ប្រទេស​ជប៉ុន ៖ ប្រភព​ពី​កាសែត South China Morning Post បាន​ចេញផ្សាយ​កាលពី​ពេល​ថ្មី​ៗ​នេះ​ថា សាលា​ប៉ូលិស​ជប៉ុន​ស្ថិត​ក្នុង​ខេត្ត​ហ្វូ​គូ​ស៊ី​ម៉ា (Fukushima) បាន​ទាក់ទាញ​ការ​ពិភាក្សា​បែប​កំប្លែង​ពី​អ្នក​ប្រើប្រាស់​បណ្តាញ​សង្គម​ក្នុង​ប្រទេស​ចិន ដោយសារ​សាលា​បាន​បើក​វគ្គ​បណ្តុះបណ្តាល​ផាត់មុខ​ដល់​សិស្ស​ប្រុស ដើម្បី​ឱ្យ​ពួក​គេ​ចេះ​ផាត់មុខ​ឱ្យ​បាន​ស្រស់​ស្អាត ទើប​បង្កើត​ទំនុកចិត្ត​ពេល​ចេញ​បំពេញការងារ​ក្នុង​សហគមន៍​។

សាលា​ប៉ូលិស Fukushimaken Keisatsugakko បាន​ផ្តល់​វគ្គ​បណ្តុះបណ្តាល​សម្រាប់​សិស្ស​ប្រុស​ចំនួន​៦០​នាក់ ដែល​ជិត​បញ្ចប់​ការ​សិក្សា រួម​ទាំង​មន្ត្រី​ប្រុស​ជា​ច្រើន​នាក់​ផ្សេង​ទៀត​ផង​ដែរ​។ សាលា​បាន​សហការ​ជាមួយ​អ្នកជំនាញ​ផាត់មុខ​ពី​ក្រុមហ៊ុន​គ្រឿងសម្អាង​ជប៉ុន​ដ៏​ល្បី «Shiseido»​។ អ្នកជំនាញ​ទាំងនេះ​មិន​ត្រឹមតែ​ផ្តល់​ការ​ណែនាំ​អំពី​ការ​ផាត់មុខ​ទូទៅ​ប៉ុណ្ណោះ​ទេ ប៉ុន្តែ​ពួក​គេ​ថែម​ទាំង​ផ្តល់​ដំបូន្មាន​ផ្ទាល់ខ្លួន និង​ការ​ផាត់មុខ​តម្រូវ​តាម​ទម្រង់ និង​ស្បែក​មុខ​របស់​សិក្ខាកាម​ផង​ដែរ​។

ពេញ​មួយ​វគ្គ​នេះ គ្រូ​ជំនាញ​បាន​បង្ហាត់បង្រៀន​ពី​បច្ចេកទេស​ផាត់​មុខជា​មូលដ្ឋាន រួម​ទាំង​ការ​ផ្តល់​សំណើម​ស្បែក លាបម្សៅ​តម្រូវ​ស្បែក ការ​បិទ​ម៉ាស់ ការ​កាត់ និង​គូស​ចិញ្ចើម ព្រមទាំង​ការ​ធ្វើ​សក់​ជាដើម​។ គ្រូ​ជំនាញ​មើលឃើញ​ថា សិស្ស​ប្រុស​ជា​ច្រើន​នាក់ ដែល​មិន​ទម្លាប់​ធ្វើការ​ផាត់មុខ​បាន​រក​ឃើញ​ថា ពួក​គេ​ប្រឈម​មុខ​នឹង​បញ្ហា​ជ្រើសរើស​គ្រឿងសំអាង​ខុស​។ អ្នកខ្លះ​មិន​ស្គាល់​ឧបករណ៍​នេះ ត្រូវ​ប្រើប្រាស់​កន្លែង​ណា​នៃ​ផ្ទៃមុខ​ថែម​ទៀត​ផង​។ ដោយ​ទទួលស្គាល់​ពី​សារៈសំខាន់​នៃ​រូបរាង​ស្រស់​ស្អាត និង​ប្រកបដោយ​វិជ្ជាជីវៈ ពិសេស​ដោយសារ​មន្ត្រី​ប៉ូលិស​ចូលរួម​ជា​ញឹកញាប់​ជាមួយ​សមាជិក​ផ្សេង​ៗ​នៃ​សហគមន៍ ទើប​សាលា​មាន​គោលបំណង​ជំរុញ​ឱ្យ​មាន​ចំណាប់អារម្មណ៍​វិជ្ជមាន​លើ​ការ​ផាត់មុខ​ឱ្យ​បាន​សមសួន ដើម្បី​បង្កើត​ទំនុកចិត្ត​ពេល​បំពេញការងារ​។

