ខេត្តស្វាយរៀង ៖ អាជ្ញាធរខេត្តស្នើសុំគោលការណ៍ក្រសួងសាធារណការ និងដឹកជញ្ជូន ចុះត្រួតពិនិត្យលក្ខណៈបច្ចេកទេសយានយន្តដល់ខេត្ត ក្រោយមានការរឹតបន្តឹងច្បាប់ចរាចរណ៍ផ្លូវគោករបស់សមត្ថកិច្ចនគបាលចរាចរណ៍ និងការប្រឈមក្នុងការផាកពិន័យ និងប្រឈមការគ្រោះថ្នាក់ចារចរណ៍យ៉ាងខ្លាំងបណ្តាលមកពីអ្នកបើកបររថយន្តដឹកកម្មករ កម្មកានីរោងចក្រ សហគ្រាស និងរថយន្តដឹកទំនិញ រថយន្តតាមផ្ទះដែលមិនព្រមយករថយន្តទៅឈៀកនោះ ។
ដោយពួកគេបានត្អូញត្អែរថា ទីតាំងពិនិត្យលក្ខណៈបច្ចេកទេសយានយន្តនៅឆ្ងាយ គឺមានតែខេត្តកំពង់ចាម និងរាជធានីភ្នំពេញ ។ អ្នកមានរថយន្តសំណូមពរសុំឲ្យក្រសួងសាធារណការ និងដឹកជញ្ជូន ធ្វើប្រតិភូកម្មផ្តល់ឧបករណ៍សម្រាប់ត្រួតពិនិត្យបច្ចេកទេសយានយន្តមកតាមមន្ទីរសាធារណការ និងដឹកជញ្ជូនខេត្ត ជាអ្នកផ្តល់សេវាត្រួតពិនិត្យលក្ខណៈបច្ចេកទេសផ្ទាល់ ងាយស្រួលម្ចាស់យានយន្តយករថយន្តមកឈៀកកុំឲ្យបះពាល់ផលប្រយោជន៍ ដើម្បីឲ្យស្របតាមប្រសាសន៍ដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដែលបានផ្តល់អនុសាសន៍ថា ត្រូវបង្ខិតសេវាសាធារណៈឲ្យនៅជិតប្រជាពលរដ្ឋ ។ ការតវ៉ានេះបានកើតឡើងកាលពីរវេលាម៉ោង៣រសៀលថ្ងៃទី២០ តុលា ២០១៥ នៅក្រុងបាវិត ។
ទាក់ទិនទៅនឹងករណីខាងលើនេះដែរ លោក ជៀង អំ អភិបាលខេត្ត បានលើកសំណើជូនលោករដ្ឋមន្ត្រីក្រសួងសាធារណការ និងដឹកជញ្ជូន ស្នើសុំគោលការណ៍ចុះត្រួតពិនិត្យលក្ខណៈបច្ចេកទេសយានយន្យ(ឈៀក) និងចេញវិញ្ញាបនបត្រជូនរថយន្តដឹកកម្មករក្នុងខេត្តស្វាយរៀងរួចមកហើយកាលពីថ្ងៃទី៥ តុលា ២០១៥ ។
លោក ជៀង អំ បានបញ្ជាក់ថា ខេត្តស្វាយរៀងមានតំបន់សេដ្ដកិច្ចពិសេសចំនួន៨ ក្នុងនោះកំពុងដំណើការចំនួន៤ និងមានរោងចក្រ សហគ្រាស គ្រឹះស្ថានផ្សេងៗ សរុបចំនួន១២១កន្លែង មានកម្មករ កម្មការិនីបម្រើការងារសរុប៤៥.