រាជធានីភ្នំពេញ ៖ រោងចក្រផលិតជីគីមីកសិកម្មមួយកន្លែងនឹងលេចរូបរាងឡើងក្នុងរយៈពេល២ឆ្នាំខាងមុខទៀត ដែលជាការវិនិយោគរបស់អ្នកវិនិយោគមកពីតៃវ៉ាន់ ។ រោងចក្រនេះបានចំណាយទឹកប្រាក់វិនិយោគប្រមាណ១០០លានដុល្លារអាមេរិកដើម្បីសាងសង់នៅតាមបណ្ដោយផ្លូវជាតិលេខ៤ ចន្លោះពីគីឡូម៉ែត្រលេខ១៤៤ ពីរាជធានីភ្នំពេញ ស្ថិតក្នុងស្រុកស្រែអំបិល ខេត្តកោះកុង ។
លោក Fu-Hsing Lee អគ្គនាយកក្រុមហ៊ុន Taiwan Fertilizer Co., Ltd ជាអ្នកវិនិយោគលើគម្រោងសាងសង់រោងចក្រផលិតជីគីមីកសិកម្មនេះ បានមានប្រសាសន៍ក្នុងពិធីបើកការដ្ឋានសាងសង់រោងចក្រ កាលពីថ្ងៃទី២០ តុលា ថា ៖ «ក្រុមហ៊ុនយើងមានបទពិសោធន៍ក្នុងការផលិតជីកសិកម្មអស់រយៈពេល៦៩ឆ្នាំមកហើយ ហើយការសម្រេចចិត្តមកវិនិយោគក្នុងប្រទេសកម្ពុជានាពេលនេះ ដោយសារតែមើលឃើញថា ប្រទេសកម្ពុជាចាប់ផ្ដើមមានការអភិវឌ្ឍ ជាពិសេស កម្ពុជារក្សាបាននូវកំណើនសេដ្ឋកិច្ចថេរជុំវិញ៧% ។ ម្យ៉ាងទៀត តម្រូវការជីគីមីកសិកម្ម ក៏មានច្រើនផងដែរនៅកម្ពុជា» ។
លោកបន្តថា ៖ «រោងចក្រថ្មីនេះ នឹងផលិតជីគ្រប់ប្រភេទដែលមានគុណភាពខ្ពស់ សម្រាប់បំពេញតម្រូវការប្រជាពលរដ្ឋកម្ពុជា ក្នុងគោលបំណងឱ្យពួកគាត់មានជីកសិកម្មប្រើប្រាស់គ្រប់ប្រភេទ ព្រមទាំងជួយឱ្យដំណាំដុះលូតលាស់បានឆាប់រហ័ស ។ ដោយសារតែខ្ញុំ និងព្រះអង្គម្ចាស់នរោត្តម ចក្រពង្ស ជាមិត្តរាប់អានគ្នាយូរមកហើយ ទើបក្រុមហ៊ុនយើងសម្រេចបោះទុនបង្កើតរោងចក្រផលិតជីសម្រាប់ប្រជាពលរដ្ឋកម្ពុជាពេលនេះ» ។
លោក លីម លាង ប្រធានក្រុមប្រឹក្សាភិបាលក្រុមហ៊ុនតំបន់សេដ្ឋកិច្ចពិសេសឆកកំពង់សោម បានមានប្រសាសន៍ថា ៖ «ក្រុមហ៊ុនតៃហ្វើ របស់លោក Lee បានមកវិនិយោគក្នុងតំបន់សេដ្ឋកិច្ចពិសេសឆកកំពង់សោមនាពេលនេះ គឺអាចជួយបានច្រើនដល់សេដ្ឋកិច្ចកម្ពុជា ។ ការមកវិនិយោគរបស់ក្រុមហ៊ុនតៃហ្វើ ដោយបង្កើតរោងចក្រក្នុងប្រទេសកម្ពុជានាពេលនេះ អាចទប់ស្កាត់ការនាំចូលជីដែលគ្មានគុណភាព ហើយងាកមកផលិតជីមានគុណភាពសម្រាប់វិស័យកសិកម្ម ជាពិសេសបង្កើតការងារជូនពលរដ្ឋក្នុងមូលដ្ឋាន ដោយអាចកាត់បន្ថយភាពក្រីក្ររបស់ពលរដ្ឋ និងលើកកម្ពស់កម្រិតជីវភាពរបស់ពួកគាត់ផងដែរ» ។
