រាជធានីភ្នំពេញ ៖ ក្រសួងព័ត៌មានបានបញ្ជាក់ពីតំបន់យកព័ត៌មាន និងការផ្សាយព័ត៌មានក្នុងតំបន់ហាមឃាត់អំឡុងពេលបិទខ្ទប់ ។
យោងតាមសេចក្តីជួនដំណឹងពីការចូលយកព័ត៌មាន និងការផ្សាយព័ត៌មានក្នុងតំបន់ហាមឃាត់បានបញ្ជាក់ថា ជម្រាបជូនលោក លោកស្រី ម្ចាស់ប្រព័ន្ធផ្សព្វផ្សាយ អ្នកសារព័ត៌មានជាតិ និងអន្តរជាតិជ្រាបថា កន្លងមកក្រសួងព័ត៌មានបានសង្កេតឃើញថា សា្ថប័នសារព័ត៌មាន និងបងប្អូនអ្នកសារព័ត៌មានយើង បានចូលរួមយ៉ាងសកម្មក្នុងការផ្សព្វផ្សាយព័ត៌មានជូនប្រជាពលរដ្ឋបានយ៉ាងទូលំ ទូលាយអំពីសកម្មភាព និងវិធានការរបស់រាជរដ្ឋាភិបាលក៏ដូចជាសកម្មភាព និងវិធានការសុវត្ថិភាពរបស់ក្រសួងសុខាភិបាលក្នុងការប្រឆាំងទប់ស្កាត់ការឆ្លងរាលដាលនៃជំងឺកូវីដ១៩ ចូលក្នុងសហគមន៍បានជោគជ័យនាពេលកន្លងមក ។
ក្រសួងបញ្ជាក់ថា ទន្ទឹមនេះក៏មានអ្នកសារព័ត៌មានជាតិ និងអ្នកសារព័ត៌មានបរទេសមួយចំនួនបានចុះយកព័ត៌មាន និងធ្វើការផ្សាយផ្ទាល់អំពីសកម្មភាពនានានៅតំបន់បិទខ្ទប់ក្នុងភូមិសាស្ត្ររាជធានីភ្នំពេញ និងក្រុងតាខ្មៅនៃខេត្តកណ្តាល ជាពិសេសនៅក្នុងតំបន់ក្រហម និងតំបន់ហាមឃាត់ដូចជា មណ្ឌលព្យាបាលជំងឺកូវីដ-១៩ មន្ទីរពេទ្យរដ្ឋ និងឯកជន ព្រមទាំងធ្វើសកម្មភាពដេញតាមថតរថយន្តសង្គ្រោះបន្ទាន់ដោយធ្វើការផ្សាយផ្ទាល់ ហើយធ្វើអត្ថាធិប្បាយអំពីហេតុការណ៍ពាក់ព័ន្ធផ្នែកបច្ចេកទេសសុខាភិបាល និងធ្វើការសន្និដ្ឋានវាយតម្លៃលើបញ្ហាផ្សេងៗ ដោយគ្មានមូលដ្ឋានច្បាស់លាស់ធ្វើឱ្យសាធារណជនមានការយល់ច្រឡំបង្កភាពជ្រួល ច្របល់នៅក្នុងសង្គម និងប្រឈមទៅនឹងគ្រោះថ្នាក់នៃការឆ្លងរាលដាលជំងឺកូវីដ-១៩ កាន់តែធ្ងន់ធ្ងរទៅៗ ។
ជាមួយគ្នានោះដែរ ក្រសួង ដើម្បីរក្សាសុវត្ថិភាពសង្គម និងទប់ស្កាត់ការឆ្លងរាលដាលជំងឺកូវី -១៩ ទៅក្នុងសហគមន៍ក្រសួង ព័ត៌មានសូមធ្វើការណែនាំដល់អ្នកសារព័ត៌មានទាំងអស់បញ្ឈប់រាល់សកម្មភាពខាងលើជាបន្ទាន់ ។ ករណីនៅតែបំពានល្មើសសេចក្តីជូនដំណឹងនេះនឹងត្រូវទទួលខុសត្រូវចំពោះច្បាប់ជាធរមាន ។
ដូចបានជម្រាបជូនខាងលើ សូមលោក លោកស្រី ម្ចាស់ប្រព័ន្ធផ្សព្វផ្សាយ អ្នកសារព័ត៌មានជាតិ និង អន្តរជាតិទាំងអស់យកចិត្តអនុវត្តឱ្យប្រសិទ្ធភាពចាប់ពីថ្ងៃជូនដំណឹងនេះតទៅ ៕
ចែករំលែកព័តមាននេះ