តើអ្នកធ្លាប់ចំណាយពេលច្រើននៅផ្ទះដែរ ឬទេ ? ហើយអ្នកធ្លាប់មានផែនការបង្កើតថវិកាសម្រាប់ចំណាយក្នុងគ្រួសារដែរ ឬទេ ? អ្នកដឹងទេថា បច្ចុប្បន្នមិនប្រជាជននៅក្នុងសហរដ្ឋអាមេរិកបានចំណាយពេលជាច្រើននៅផ្ទះ ។ ជំងឺរាតត្បាតកូវីដ…
តើអ្នកធ្លាប់ចំណាយពេលច្រើននៅផ្ទះដែរ ឬទេ ? ហើយអ្នកធ្លាប់មានផែនការបង្កើតថវិកាសម្រាប់ចំណាយក្នុងគ្រួសារដែរ ឬទេ ? អ្នកដឹងទេថា បច្ចុប្បន្នមិនប្រជាជននៅក្នុងសហរដ្ឋអាមេរិកបានចំណាយពេលជាច្រើននៅផ្ទះ ។ ជំងឺរាតត្បាតកូវីដ ១៩ មិនត្រឹមតែធ្វើឱ្យមនុស្សត្រូវធ្វើការនៅផ្ទះប៉ុណ្ណោះទេ តែវាបានធ្វើឱ្យសាលារៀនត្រូវបានបិទ ធ្វើឱ្យមានការលុបចោលនៃដំណើរកម្សាន្តនានា ក៏ដូចជាការប្រជុំ និងការជួបជុំផ្សេងៗខាងក្រៅផ្ទះ និងជាពិសេសនោះវាបានធ្វើឱ្យមនុស្សចូលចិត្តញុំាអាហារនៅផ្ទះច្រើនជាងសពមួយដងដែល មនុស្សចូលចិត្តញុំាអាហារក្រៅផ្ទះ ។
យោងតាមការដកស្រង់អត្ថបទជាភាសាអង់គ្លេសមួយ នៅលើវេបសាយ Discover បានណែនាំវិធីសាស្ត្រចំនួន ៤ ដែលយើងគ្រប់គ្នាអាចអនុវត្តបាន ក្នុងកំឡុងជំងឺរាតត្បាតកូវីដ ១៩ ដែលវាបានធ្វើឱ្យមនុស្សទូទាំងពិភពលោកបានចំណាយពេលវេលានៅក្នុងផ្ទះ ច្រើនជាងការចេញក្រៅ ៖
ទី ១) ប្រៀបធៀបការចំណាយរបស់អ្នកមុនពេលមានកូវីដ ១៩ និងកំឡុងពេលមានកូវីដ ១៩ ៖
ជាការពិត ក្រោយពេលមានកូវីដ ១៩ មានមនុស្សជាច្រើនបានកត់សម្គាល់ឃើញថា ពួកគេមានការចំណាយតិចជាងមុនពេលមានកូវីដ ១៩ ។ ដូចនេះអ្នកចាប់ផ្តើមរំឮកទៅមើល ថាមុនកូវីដ ១៩ អ្នកចំណាយលើអ្វីខ្លះ ចុះកំឡុងពេលកូវីដ ១៩ អ្នកចំណាយអ្វីខ្លះ ? ប៉ុន្តែជាដំបូងអ្នកត្រូវរកឱ្យឃើញនូវថវិកាសរុបទាំងអស់ដែលអ្នកទុកសម្រាប់ចំណាយនៅក្នុងផ្ទះ (ចំណុចនេះចង់មានន័យថា ការចំណាយរួមក្នុងគ្រួសារអ្នកដែលមានស្វាមីប្តីប្រពន្ធ អ្នកនៅលីវក៏អាចប្រើវិធីនេះបានដែរ) ។ មួយវិញទៀតប្រសិនជាអ្នកមិនដែលបាន ចាប់អារម្មណ៍ឬរៀបចំចំនួនប៉ុន្មានក្នុងការចំណាយនៅក្នុងគ្រួសារនោះ សូមចាប់ផ្តើមឥឡូវនេះទាន់អ្នកកំពុងមានពេលនៅផ្ទះស្រាប់ ។ សូមជម្រាបថា ការកំណត់ថវិកាក្នុងការចំណាយក្នុងគ្រួសារ វាអាចជួយអ្នកមិនឱ្យចំណាយផ្តេសផ្តាស់ ឧទារហណ៍ថា អ្នកបានបែងចែកការចំណាយនានារួចមកហើយក្នុងមួយខែ ២៥០ ដុល្លារ (លោកអ្នកប្រាកដជាដឹងថា ក្នុងមួយខែៗអ្នកត្រូវចំណាយលើអ្វីខ្លះក្នុងផ្ទះ) ដូចនេះប្រសិនជាអ្នកប្រើប្រាស់លុយលើស