ប្រទេសវៀតណាម ៖ អ្នកជំនាញបានលើកឡើងថា ការនាំចេញអង្កររបស់វៀតណាម ត្រូវបានគេមើលឃើញពីកំណើនដ៏វិជ្ជមានក្នុងអំឡុងត្រីមាសដំបូងនៃឆ្នាំ២០១៥ ប៉ុន្តែផលិតកម្មចាំបាច់ត្រូវកែប្រែហេដ្ឋារចនាសម្ព័ន្ធឡើងវិញ ជាមួយនឹងការបង្កើនគុណភាពនៃការធ្វើពាណិជ្ជកម្ម ក៏ដូចជាកេរ្តិ៍ឈ្មោះផងដែរ ។
ប្រភពឲ្យដឹងទៀតថា តម្រូវការសម្រាប់ទីផ្សារនាំចេញអង្ករជាប្រពៃណីរបស់វៀតណាម ត្រូវបានគេមើលឃើញពីការរើបឡើងវិញ ដូចជា ការចុះកិច្ចសន្យានាំចេញទៅប្រទេសហ្វ៊ីលីពីន ក្នុងចំនួន៤៥ម៉ឺនតោនជាដើម ។
អនុប្រធានសមាគមស្បៀងអាហារវៀតណាម លោក Huynh Minh Hue ថ្លែងថា ៖ «វៀតណាមបានចុះកិច្ចសន្យាពាណិជ្ជកម្មក្នុងការនាំចេញអង្ករ១,៣លានតោន និងធ្វើកិច្ចសន្យាទីផ្សារដែលមានតម្រូវការថ្នាក់កណ្តាលលើការនាំចេញអង្ករ១,៥លានតោនក្នុងរយៈពេល៦ខែ» ។
តាមរបាយការណ៍របស់ Vietnamplus បង្ហាញថា ៖ «អគ្គនាយករងក្រុមហ៊ុន Tien Giang Food លោក Le Thanh Khiem ថ្លែងថា វៀតណាមគួរតែផ្តោតលើការបង្កើនគុណភាពនៃអង្ករនាំចេញ ជាជាងបរិមាណដើម្បីបោះជំហានចូលទីផ្សារនាំចេញដែលមានទំហំទឹកប្រាក់ខ្ពស់ ដូចជា អឺរ៉ុប និងជប៉ុន ដែលស្ថិតក្នុងកៅអីមួយត្រូវគេស្គាល់ថា ជាតួអង្គមានតម្រូវការខ្ពស់ផ្នែកគុណភាពសម្រាប់ការនាំចេញអង្ករ» ។
អនុរដ្ឋមន្ត្រីឧស្សាហកម្ម និងពាណិជ្ជកម្ម លោក Tran Tuan Anh ថ្លែងថា ៖ «គុណភាពអង្ករនាំចេញរបស់វៀតណាមនៅតែមានក្តីរំពឹងលើទីផ្សារនាំចេញថ្នាក់កណ្តាល និងទីផ្សារប្រពៃណីដដែល ។ វិស័យកសិកម្មត្រូវការកែសម្រួលថ្មីនូវហេដ្ឋារចនាសម្ព័ន្ធផលិតកម្ម និងពាណិជ្ជកម្មលើវិស័យស្រូវអង្ករដើម្បីធ្វើឲ្យប្រសើរឡើងនូវគុណភាពផលិតផល និងការបង្កើតស្លាកយីហោមួយដែលមានកិត្តិនាម ។ សកម្មភាពទាំងនេះនឹងជួយដល់អ្នកផលិតអង្ករ និងពាណិជ្ជករក្នុងស្រុកអាចគេចផុតពីការខាតបង់ពេលតម្រូវការនាំចូលថយចុះ» ។
ចំណែកអនុប្រធាននាយកដ្ឋានរបៀប និងពាណិជ្ជកម្មផលិតផលកសិកម្ម បង្ហាញថា ៖ «វៀតណាមមានសហគ្រាសនាំចេញអង្ករកម្រិតខ្ពស់ និងមធ្យមច្រើនជាង២០០កន្លែង ប៉ុន្តែអង្ករវៀតណាមស្ថិតក្នុងកម្រិតទាប និងមធ្យមលើទីផ្សារពិភពលោក ។ ប្រទេសនេះបានសម្លឹងឃើញបរិមាណទាបក្នុងការនាំចេញអង្ករដែលមានគុណភាពខ្ពស់ផងដែរ»។
