លួចគាស់ផ្នូរយកសពទៅរៀបការនៅចិន
ប៉ូលិសខេត្តឆានស៊ី ភាគខាងកើតឆៀងខាងជើង ប្រទេសចិន បានចាប់ខ្លួនបុរសសង្ស័យ៣នាក់ ពីបទលួចជីកផ្នូរយកសពទៅលក់ធ្វើជាកូនក្រមុំរៀបការជាមួយបុរសដែលស្លា.ប់ទាំងនៅលីវ ហៅថាពិធី «រៀបការខ្មោច»
ប៉ូលិសខេត្តឆានស៊ី ភាគខាងកើតឆៀងខាងជើង ប្រទេសចិន បានចាប់ខ្លួនបុរសសង្ស័យ៣នាក់ ពីបទលួចជីកផ្នូរយកសពទៅលក់ធ្វើជាកូនក្រមុំរៀបការជាមួយបុរសដែលស្លាប់ទាំងនៅលីវ ហៅថាពិធី «រៀបការខ្មោច» តាមប្រពៃណីទំនៀមទំលាប់របស់អ្នកស្រុក ។
ទីភ្នាក់ងារព័ត៌មានស៊ីនហួរបស់ចិនបានផ្សាយដោយយោងតាមការបង្ហើបឱ្យដឹងរបស់មេខ្លោងក្រុមជនល្មើសអាយុ៧២ឆ្នាំ ថាពួកគេបានទទួលដំណឹងពីការស្លាប់របស់ស្ត្រីវ័យក្មេងម្នាក់នៅជនបទក្នុងស្រុករុយឈើង ខេត្តឆានស៊ី ។ ដូច្នេះហើយពួកគេលួចជីកយកសពទៅលក់ជូនសាច់ញាតិរបស់បុរសដែលស្លាប់មិនទាន់រៀបការ ។
មេខ្លោងនិងបក្សពួក២នាក់នោះក្លែងធ្វើជាសាច់ញាតិរបស់នារីដែលស្លាប់ ហើយចរចាលក់សពដល់អតិថិជនក្នុងតម្លៃ២៥.០០០យាន់ ឬ៣៨៥០ដុល្លារ ។ នៅពេលពួកគេកំពុងចាប់ផ្តើមជីកផ្នូរកាលពីពេល ថ្មីៗកន្លងមក ស្រាប់តែអ្នកស្រុកជាច្រើននាក់ឃើញ ក៏ប្តឹងប៉ូលិសឱ្យទៅចាប់ខ្លួនពួកគេ ។
លោកសឺ ឃ័រជៀន សាស្ត្រាចារ្យផ្នែកអក្សរសាស្ត្រ និងវប្បធម៌នៅមហាវិទ្យាល័យ «ណានជីង ន័រម៉ល» និយាយថា ប្រពៃណីទំនៀមទម្លាប់រៀបការក្រោយពេលស្លាប់នៅជនបទគឺដោយសារគេជឿថា រៀបការឱ្យអ្នកស្លាប់ទាំងនៅលីវនឹងជួយកម្ចាត់គ្រោះអន្តរាយដែលកើតពីការស្លាប់ក្នុងវ័យកំលោះ-ក្រមុំនោះ ។
ពិធីរៀបការខ្មោច គឺយកសពរបស់បុរស ឬស្ត្រីទៅកប់នៅក្នុងរណ្តៅតែមួយ ដោយមានពិធីគោះជួង និងទូងស្គរ ក្រោយមកប្រារព្ធពិធីបុណ្យសពដល់អ្នកទាំង២ជាថ្មី ។ ក្នុងករណីខ្លះពិធី រៀបការខ្មោចប្រារព្ធឡើងរវាងអ្នកស្លាប់ និងគូដណ្តឹងដែលនៅរស់ស្របតាមពេលវេលាដែលកំណត់ពេលនៅរស់ ៕
ចែករំលែកព័តមាននេះ