រាជធានីភ្នំពេញ ៖ យុវជន២នាក់រងរបួសស្រាល បន្ទាប់ពីរត់គេចពីក្រុមចោរមួយក្រុមដែលស្ទាក់ផ្លូវដេញកាប់ប្លន់យកម៉ូតូបានសម្រេចកាលពីវេលាម៉ោង១១យប់ថ្ងៃទី២១តុលា ២០១៥ នៅកែងផ្លូវលេខ២៧១និងផ្លូវតាផុន ស្ថិតក្នុងសង្កាត់ទួលទំពូង២ ខណ្ឌចំកាមន ។
យុវជនរងគ្រោះម្នាក់ឈ្មោះ អម លីង អាយុ២២ឆ្នាំ ជាជាងកាត់ដែក ស្នាក់នៅផ្ទះជួលក្នុងភូមិជ្រេស សង្កាត់ភ្នំពេញថ្មី ខណ្ឌសែនសុខ ហើយម៉ូតូដែលត្រូវក្រុមចោរប្លន់យកទៅនោះម៉ាកស្មាស់វី ពណ៌សលាយខ្មៅ ពាក់ស្លាកលេខបាត់ដំបង1J-6153 ។
តាមសាក្សីនៅកន្លែងកើតហេតុ បានឱ្យដឹងថា មុនពេលកើតហេតុ យុវជនរងគ្រោះនិងមិត្តភក្តិបានចូលលេងក្នុងក្លឹបមួយ បន្ទាប់ពីមិត្តភក្តិម្នាក់ស្រវឹងស្រាខ្លាំពេកក៏បានជូនទៅផ្ទះមិត្តភក្តិម្នាក់ទៀតនៅម្តុំផ្លូវតាផុន ហើយក៏ត្រឡប់មកវិញស្រាប់តែលេចមុខមនុស្សមួយក្រុមប្រដាប់ដោយដាវរត់មកពីក្រោយកាប់ប្រហារមិត្តភក្តិម្នាក់ដែលជិះនៅខាងក្រោយបណ្តាលឱ្យធ្លាក់ពីលើម៉ូតូ ឃើញមិត្តភក្តិធ្លាក់ពីលើម៉ូតូ មិនហ៊ានជិះរត់ចោលទេក៏ឈប់ម៉ូតូយកដំថ្មគប់តដៃជាមួយក្រុមចោរ ហើយក្រុមចោរទាំងនោះក៏រត់សំដៅមកដេញកាប់អ្នកបើកម៉ូតូ ភ្លាមនោះអ្នកបើកម៉ូតូទុកម៉ូតូចោលរត់យករួចខ្លួន ធ្វើឱ្យក្រុមចោរទាំងនោះលើកយកម៉ូតូរបស់ជនរងគ្រោះជិះគេចខ្លួនបាត់ទៅ ។
ក្រោយពេលកើតហេតុ យុវជនរងគ្រោះក៏បានរត់មកបញ្ជាការដ្ឋានកងរាជអាវុធហត្ថខណ្ឌចំកាមន ដើម្បីដាក់ពាក្យបណ្តឹង ៕
ចែករំលែកព័តមាននេះ