នោះអ្នកអាចប្រាប់ខ្លួនឯងថា ឈប់ទិញហើយ លើសលុយហើយ ។ នៅពេលអ្នកធ្វើការប្រៀប ធៀបរវាងមុន និងកំឡុងពេលកូវីដ ១៩ អ្នកត្រូវសួរខ្លួនឯងថា បើសិនចប់កូវីដ ១៩ ត្រូវប្រើវិធីសាស្ត្រនេះបន្ត ឬត្រូវប្រើវិធីសាស្ត្រចាយច្រើនមុនកូវីដ ១៩ ។ អ្នកជំនាញបានណែនាំថា ប្រសិនជាអ្នកបានប្រៀធៀបការចំណាយមុននិងកំឡុងពេលកូវីដ ១៩ ហើយវាមិនបានថមថយក្នុងការចំណាយ នោះអ្នកត្រូវមានវិធីសាស្ត្រផ្សេងទៀតហើយ ដើម្បីកាត់បន្ថយការចំណាយតាមលទ្ធភាព ដែលអ្នកអាចធ្វើបាន អ្នករកឱ្យឃើញការចំណាយណាដែលមិនចាំបាច់ក្នុងកំឡុងពេលនេះ ។
ទី ២) សួរខ្លួនឯងថា តើទម្លាប់ចំណាយរបស់អ្នក ជះឥទ្ធិពលដល់សុភមង្គលរបស់អ្នកយ៉ាងដូចម្តេច ? ៖
អ្នកជំនាញបានណែនាំថា ប្រសិនជាមនុស្សរួចផុតពីជំងឺនេះ គ្រប់គ្នានៅតែអាចមានអនាគតវែងឆ្ងាយ និងផ្លូវដែលត្រូវដើរទៅមុខ ដូចនេះការរៀបផែនការថវិការចំណាយក្នុងគ្រួសារនេះ វានឹងមិនឥតប្រយោជន៍នោះទេ ព្រោះថា ទោះចប់ឬមិនចប់កូវីដ ១៩ ក៏អ្នកដឹងច្បាស់ថា ក្នុងមួយខែៗអ្នកត្រូវត្រៀមលុយប៉ុណ្ណាសម្រាប់ចំណាយក្នុងផ្ទះ ។ គួរបញ្ជាក់ផងដែរថា បច្ចុប្បន្នមានមនុស្សជាច្រើនបានចំអិនអាហាររបស់ពួកគេនៅផ្ទះ គឺច្រើនជាងមុនជំងឺរាតត្បាតកើតឡើងទៅទៀត (ប៉ុន្តែក៏នៅមានមនុស្សមួយចំនួនកម្ម៉ង់អាហារពីក្រៅមកញុំាដែរ) ។
អ្នកស្រី Rogin បាននិយាយថា ៖ «នៅពេលអ្នកចម្អិនអាហារនោះអ្នកនឹងអាចចំណាយច្រើនទៅលើគ្រឿងទេស និងត្រីសាច់ជាដើម ប៉ុន្តែវាចំណាយតិចជាងអ្វីដែលអ្នកចេញទៅញុំាខាងក្រៅផ្ទះ ហើយនៅពេលអ្នកញុំាអាហារនៅផ្ទះ អ្នកពិតជាទទួលបានភាពរីករាយ ជាមួយនឹងការអង្គុយជុំគ្នាក្នុងគ្រួសារ និងបានផ្តល់អាហារដែលមានសុខភាពទៀតផង»។ អ្នកស្រី Roginបាននិយាយថា ឧទាហរណ៍មួយទៀតគឺការធ្វើដំណើរ មានមនុស្សមួយចំនួនបានប្រាប់នាងថា ពួកគេពិតជានឹកការធ្វើដំណើររបស់ពួកគេណាស់ ប៉ុន្តែមានអ្នកខ្លះទៀតនិយាយថា ពួកគេសប្បាយចិត្ត នៅពេលដែលពួកគេមិនអាចធ្វើដំណើរទៅទីណាបាន ។ គ្រួសារខ្លះបាននិយាយថា ពួកគេអាចឃុំគ្រងចិត្តបានមិនបាច់ប្រញាប់ប្រញាលចង់ដើរលេងទេ ព្រោះពួកគេបានយល់អំពីអត្ថប្រយោជន៍និងពេលវេលាល្អៗ នៅផ្ទះជាមួយគ្រួសារ (សូមជម្រាបជូនផងដែរថា នៅសហរដ្ឋអាមេរិកផ្ទះនីមួយៗនៅឃ្លាតៗពីគ្នា និងមានទីធ្លាធំៗអាចឱ្យពួកគេកំសាន្តបាន) ។ អ្នកស្រីបានបន្តថា មិនថាអ្នកជួប និងការលំបាកនៃសាច់ប្រាក់ប៉ុណ្ណានោះទេ តែអ្នកត្រូវតែរៀបឱ្យបាននូវផែនការចំណាយ ផ្អែកលើថវិកាជាក់ស្តែង នៅពេលអ្នកនៅផ្ទះ នៅកំឡុងពេលនេះអ្នកត្រូវបង្វែរចំណុចការចំណាយ និងផ្តោតតែលើការចំណាយនៅផ្ទះបានហើយ អ្វីផ្សេងទៀតអ្នកកុំទាន់អាល់គិតគូ ។
