ដោយបញ្ចប់ពាក្យចចាមអារ៉ាមជាច្រើនលើលទ្ធភាពឈរឈ្មោះជាបេក្ខជនប្រធានាធិបតីអនុប្រធានាធិបតីអាមេរិក លោក JOE BIDEN ប្រកាសកាលពីថ្ងៃទី២១ តុលា ថា លោកនឹងមិនឈរឈ្មោះជាបេក្ខជនឡើយ ។
ក្នុងសន្និសីទសារព័ត៌មានមួយនាថ្ងៃទី២១ តុលានោះ លោក BIDEN ថ្លែងថា ការកាន់មរណទុក្ខចំពោះមរណភាពរបស់កូនប្រុសលោក គឺលោក BEAU BIDEN បានបិទបង្អួចសម្រាប់គម្រោងប្រាកដនិយមមួយនៃការដណ្តើមតំណែងប្រមុខសេតវិមាន ។ ខ្ញុំសម្រេចថា បិទបង្អួចហើយ ។ បទពិសោធន៍នៃជីវិតរបស់ខ្ញុំបានបង្រៀនខ្ញុំថា ការកាន់មរណទុក្ខចំពោះសាច់ញាតិដែលទទួលមរណភាពពុំមែនជារឿងមួយ ដែលចែងក្នុងកាលវិភាគឡើយ ។ លោកថ្លែងបែបនេះនៅសេតវិមានអមដោយប្រធានាធិបតី លោកបារ៉ាក់ អូបាម៉ា និងលោកស្រី JILL ភរិយារបស់លោក ។
លោក BIDEN បន្តថា ខ្ញុំជឿជាក់ថា យើងពុំមានពេលវេលាគ្រប់គ្រាន់សម្រាប់ធ្វើយុទ្ធនាការឃោសនាឱ្យបានជោគជ័យមួយសម្រាប់ប្រជែងយកបេក្ខជនសម្រាំងនៃគណបក្សប្រជាធិបតេយ្យ ។
ការសម្រេចចិត្តនេះរបស់លោក BIDEN បានបញ្ចប់ពាក្យចចាមអារ៉ាមជាច្រើនខែ ដែលថា លោកនឹងប្រជែងជាមួយលោកស្រីហ៊ីលឡារី គ្លីនតុន ក្នុងយុុទ្ធនាការដណ្តើមយកបេក្ខជនសម្រាំងនៃគណបក្សប្រជាធិបតេយ្យ ៕
ចែករំលែកព័តមាននេះ