២២៧នាក់ រថយន្តដឹកកម្មករដែលបម្រើការដល់ខ្សែសង្វាក់ផលិតផលរោងចក្រចាប់ពីថ្ងៃចន្ទដល់ថ្ងៃសៅរ៍មានចំនួន៥៣៦គ្រឿង គឺគ្មានវិញ្ញាបនបត្រត្រួតពិនិត្យលក្ខណៈបច្ចេកទេស រថយន្តដែលបង្កឲ្យមានគ្រោះថ្នាក់ចរាចរណ៍ជាញឹកញាប់ ។ អាជ្ញាធរខេត្តបានបង្កើតក្រុមការងារដែលមានស្ថាប័នពាក់ព័ន្ធ ពិសេសមន្ទីរសាធារណការ និងដឹងជញ្ជូនខេត្តបានចុះជាប្រចាំ តែបញ្ហាប្រឈម គឺរថយន្តទាំងអស់មិនអាចធ្វើដំណើទៅរាជធានីភ្នំពេញ ឬខេត្តផ្សេងៗ ដើម្បីត្រួតពិនិត្យលក្ខណៈបច្ចេកទេសរថយន្តបានទេ ។
អំឡុងពេលក្រុមការងារចុះផ្សព្វផ្សាយ និងរឹតបន្តឹងការអនុវត្តច្បាប់ចរាចរណ៍ផ្លូវគោក អ្នកបើកបររថយន្តសំណូមពរឲ្យមានស្ថានីយត្រួតពិនិត្យលក្ខណៈបច្ចេកទេសយានយន្តនៅនឹងកន្លែង ព្រោះពួកគាត់មិនមានពេលវេលាទៅរាជធានីភ្នំពេញ ឬខេត្តផ្សេងៗទេ ។ ចំពោះបញ្ហាប្រឈមនេះនឹងកាន់តែមានភាពធ្ងន់ធ្ងរនៅពេលដែលតំបន់សេដ្ឋកិច្ចបួនផ្សេងទៀតបើកឲ្យដំណើរការ ពិសេសការពង្រឹងការអនុវត្តច្បាប់ចរាចរណ៍ផ្លូវគោកនៅដើមឆ្នាំ២០១៦ខាងមុខនេះ ដូច្នេះសូមលោករដ្ឋមន្ត្រីមេត្តាចុះពិនិត្យលក្ខណៈបច្ចេកទេសយានយន្តដល់កន្លែងឲ្យបានឆាប់ដើម្បីបញ្ចៀសការគ្រោះថ្នាក់បចរាចរណ៍ និងការប្រឈមនានា ។
ជុំវិញការផាកពិន័យរថយន្តផុតកំណត់ និងគ្មានឈៀកនេះដែរ ក្រុមអាជីវកររថយន្តដឹកទំនិញ បានឲ្យដឹងថា ពួកគាត់ឆ្ងល់ចំពោះសមត្ថកិច្ចនគបាលចរាចរណ៍ចាប់ផាកពិន័យរថយន្តផុតកំណត់ឈៀកនេះ តើយកប្រាក់ផាកពិន័យទៅណា បើគ្មានមន្ត្រីមន្ទីរសាធារណការ និងដឹកជញ្ជូន ចូលរួមផង ជាពិសេសការចាប់ផាកពិន័យនៅពេលរដូវបុណ្យភ្ជុំបិណ្ឌ នគបាលចរាចរណ៍ខេត្តព្រៃវែង បានចាប់ផាកពិន័យឈៀកយកប្រាក់ចូលហោប៉ៅ ឬបង់ចូលថវិកាជាតិ?
មន្ត្រីមន្ទីរសាធារណការ និងដឹកជញ្ជូនខេត្តម្នាក់សុំមិនបញ្ចេញឈ្មោះ បានឲ្យដឹងថា ការចាប់ផាកពិន័យឈៀកនេះ គឺមានតែមន្ត្រីជំនាញមន្ទីរសាធារណការនិងដឹកជញ្ជូនខេត្តទេ បើមន្ត្រីនគរបាលធ្វើតែឯង គឺមិនត្រឹមត្រូវតាមនីតិវិធីឡើយ ៕
ចែករំលែកព័តមាននេះ