ADផ្ទាំងផ្សព្វផ្សាយពាណិជ្ជកម្ម

ដីរដ្ឋ១កន្លែងយកធ្វើទីបច្ឆាបូជាស.ពអ្នកស្លា.ប់ដោយកូវីដ ក្រោយពលរដ្ឋផ្ទុះការតវ៉ាមិនឱ្យបូជាក្នុងវត្តជ្រៃបាក់

2 ឆ្នាំ មុន

កំពង់ឆ្នាំង
០៥ ខែ ឧសភា ឆ្នាំ ២០២១ ម៉ោង ១៧:១៣

ខេត្តកំពង់ឆ្នាំង ៖ ដោយសារមានបាតុភាព ធ្វើឱ្យលំបាកដល់ទីកន្លែងបូជាស.ពអ្នកដែលបានស្លា.ប់ដោយសារជំងឺកូវីដ១៩ អាជ្ញាធរខេត្តកំពង់ឆ្នាំង បានចាត់ឲ្យមន្ទីរចម្រុះចុះទៅរកទីតាំងដើម្បីកសាងទីបច្ឆាសម្រាប់បូជាស.ពអ្នកដែលបានស្លា.ប់ដោយសារជំងឺកូវីដ១៩ ។ គួររំលឹកថា អ្នកភូមិលើកគ្នាតវ៉ាមិនឱ្យអាជ្ញាធរបូជាស.ពស្ត្រីស្លា.ប់ដោយកូវីដ នៅទីបច្ឆាវត្តមួយ…

លោក ងិន ហ៊ុន ប្រធានមន្ទីរកសិកម្មរុកា្ខប្រមាញ់និងនេសាទ ខេត្តកំពង់ឆ្នាំង បានបញ្ជាក់ថា កាលពីរសៀលថ្ងៃទី 4 ខែឧសភា ម្សិលមិញនេះ ក្រុមការងារចម្រុះ មានមន្ទីរសុខាភិបាល, មន្ទីរកសិកម្ម, មន្ទីរធម្មការ, មន្ទីរមុខងារ, ស្នងការនគរបាលខេត្ត និងអាជ្ញាធរមូលដ្ឋាន បានទៅពិនិត្យមើលទីតាំងមួយកន្លែងដែលនឹងត្រូវរៀបចំកសាងធ្វើជាទីបច្ឆាសម្រាប់បូជាស.ពអ្នកដែលបានស្លាប់ដោយសារជំងឺកូវីដ១៩ ។

លោកបានបញ្ជាក់ថា ទីតាំងនេះជាដីរបស់រដ្ឋ ស្ថិតនៅក្នុងភូមិដំណាក់កី ឃុំជើងគ្រាវ ស្រុករលាប្អៀរ ។ ក្រោយពីការពិនិត្យហើយក៏សម្រេចយកទីតាំងនេះសម្រាប់កសាងទីបច្ឆាតែម្ដង ព្រោះជាទីតាំងនៅដាច់ស្រយាល ហើយស្ថិតនៅក្នុងព្រៃរបស់រដ្ឋទៀត មិនពាក់ព័ន្ធដល់ប្រជាពលរដ្ឋនោះឡើយ ។

ជុំវិញបញ្ហាកសាងទីបច្ឆា សម្រាប់បូជាស.ពអ្នកស្លា.ប់ដោយសារជំងឺកូវីដ19 នេះដែរ មន្ត្រីនៃមន្ទីរសុខាភិបាលសុំមិនបញ្ចេញឈ្មោះម្នាក់បានឲ្យដឹងថា ប្រជាពលរដ្ឋ ដែលកន្លងមកមានការភ័យខ្លាចនឹងការឆ្លងដោយសារការបូជាស.ពអ្នកកើតកូវីដនោះមិនត្រឹមត្រូវនោះទេ ។ ជាទូទៅ ស.ពអ្នកកើតកូវីដត្រូវបានវេចខ្ចប់ជាច្រើនជាន់យ៉ាងត្រឹមត្រូវដោយថង់ប្លាស្ទិក បាញ់អាល់កុលសម្លា.ប់មេរោគពីខាងក្នុង និងខាងក្នុងខាងក្រៅ ចំណែកមន្ត្រីដែលធ្វើការងារនេះក៏មានពាក់ខោអាវជាច្រើនជាន់និងការពារយ៉ាងត្រឹមត្រូវផងដែរ។ មេរោគមិនអាចរស់នៅក្នុងភ្លើងច្រើនពាន់អង្សានោះបានដែរ ។

មន្ត្រីជំនាញរូបនោះក៍បានរំលឹកដែរថា កាលពីប៉ុន្មានថ្ងៃមុនមានស្ត្រីម្នាក់មកពីភ្នំពេញបានស្លា.ប់ដោយសារជំងឺកូវីដ១៩ ក្រោយមកមន្ទីរជំនាញក៏បានយកស.ពទៅបូជានៅវត្តជ្រៃបាក់ ក្នុងភូមិជ្រៃបាក់ ឃុំជ្រៃបាក់ ស្រុករលាប្អៀរ ប៉ុន្តែត្រូវបានប្រជាពលរដ្ឋរារាំងដោយសារតែការខ្លាចឆ្លងជំងឺកូវីដ19 ទើបអាជ្ញាធរខេត្តសម្រេចបញ្ជូនស.ពស្ត្រីរូបនោះទៅបូជានៅវត្តផ្សេងវិញ ។

ដោយសារតែជួបបញ្ហាខាងលើនេះហើយ ទើបអាជ្ញាធរសម្រេចរៀបចំកសាងទីបច្ឆាសម្រាប់បូជាស.ពអ្នកស្លា.ប់ដោយសារជំងឺកូវីដ១៩ ដោយយកទីតាំងដីរដ្ឋមួយកន្លែង ក្នុងភូមិដំណាក់កី ឃុំជើងគ្រាវ ស្រុករលាប្អៀរ ហើយការរៀបចំក្រុងពាលីកសាង នឹងប្រព្រឹត្តទៅនៅថ្ងៃទី6 ខែឧសភា ស្អែកនេះហើយ ៕