លោក តា​កា​ស៊ី ស៊ូ​ហ្គី​រ៉ា (Takeshi Sugiura) នាយករង​សាលា​ប៉ូលិស Fukushimaken Keisatsugakko បាន​បញ្ជាក់​ក្នុង​បទ​សម្ភាសន៍​ជាមួយ​ទូរទស្សន៍​ក្នុងស្រុក​យ៉ាង​ដូច្នេះ​ថា «​យើង​ចង់​រំលឹក​សិស្ស​ប្រុស​ទាំងអស់​ថា​ក្នុង​នាម​ជា​សមាជិក​នៃ​សង្គម និង​ជា​មន្ត្រី​ប៉ូលិស​នា​ពេល​អនាគត ការ​រក្សា​រូបរាង​ឱ្យ​បាន​ត្រឹមត្រូវ​គឺជា​រឿង​ដ៏​សំខាន់​»​។

សូម​ជម្រាប​ជូន​ថា វា​ជា​ប្រពៃណី​ទៅ​ហើយ ដែល​សាលា​ប៉ូលិស​ជប៉ុន​បាន​ប្រមូលផ្តុំ​ការ​បណ្តុះបណ្តាល​ជា​ចម្បង​លើ​ការ​អប់រំ​ផ្នែក​ច្បាប់ និង​ការ​រៀបចំ​រូបរាង​កាយ​ឱ្យ​បាន​ម៉ត់ចត់​។ ការ​ដាក់​ឱ្យ​ប្រើប្រាស់​នូវ​គំនិត​ផ្តួចផ្តើម​បែប​នេះ តំណាង​ការ​ធ្វើ​ឱ្យ​ប្រសើរ​ឡើង​នូវ​ទំនើប​កម្ម ចំពោះ​ប្រព័ន្ធ​បណ្តុះបណ្តាល​របស់​សាលា ដោយ​ផ្តល់​ឱ្យ​អនាគត​មន្ត្រី​ប៉ូលិស​នូវ​ជំនាញ​សំខាន់​ៗ​សម្រាប់​ការ​ចូលរួម​សហគមន៍​ដោយ​សមរម្យ​។

មិនមែន​មាន​តែ​សាស​ប៉ូលិស Fukushimaken Keisatsugakko មួយ​ប៉ុណ្ណោះ​ទេ ដែល​រៀបចំ​បែប​នេះ​។ សាលា​ប៉ូលិស​មួយ​ផ្សេង​ទៀត​នៅ​ខេត្ត​យ៉ា​ម៉ា​ហ្គឹ​ឈី (Yamaguchi) ក៏​បាន​អនុវត្ត​កម្មវិធី​ស្រ​ដៀង​គ្នា​នេះ​ផង​ដែរ សូ​ម្បី​តែ​ចាប់ផ្តើម​ជាមួយនឹង​មូលដ្ឋាន​គ្រឹះ​នៃ​ការ​បង្រៀន​សិស្ស​ប្រុស​ពី​របៀប​សម្អាត​ផ្ទៃមុខ​របស់​ពួក​គេ​ឱ្យ​បាន​ត្រឹមត្រូវ​ថែម​ទៀត​ផង​។ វា​អាច​ជា​រឿង​ធម្មតា​សម្រាប់​ប្រជាជន​ជប៉ុន ប៉ុន្តែ​សម្រាប់​វគ្គ​សិក្សា​ទាំងនេះ បាន​បង្កើត​ឱ្យ​មានការ​បញ្ចេញមតិ​បែប​កំប្លែង​ជា​ច្រើន​នៅ​លើ​ប្រព័ន្ធ​ផ្សព្វផ្សាយ​សង្គម​ចិន​៕ ប្រភព ៖ South China Morning Post