រាជធានីភ្នំពេញ ៖ បុរស៣នាក់មិនទាន់ស្គាល់អត្តសញ្ញាណនៅឡើយទេ រងរបួសធ្ងន់បែកក្បាល និងបាក់ជើង ដោយសារតែជិះម៉ូតូមួយគ្រឿង រួចបត់ត្រឡប់ក្រោយដោយបញ្ច្រាសទិសត្រូវរថយន្តមកពីក្រោយបុកពេញទំហឹងកាលពីវេលាម៉ោង១១និង៥នាទីយប់ថ្ងៃទីថ្ងៃទី២១ តុលា ២០១៥ នៅលើបណ្តោយមហាវិថីសហព័ន្ឋរុស្សី ស្ថិតក្នុងភូមិក្បាលដំរី សង្កាត់កាកាប ខណ្ឌពោធិ៍សែនជ័យ ។
តាមសាក្សីនៅកន្លែងកើតហេតុបានឲ្យដឹងថា នៅមុនពេលកើតហេតុ គេឃើញបុរស៣នាក់ជិះម៉ូតូម៉ាកវីវ៉ា ពណ៌ខ្មៅ ពាក់ស្លាកលេខ1AG-8044 មួយគ្រឿង ដោយជិះតាមបណ្តោយមហាវិថីសហព័ន្ឋរុស្សី ក្នុងទិសដៅពីកើតទៅលិចក្នុងល្បឿនលឿន លុះមកដល់ចំណុចកើតហេតុក៏បានបង្អង់ល្បឿន រួចបត់ត្រឡប់ក្រោយវិញ ខណៈនោះក៏មានរថយន្តម៉ាកតូយូតា ហាយយ៉ាក់ ពណ៌ទឹកប្រាក់ ពាក់ស្លាកលេខភ្នំពេញ 2R-6557 បើកដោយបុរសម្នាក់ទិសដៅស្របគ្នាមកពីក្រោយ បានវ៉ាក់នឹងម៉ូតូនោះ ក៏ជាន់ហ្វ្រាំងអូសជាង១០មែត្រ នៅតែជ្រុលទៅបុកចំពីមុខពេញទំហឹង បណ្តាលឲ្យបុរសទាំង៣នាក់ហោះបោកផ្ទប់នឹងកញ្ចក់រថយន្តរងរបួសបាក់ជើង និងបែកក្បាលហូរឈាមពេញផ្លូវ ចំណែករថយន្តគាបជាប់ជាមួយនឹងម៉ូតូនៅក្រោមកង់ទៅមុខលែងរួច ។ ភ្លាមៗនោះដែរ សមត្ថិកិច្ចបានមកដល់កន្លែងកើតហេតុ និងទាក់ទងទៅរថយន្តសាមុយមកដឹកបុរសរងគ្រោះទាំង៣នាក់យកទៅសង្គ្រោះនៅមន្ទីរពេទ្យ ។
ក្រោយពេលកើតហេតុ សមត្ថកិច្ចបានឃាត់ម្ចាស់រថយន្ត និងធ្វើការវាស់វែងរួចយករថយន្តនិងម៉ូតូទៅរក្សាទុកនៅអធិការដ្ឋាននគរបាលខណ្ឌពោធិ៍សែនជ័យ ដើម្បីរង់ចាំការដោះស្រាយគ្នាទៅតាមផ្លូវច្បាប់ ៕
ចែករំលែកព័តមាននេះ