ខេត្តត្បូងឃ្មុំ ៖ ក្មេងប្រុស២នាក់ ក្នុងចំណោម៣នាក់ ដែលបានលង់ទឹកទន្លេមេគង្គ ត្រូវបានប្រទះឃើញសពអណ្តែតម្នាក់ហើយ កាលពីវេលាម៉ោង០៥ព្រឹកថ្ងៃទី២១ តុលា ២០១៥ ស្ថិតនៅចំណុចមុខកៀនជ្រៃ ស្រុកកៀនជ្រៃ ខេត្តត្បូងឃ្មុំ ។
ប្រភពបានឱ្យដឹងថា សាកសពក្មេងប្រុសខាងលើ ឈ្មោះម៉ាត់ ស៊ិលហ៊ីម អាយុ៩ឆ្នាំយ៉ា មានទីលំនៅភូមិទី៣ ឃុំកំពង់ទ្រាស ស្រុកក្រូចឆ្មារ ។ ដោយឡែកសពក្មេងប្រុសម្នាក់ទៀតឈ្មោះម៉ាត់ ទុលរ៉ុល អាយុ៧ឆ្នាំ មិនទាន់ឃើញសពនៅឡើយ ។
គួររំលឹកថា កាលពីវេលាម៉ោង៧យប់ថ្ងៃទី១៩ តុលា ២០១៥ ក្មេងប្រុស២នាក់ក្នុងចំណោម៣នាក់ ដែលបានលង់ទឹកទន្លេមេគង្គ ត្រង់ចំណុចកំពង់ដរកំពង់ទ្រាស ស្ថិតនៅភូមិទី៣ ឃុំកំពង់ទ្រាស ស្រុកក្រូចឆ្មារ នៅតែរកមិនទាន់ឃើញនៅឡើយទេ ។
លោកអនុសេនីយ៍ឯក អ៊ុក ពៅ អធិការរងនគរបាលស្រុកក្រូចឆ្មារបានឲ្យដឹងថា ដោយសារតែឪពុកម្តាយមិនបានប្រុងប្រយ័ត្ន ក្មេងប្រុសតូចៗ៣នាក់ មាន១-ឈ្មោះយ៉ា ម៉ាត់ទុលរ៉ុល អាយុ៧ឆ្នាំ, ២-ឈ្មោះ ម៉ាត់ ស៊ិលហ៊ីម អាយុ៩ឆ្នាំ និង៣-ឈ្មោះ កក សាង អាយុ៧ឆ្នាំ រស់នៅភូមិកើតហេតុទាំងអស់គ្នា បានដើរចេញពីផ្ទះរបស់ខ្លួនដោយបានបបួលគ្នាមកងូតទឹកទន្លេមេគង្គនៅកំពង់ដរកំពង់ទ្រាសកាលពីវេលាម៉ោង១១ និង៣០នាទីព្រឹកថ្ងៃខាងលើ ។
ក្នុងពេលដែលកំពុងងូតទឹកលេងនោះ ស្រាប់តែក្មេងប្រុសទី១ និងទី២ បានលង់ទឹកទន្លេ ឃើញបែបនេះក្មេងប្រុសទី៣បានស្ទុះឡើងគោកប្រញាប់រត់មកប្រាប់អ្នកភូមិនៅក្បែរនោះឲ្យនាំគ្នាចេញទៅជួយសង្គ្រោះអាយុជីវិត ។
ចែករំលែកព័តមាននេះ