បន្ទាយមានជ័យ៖ ភ្លៀងលាយឡំ ដោយខ្យល់កន្ត្រាក់ ប៉ះពាល់ ៤ឃុំ ក្នុងស្រុកស្វាយចេក បណ្តាលខូចខាតផ្ទះសំបែងប្រជាពលរដ្ឋ ចំនួន ១៧ខ្នង។ ហេតុការណ៍គ្រោះមហន្តរាយធម្មជាតិនេះ បានកើតឡើង កាលពីម៉ោង ៥:៤០នាទីល្ងាចថ្ងៃទី០៣ ខែឧសភា ឆ្នាំ២០២១។
លោកវរៈសេនីយ៍ឯក ជា ឈ្លូញ អធិការដ្ឋាននគរបាលស្រុកស្វាយចេក បានអោយដឹងថា ផ្ទះប្រជាពលរដ្ឋ ដែលខូចខាតទាំង ១៧ខ្នងនេះ ប្រជាប្រភេទផ្ទះឈើ ប្រក់សង្កសី។ តែសំណាងល្អ គ្មានប្រជាពលរដ្ឋ គ្រោះថ្នាក់ឡើយ។
លោកបានបញ្ជាក់ថា ផ្ទះរងការខូចខាត ដោយខ្យល់កន្ត្រាក់ ចំនួន ៤ឃុំនេះ ក្នុងស្រុកស្វាយចេក រួមមាន ១.ឃុំស្វាយចេក ប៉ះពាល់ចំនួន ១ខ្នង ២.ឃុំតាផូរ ប៉ះពាល់ចំនួន ២ខ្នង ៣.ឃុំទ្រាស់ ប៉ះពាល់ចំនួន ១ខ្នង ឃុំរលួស ប៉ះពាល់ចំនួន ១៣ខ្នងផ្ទះ។
លោកវរៈសេនីយ៍ឯក ជា ឈ្លូញ បានបញ្ជាក់ថា ក្រោយពេលខ្យល់កន្ត្រាក់នេះ អាជ្ញាធរស្រុកស្វាយចេក និងមន្ត្រីនគរបាលស្រុក បានចុះទៅពិនិត្យ រាយការណ៍ជូនលោកឧត្តមសេនីយ៍ទោ សិទ្ធិ ឡោះ ស្នងការនៃស្នងការដ្ឋាននគរបាល ខេត្តបន្ទាយមានជ័យ ដើម្បីសុំកម្លាំងចុះអន្តរាគមន៍ ជួយជួសជុលផ្ទះជូនប្រជាពលរដ្ឋ ដែលរងគ្រោះដោយខ្យល់កន្ត្រាក់នេះ៕ ប៊ុន ធឿន
ចែករំលែកព័តមាននេះ