រាជធានីភ្នំពេញ ៖ អ្នកប្រដាល់ក្បាច់គុនបុរាណខ្មែរលំដាប់ជួរមុខកម្ពុជា និងអ្នកប្រដាល់ជើងខ្លាំងថៃនឹងឡើងអង្រួនសង្វៀនកម្មវិធីប្រដាល់សមរភូមិអ្នកប្រយុទ្ធស្រាបៀរលីអូ ដើម្បីក្លាយជាម្ចាស់ទឹកប្រាក់១ម៉ឺនដុល្លារ នៅស្ទូឌីយោទូរទស្សន៍PNN នាថ្ងៃទី២៤ តុលា ២០១៥ ចុងសប្តាហ៍នេះ ។
ព្រឹត្តិការណ៍ប្រដាល់សេរីដ៏លេចធ្លោមិនធ្លាប់មាននៅកម្ពុជាដើម្បីចម្រាញ់យកកីឡាករល្អផ្តាច់ ក្នុងប្រភេទទម្ងន់៥៤, ៥៧ និង៦៣,៥គីឡូក្រាម នេះនឹងផ្សាយផ្ទាល់លើកញ្ចក់ទូរទស្សន៍PNNចាប់ពីម៉ោង៤រសៀលថ្ងៃសៅរ៍ស្អែកនេះ ។
កូនខ្លាជើងរន្ទះកណ្ដាប់ដៃផ្លេកបន្ទោរ អាំង សំអាត នឹងប្រកួតជាមួយអ្នកប្រយុទ្ធគុនខ្មែរនៃសមាគមប្រដាល់ក្រសួងការពារជាតិ សៀវ ង៉ុយ នាគូទី១ ដើម្បីកាត់សេចក្តីថា តើនរណាជាអធិរាជលើសង្វៀននៅក្នុងប្រភេទទម្ងន់៥៤គីឡូក្រាម ។ មុនឈានដល់វគ្គផ្តាច់ព្រ័ត្រនេះ អាំង សំអាត បានយកឈ្នះគូបដិបក្ខទាំង៤រូប ខណៈសៀវ ង៉ុយ ចាញ់១ ឈ្នះ៣នៅក្នុងកម្មវិធីសមរភូមិអ្នកប្រយុទ្ធស្រាបៀរលីអូ របស់ស្ថានីយទូរទស្សន៍PNN កន្លងមក ។
រីឯគូទី២វិញ គឺជាវេនរបស់អ្នកប្រដាល់មុខតាន់ ជង្គង់ថ្ម ជា សំនៀង ដែលនឹងត្រូវចូលខ្លួនមកតតាំងជាមួយនាគរាជកំពូលពិសរបស់ថៃ មង្គុន ពេជ្រ (MongkornpetchChorpradith)ក្នុងប្រភេទទម្ងន់៦៣,៥គីឡូក្រាម ។ អ្នកល្បីទាំងពីរមិនធ្លាប់ចាញ់សត្រូវលើសង្វៀនម្តងណាឡើយកន្លងទៅនៅ PNN ។
គូទី៣នៅក្នុងប្រភេទទម្ងន់៥៧គីឡូក្រាម អ្នកស្នេហាវិស័យប្រដាល់ក្បាច់បុរាណខ្មែរ នឹងបានទស្សនាម្ចាស់មេដាយមាសវ៉ូវីណាមពិភពលោកឆ្នាំ២០១៥ សែន រ៉ាឌី ធ្វើព្យុះធ្វើភ្លៀងជាមួយកីឡាករថៃអ្នកលេងជង្គង់គ្មានប្រណីកងភុនលិក (KongpornlekKiatkorngpon)។ សម្រាប់គូនេះ កីឡាករម្ទេសខ្មាំង សែន រ៉ាឌី បានផ្តួលគូប្រកួតឱ្យសន្លប់ទាំងអស់នៅលើសង្វៀន PNN ចំណែក កង ភុនលិក ធ្លាប់ឈ្នះដោយសន្លប់១ និងឈ្នះដោយពិន្ទុ៣ដង។
