អង់គ្លេស ៖ Manchester City បាន​បំបាក់​ក្រុម Paris St-Germain ដើម្បី​ឈាន​ទៅ​កាន់​វគ្គ​ផ្តាច់ព្រ័ត្រ​ក្របខ័ណ្ឌ UEFA Champions League ជា​លើក​ដំបូង​ក្នុង​ប្រវត្តិសាស្ត្រ​។

ការ​ប្រកួត​ជើង​ទី​២ ដែល​ធ្វើ​ឡើង​ក្នុង​កីឡដ្ឋាន Etihad កាលពី​យប់មិញ បាន​បញ្ចប់​ទៅ​ដោយ​ក្រុម​ម្ចាស់ផ្ទះ Man City យកឈ្នះ​ក្នុង​លទ្ធផល ២-០​។ ខណៈ​ដែល ២​គ្រាប់​នេះ សម្រេច​បាន​ដោយ​កីឡាករ Riyad Mahrez​។

ដោយ​កាលពី​ជើង​ទី​១ នៅ​ឯ​កីឡដ្ឋាន Parc des Princes ម្ចាស់ផ្ទះ PSG បាន​ចាញ់​ដោយ​លទ្ធផល ២-១​។ ដូច្នេះ​សរុប​ការ​ប្រកួត​ទាំង​២​ជើង Man City យកឈ្នះ​ដោយ​លទ្ធផល ៤-១​។

Man City ក្រោម​ការ​ដឹកនាំ​របស់​អ្នកចាត់ការ​ទូទៅ Pep Guardiola បាន​បើក​ទំព័រ​ប្រវត្តិសាស្ត្រ​ថ្មី ក្នុង​ការ​ឈាន​ទៅ​វគ្គ​ផ្តាច់​ព្រ​ត្រ័​ក្រប​ខណ្ឌ Champions League ចាប់តាំងពី​ក្លិប​មួយ​នេះ​ត្រូវ​បាន​បង្កើត​ឡើង​នៅ​ឆ្នាំ​១៨៨០ ពោល​គឺ​មាន​រយៈពេល ១៤១​ឆ្នាំ​។

ការ​ប្រកួត​វគ្គ​ផ្តាច់​ព្រ​ត្រ័​នឹង​ត្រូវធ្វើ​ឡើង​នៅ​ឯ​កីឡដ្ឋាន Atatürk Olympic ក្នុង​ទីក្រុង Istanbul ប្រទេស​តួ​ក​គី នា​ថ្ងៃ​ទី​២៩ ខែឧសភា ខាង​មុខ​នេះ​។ ខណៈ​ដែល Man City ត្រូវ​រង់ចាំ​លទ្ធផល​ការ​ប្រកួត​គូប្រជែង​១​គូ​ទៀត​រវាង Chelsea នឹង Real Madrid សម្រាប់​ជើង​ទី​២​វគ្គ​ពាក់កណ្តាល​ផ្តាច់​ព្រ​ត្រ័​នៅ​យប់​នេះ​៕