ទី ៣) សន្សំប្រាក់ដែលអ្នកមិនបានចាយទាំងនោះ ដើម្បីឆ្ពោះទៅរកគោលដៅហិរញ្ញវត្ថុរបស់អ្នក ៖
Dawson និង Rogin បានណែនាំថា អ្នកត្រូវមានផែនការសន្សំប្រាក់ ដែលអ្នកធ្លាប់បានចំណាយខាងក្រៅផ្ទះមុនកូវីដ ១៩ រាតត្បាតនោះ ដាក់ចូលទៅក្នុងថវិការចំណាយក្នុងគ្រួសារ ហើយអ្នកត្រូវមានគោលដៅផងដែរថា ប្រាក់សន្សំលើសនោះអ្នកនឹងត្រូវយកទៅធ្វើអ្វី (បន្ទាប់ពីកាត់កងការចំណាយក្នុងផ្ទះរួចហើយ ប្រាក់លើសគួធ្វើអ្វីបន្ត) ។ លោកស្រី Roginបានណែនាំថា ប្រាក់លើសទាំងនោះអាច ដាក់សន្សំជាមួយ emergency fund ឬក៏ទុកសម្រាប់កូនៗ (ទិញការដូរ ឬទុកបង់ថ្លៃសាលាកូនៗ) ឬក៏អ្នកអាចសន្សំវាសម្រាប់វិស្សមកាល ឬដំណើរកម្សាន្តពេលណាមួយដែលឱកាសហុចឱ្យ ។ល។ វាអាស្រ័យលើអ្នកចង់ធ្វើអ្វីនៅពេលស្ថានភាពល្អប្រសើ ។ ប៉ុន្តែលោកស្រី Rogin បានលើកទឹកចិត្តឱ្យសន្សំប្រាក់ដែលបានមកពីការនៅផ្ទះនឹង ទុកសម្រាប់គ្រាមានអាសន្ន ឬការបង់សាលា និងទុកសម្រាប់ការចូលនិវត្តន៍ជាជាងចំណាយទៅលើដំណើរកម្សាន្ត ។
ទី ៤) ប្រាក់សន្សំពីការនៅផ្ទះរបស់អ្នក ក៏អាចជាប្រយោជន៍ឬជួយដល់អ្នកកំពុងខ្វះខាតផងដែរ ៖
ប្រសិនជាអ្នកកំពុងសន្សំប្រាក់ដោយការនៅផ្ទះ លោកស្រី Rogin ណែនាំថា អ្នកក៏អាចប្រើប្រាស់លុយសន្សំទាំងនោះខ្លះៗក្នុងការធ្វើការងារមនុស្សធម៌ក្នុងសង្គម និងមានវិធីសាស្ត្រជាច្រើនដែលអ្នកអាចធ្វើបានក្នុងការជួយមនុស្ស ។ មានអាជីវកម្មតូចៗជាច្រើនកំពុងជួបបញ្ហា មានអង្គការជាច្រើនដែលពុំមានថវិកាជំនួយ និងមនុស្សក្រីក្រជាច្រើនមិនមានប្រាក់ដើម្បីទិញអាហារ ដូចនេះប្រសិនជាអ្នកនៅមានលទ្ធភាពអ្នកគួរតែជួយដល់មនុស្សទាំងនោះខ្លះ។ ក្នុងគ្រាដ៏លំបាកនេះ មនុស្សជាច្រើនត្រូវការជំនួយ ហើយប្រសិនបើអ្នកធ្វើអំពើរមនុស្សធម៌ វានឹងធ្វើឱ្យចិត្តរបស់អ្នកមានអារម្មណ៍ល្អ ហើយជំនួយរបស់អ្នកពិតជាមានអត្ថន័យខ្លាំងណាស់ទៅលើមនុស្សដែលកំពុងត្រូវការជំនួយទាំងនេះ (ចែករំលែកតិចក្តី ច្រើនក្តី គឺជាទឹកចិត្តរបស់អ្នក) ៕ ប្រភព ៖Discover
ចែករំលែកព័តមាននេះ