ជ័យលាភីម្នាក់ៗ តាមប្រភេទទម្ងន់របស់ខ្លួន នឹងទទួលបានពានរង្វាន់មួយ ខ្សែក្រវាត់មួយពីស្រាបៀរលីអូ អមដោយទឹកប្រាក់ដ៏ច្រើនសន្ធឹកសន្ធាប់នៅក្នុងប្រវត្តិសាស្ត្រប្រដាល់ខ្មែរ ១ម៉ឺនដុល្លារផងដែរ។
លោក សំណព្វ ប្រធានផ្នែកកីឡារបស់ទូរទស្សន៍PNN ថ្លែងថា៖ «ព្រឹត្តិការណ៍ប្រកួតដណ្តើមជើងឯកដែលមានទឹកប្រាក់ដ៏មហិមានេះ នឹងមានការគាំទ្រច្រើនពីទស្សនិកជន មិនថានៅស្ឌូឌីយូផ្ទាល់ ឬនៅឯគេហដ្ឋាន ដោយសារតែកីឡាករទាំង៦ដួងនេះ សុទ្ធសឹងតែធ្លាប់បង្ហាញសមត្ថភាពដ៏អស្ចារ្យរបស់ខ្លួននៅលើសង្វៀនសមរភូមិអ្នកប្រយុទ្ធស្រាបៀរលីអូ អស់រយៈពេល៣ខែមកហើយ ។ ហើយជំនួបលើកនេះ នឹងរឹតតែរំភើបជក់ចិត្តដិតអារម្មណ៍ជាងពេលណាៗទាំងអស់» ។
មុនពេលឈានមកដល់វគ្គផ្តាច់ព្រ័ត្រនេះ អាំង សំអាត ធ្លាប់ឈ្នះការប្រកួតចំនួន២៥ដង ចាញ់១៩ដង ស្មើ៥ដង និងផ្តួលដៃគូឲ្យសន្លប់ចំនួន៣ដង រីឯកីឡាករ សៀវ ង៉ុយ ឈ្នះ៦៣ដង ចាញ់២១ដង និងផ្តួលដៃគូឲ្យសន្លប់ចំនួន២១ដង ។
បើនិយាយអំពីប្រវត្តិនៃការប្រកួតប្រភេទទម្ងន់៦៣,៥គីឡូក្រាមវិញ កីឡាករ ជា សំនៀង ធ្លាប់ប្រកួតឈ្នះ៨២ដង ចាញ់៨ដង ស្មើ១ដង និងផ្តួលដៃគូឲ្យសន្លប់ចំនួន១៧ដង រីឯកីឡាករមង្គុន ពេជ្រឈ្នះ៦៨ដង ចាញ់២៨ដង ស្មើ២ដង និងផ្តួលដៃគូឲ្យសន្លប់ចំនួន៣៣ដង ។
កីឡាករសែន រ៉ាឌី ហៅម្ទេសខ្មាំង មានទម្ងន់៥៧គីឡូក្រាម ធ្លាប់ឈ្នះការប្រកួតចំនួន៤៥ដង ចាញ់១១ដង និងផ្តួលដៃគូឲ្យសន្លប់ចំនួន៣២ដង ។ កីឡាករដែលមានដើមកំណើតមកពីខេត្តកោះកុងរូបនេះ នឹងជួបជាមួយកីឡាករមកពីប្រទេសថៃ កង ភុនលិក ដែលធ្លាប់មានប្រវត្តិប្រកួតឈ្នះ៥២ដង ចាញ់២៥ដង ស្មើ២ដង និងផ្តួលដៃគូឲ្យសន្លប់ចំនួន១៩ដង ៕
ចែករំលែកព័តមាននេះ