតបាន៨៨ដង ឈ្នះ៧៧ដង ចាញ់៨ដង និងស្មើ៣ដង ។ ចំណែកកីឡាករផាន់ គ្រាន់ ធ្លាប់ប្រកួតបាន៧០ដង ឈ្នះ៥៨ដង ចាញ់៨ដង និងស្មើ៤ដង ។ អ្នកទាំង២ បើធៀបនឹងការប្រកួតរវាងកីឡាករថៃ និងកម្ពុជាខាងលើ គឺមានការចាប់អារម្មណ៍ខ្លាំងជាង ដោយសារតែផាន់ គ្រាន់ ក៏ខ្លាំង ហើយកីឡាករថៃក៏ខ្លាំងនៅលើសង្វៀន។
នៅថ្ងៃសៅរ៍ កីឡាករ២រូបដែលប្រកួតគ្នាក្នុងនាមជាគូអន្តរជាតិផង និងជាគូប្រកួតប្រជែងគ្នាឆ្ពោះទៅរកចំណាត់ថ្នាក់ជើងឯកនៅសង្វៀនទូរទស្សន៍ប៉ុស្ដិ៍លេខ៥ ក៏កាន់តែមានចំណាប់អារម្មណ៍ថែមទៀត ។ ការប្រកួតដែលចាប់ផ្តើមនាម៉ោង៥ល្ងាចស្អែកនៅសង្វៀនជ្រោយចង្វាជាប់សាកលវិទ្យាល័យន័រតុននោះ គឺជាវគ្គអ្នកឈ្នះពូលA ប៉ះជាមួយពូលB ។ យ៉ាងណាក៏ដោយ ក្នុងចំណោមកីឡាករ៤រូប គឺមានការប៉ះប្រកួតរវាងកីឡាករឈាន ហុង មកពីសមាគមកីឡាប្រដាល់ក្រសួងការពារជាតិ និងកីឡាករថៃ MeerachaiMenayuthin ប៉ុណ្ណោះដែលត្រូវគេផ្ដោតការចាប់អារម្មណ៍ជាងគេ។ ចាប់អារម្មណ៍ដោយសារតែអ្នកទាំងពីរជាប់លេខខាងខ្លាំង និងត្រូវគេមើលឃើញថា បើអ្នកណាឈ្នះនៅក្នុងវគ្គនេះនឹងក្លាយជាជើងឯកតែម្ដង ដោយសារតែកីឡាករ២រូបទៀតមិនមែនជាគូរបស់ពួកគេនោះទេ ។ រវាងកីឡាករឈាន ហុង និងកីឡាករថៃ ទាំងថ្វីដៃ និងបច្ចេកទេសគឺមានកម្រិតល្អដូចគ្នា ហើយអ្នកទាំងពីរក៏ពិតជាឈ្នះចាញ់គ្នាដោយវេទនានៅវគ្គចុងក្រោយនោះដែរ ដោយសារតែពួកគេម្នាក់ៗសុទ្ធតែត្រូវការឡើងទៅប្រកួតបន្តយកជើងឯក និងប្រាក់លាន ។ នៅក្នុងព្រឹត្តិការណ៍នោះដែរ កីឡាករវ៉ាន់ ចាន់វ៉េត មកពីក្លិបព្រះខ័នរាជ ក៏នឹងត្រូវប៉ះប្រកួតជាមួយកីឡាករថៃ ប៊ុនហាន មកពីក្លិបឫទ្ធីពោធិសែនជ័យផងដែរ ។ អ្នកទាំងពីរនឹងត្រូវមានម្នាក់ឡើងទៅប៉ះឈាន ហុង ឬកីឡាករថៃដើម្បីកំណត់យកលេខ១ ។ យ៉ាងណាក៏ដោយ ក្នុងចំណោមអ្នកទាំងពីរ មានការប៉ាន់ស្មានថា មិនអាចទៅរួចជាមួយកីឡាករឈាន ហុង ឬកីឡាករថៃនោះទេ។ អញ្ចឹងហើយទើបមានការសោកស្ដាយ ដ្បិតបើកីឡាករឈាន ហុង និងកីឡាករថៃ កុំប៉ះគ្នាក្នុងវគ្គ១ភាគ៤ នោះពួកគេគឺពិតជាប៉ះគ្នាក្នុងវគ្គដណ្ដើមយកលេខ១ និងលេខ២ ដែលច្បាស់ជាធ្វើឲ្យព្រឹត្តិការណ៍ដណ្ដើមជើងឯកមួយនេះកក្រើកខ្លាំង ។
នៅថ្ងៃសៅរ៍នោះដែរ នៅលើសង្វៀនទូរទស្សន៍អាស៊ីអាគ្នេយ៍ ក៏មានការប្រកួតវគ្គខ្វែងនៅក្នុងព្រឹត្តិការណ៍ដណ្ដើមខ្សែក្រវាត់របស់ក្រុមហ៊ុន K-Cement ចាប់ពីម៉ោង២រសៀលតទៅ ៕
ចែករំលែកព័តមាននេះ