បន្ថែមលើនេះ វៀតណាមស្ថិតក្នុងចំណោមអ្នកនាំចេញអង្ករលំដាប់កំពូលទាំងបីលើពិភពលោក ។ វៀតណាមពុំបានសម្លឹងឃើញយីហោអង្ករជាតិរបស់ខ្លួនឡើយរហូតមកទល់ពេលនេះ ស្របពេលដែលថៃ និងឥណ្ឌា មានអង្ករដែលមានគុណភាពសម្រាប់នាំចេញជាច្រើន ជាមួយនឹងស្លាកយីហោជាតិប្រទេសខ្លួន ។
ជាងនេះទៅទៀត វៀតណាមមិនត្រូវបានជ្រើសរើសប្រភេទអង្ករផ្សេងៗសម្រាប់អភិវឌ្ឍន៍លំនឹងក្នុងរយៈពេលយូរខែឆ្នាំទេ ។ ប្រភេទអង្ករផ្សេងៗរបស់វៀតណាមត្រូវបានអភិវឌ្ឍន៍ក្នុងរយៈពេលខ្លី ក្រោយមកបានធ្វើឲ្យចុះខ្សោយកិត្តិនាមទៅវិញ ។ អង្ករវៀតណាមចាំបាច់ត្រូវប្រឈមមុខនឹងការប្រកួតប្រជែងខ្លាំងក្នុងផ្នែកគុណភាព ស្លាកយីហោ និងគូប្រជែងដ៏មានសក្តានុពលដូចជា ព្រះរាជាណាចក្រកម្ពុជា មីយ៉ាន់ម៉ា និងសហរដ្ឋអាមេរិកជាដើម ។
លោក Nguyen Duc Thanh អគ្គនាយកគ្រឹះស្ថានស្រាវជ្រាវ និងគោលនយោបាយសេដ្ឋកិច្ច (VEPR) បង្ហើបថា ៖ «វៀតណាមបានផ្តោតលើទីផ្សារងាយៗ ព្រមទាំងកាត់បន្ថយស្តង់ដាគុណភាពក្នុងសង្វាក់ផលិតកម្ម និងការនាំចេញ ។ ចំណែកគុណភាពអង្ករនាំចេញរបស់វៀតណាម នឹងត្រូវកាត់បន្ថយកាន់តែច្រើនឡើងលើទីផ្សារពិភពលោក» ។
នៅពេលការចុះកិច្ចព្រមព្រៀងពាណិជ្ជកម្មសេរីជាមួយដៃគូបរទេសចូលជាធរមាននៅថ្ងៃអនាគត ឧស្សាហកម្មអង្ករវៀតណាមនឹងគ្មានថាមពលក្នុងការផ្លាស់ប្តូរគុណភាពនៃការបង្កើនគុណប្រយោជន៍ពីកិច្ចព្រមព្រៀងនោះឡើយ ។
ហេតុដូច្នេះហើយវៀតណាមចាំបាច់ត្រូវកែប្រែហេដ្ឋារចនាសម្ព័ន្ធជាថ្មីឡើងវិញនៃការប្រកបជំនួញ និងផលិតកម្មអង្ករក្នុងពេលបច្ចុប្បន្ន ។ ការកែសម្រួលហេដ្ឋារចនាសម្ព័ន្ធថ្មីនេះអាចនាំមកនូវទិន្នផលអង្ករថយចុះ ប៉ុន្តែក៏មានការកើនឡើងខ្លាំងក្នុងផ្នែកតម្លៃ និងយីហោអង្ករវៀតណាមនាថ្ងៃអនាគតផងដែរ ។
នាយករដ្ឋមន្ត្រីវៀតណាមបានអនុម័តលើគម្រោងមួយស្តីពី «ការអភិវឌ្ឍយីហោអង្កររបស់វៀតណាមនៅឆ្នាំ២០២០-២០៣០» តទៅ ។ ផែនការនេះ វៀតណាមនឹងមានស្លាកយីហោមួយសម្រាប់២០% នៃអង្ករនាំចេញសរុបទាំងអស់របស់ខ្លួននៅឆ្នាំ២០២០ ហើយក៏ក្លាយជាផ្នែកមួយនៃការអូសទាញតម្លៃលើទីផ្សារពិភពលោកផងដែរ ដែលភាគរយនេះនឹងបង្កើនទៅដល់៥០% ក្នុងឆ្នាំ២០៣០ ។
យោងតាមរបាយការណ៍របស់ VFA វៀតណាមឱ្យដឹងថា វៀតណាមបាននាំចេញអង្ករចំនួន៤,៣លានតោន ដែលមានទំហំទឹកប្រាក់១,៩៥ប៊ីលានដុល្លារ គិតរហូតមកដល់ខែកញ្ញា ២០១៥ ដែលថយចុះ៩,១២%ក្នុងផ្នែកបរិមាណ និង១៤,៣% នៃតម្លៃធៀបនឹងអំឡុងពេលដូចគ្នាកាលពីឆ្នាំទៅ ៕
ចែករំលែកព័តមាននេះ