លោក ស្រី ចន្ធី អ្នកវិភាគសេដ្ឋកិច្ចឯករាជ្យកម្ពុជា មានប្រសាសន៍ថា ៖ «វាជារឿងល្អសម្រាប់ការមកវិនិយោគរបស់អ្នកវិនិយោគចិននៅប្រទេសកម្ពុជា ។ ខ្ញុំគិតថា ការវិនិយោគរបស់ក្រុមហ៊ុនចិនហាក់ដូចជានាំមុខ ចំណែកសម្រាប់វិស័យផ្សេងទៀតក៏ដូច្នេះដែរ ។ ជាក់ស្ដែង ទេសចរជនជាតិចិន ក៏បានមកទស្សនាកម្ពុជាមានចំនួននាំមុខច្រើន ។ ក្នុងកិច្ចសហប្រតិបត្តិការអន្តរជាតិ និងសេដ្ឋកិច្ចរវាងរាជរដ្ឋាភិបាលនៃប្រទេសទាំងពីរបានអនុគ្រោះ និងលើកទឹកចិត្តដល់ការវិនិយោគ ព្រមទាំងមានទំនាក់ទំនងពាណិជ្ជកម្មបន្ថែមពីប្រទេសចិននៅកម្ពុជាផងដែរ» ។
លោកបន្តថា ៖ «ការវិនិយោគរបស់ចិន ក៏ដូចជាការវិនិយោគផ្សេងៗទៀត បើសិនជាអាចធ្វើបានសម្រេច វានឹងគាំទ្រ និងជំរុញការអភិវឌ្ឍលូតលាស់នៃសេដ្ឋកិច្ចរបស់កម្ពុជា ដោយបង្កើតការងារជាច្រើនសម្រាប់ពលរដ្ឋក្នុងស្រុក ។ ប្រភេទជីគីមីភាគច្រើន គឺទទួលអនុផលពីប្រេង ឬការប្រើប្រាស់អនុផលពីប្រេងក្នុងសង្វាក់ផលិតកម្ម ។ ជាក់ស្ដែង កម្ពុជានឹងទាញយកប្រេងរបស់ខ្លួននៅពេលខាងមុខនេះ ។ ដូច្នេះការបង្កើតឧស្សាហកម្មផលិតជី នឹងអាចយកប្រេងនោះមកប្រើ ឬបម្រើឱ្យការបង្កើននូវទំហំសេដ្ឋកិច្ចពីអនុផលប្រេង ឬកាកសំណល់ផ្សេងៗបាន» ។
លោកបញ្ជាក់ថា ៖ «ការបង្កើតរោងចក្រផលិតជីក្នុងស្រុកអាចជួយកាត់បន្ថយការនាំចូលជីពីខាងក្រៅ ជួយឱ្យជីក្នុងស្រុកមានតម្លៃទាបជាងមុន និងអាចបង្កើនការនាំចេញរបស់កម្ពុជាបានផងដែរ ។ ម្យ៉ាងទៀត ការវិនិយោគឧស្សាហកម្មជីគីមីនៅកម្ពុជា ក៏អាចជួយជំរុញវិស័យផ្សេងៗឱ្យកាន់តែមានការអភិវឌ្ឍឡើង។ ជាក់ស្ដែង ការផលិតបាវសម្រាប់ច្រកជី និងតម្រូវការសេវាកម្មដឹកជញ្ជូនជាដើម» ។
គួរបញ្ជាក់ថា រោងចក្រផលិតជីរបស់ក្រុមហ៊ុនតៃហ្វើ ដែលជាការវិនិយោគរបស់តៃវ៉ាន់ បានសាងសង់លើផ្ទៃដីប្រមាណ៦០ហិកតា ហើយត្រូវចាប់ផ្ដើមសាងសង់ក្នុងអំឡុងខែវិច្ឆិកា ២០១៥ ខាងមុខ ។ ចំពោះដំណើរការសាងសង់វិញ គ្រោងនឹងបញ្ចប់ក្នុងរយៈពេល២ឆ្នាំ បន្ទាប់ពីពេលចាប់ផ្ដើម ។
ចំណែកតំបន់សេដ្ឋកិច្ចពិសេសឆកកំពង់សោម មានផ្ទៃដីប្រមាណ១៥០០ហិកតា លាតសន្ធឹងក្នុងឃុំជ្រោយស្វាយ និងឃុំកំពង់លួង ស្រុកស្រែអំបិល ខេត្តកោះកុង ។ ការវិនិយោគលើតំបន់សេដ្ឋកិច្ចពិសេសនេះអស់ទឹកប្រាក់ប្រមាណ៦០០លានដុល្លារអាមេរិក ៕
ចែករំលែកព័តមាននេះ