ខេត្តបន្ទាយមានជ័យ ៖ បុរសម្នាក់គ្មានប្រពន្ធ-កូន ប្រកបរបរចែវទូកនៅក្នុងអូរព្រំដែនចម្លងអ្នកទៅធ្វើការនៅប្រទេសថៃ ទៅព្រឹកមកល្ងាច ត្រូវបានគេប្រទះឃើញស្លាប់នៅក្នុងទឹកអូរព្រំដែនកម្ពុជា-ថៃ ស្ថិតក្នុងភូមិសន្តិភាព ឃុំទួលពង្រ ស្រុកម៉ាឡៃ ខេត្តបន្ទាយមានជ័យ កាលពីវេលាម៉ោង៨ព្រឹក ថ្ងៃទី២០ តុលា ២០១៥ ។
លោកអនុសេនីយ៍ឯក ឃុត ចាន់ហេង អធិការរងនគរបាលស្រុកម៉ាឡៃ បានឲ្យដឹងថា ជនរងគ្រោះត្រូវបានគេស្គាល់ថាឈ្មោះ ឆាំ ភេទប្រុស អាយុ៤១ឆ្នាំ ស្នាក់នៅភូមិកើតហេតុ ។ បើតាមការឲ្យដឹងពីលោកមេភូមិសន្តិភាពនិយាយថា បុរសរូបនេះមកស្នាក់នៅទីនោះរយៈពេល២ឆ្នាំមកហើយ ដោយសុំខ្ទមប្រជាពលរដ្ឋដែលសង់លើទឹកអូរព្រំដែនស្នាក់នៅ ហើយគាត់ប្រកបរបរចែវទូកក្នុងអូរព្រំដែនចម្លងប្រជាពលរដ្ឋខ្មែរដែលទៅធ្វើការនៅប្រទេសថៃ ដោយទៅព្រឹកមកវិញល្ងាចជារៀងរាល់ថ្ងៃដើម្បីចិញ្ចឹមជីវិត ហើយម្យ៉ាងវិញទៀតបុរសនេះតែងតែផឹកស្រាជាប្រចាំ ។
លោកអធិការរងបានបញ្ជាក់ទៀតថា តាមការធ្វើកោសល្យវិច្ច័យពិនិត្យឃើញថា ជនរងគ្រោះមិនមានស្លាកស្នាមអ្វីដែលទាក់ទងទៅនឹងអំពើមនុស្សឃាតនោះទេ តាមការសន្និដ្ឋានសង្ស័យជនរងគ្រោះស្រវឹងស្រា ដើរដួលក្នុងទឹកអូរខណៈពេលដែលគាត់មកដេកលើខ្ទមដែលសង់លើទឹកអូរដោយគ្មាននរណាដឹងក៏លង់ទឹកស្លាប់ ។
សាកសពត្រូវបានសមត្ថកិច្ចប្រគល់ឲ្យម្ចាស់ខ្ទមឈ្មោះ សៀ យ៉េត ភេទស្រី អាយុ៤៩ឆ្នាំ ដើម្បីរៀបចំធ្វើបុណ្យតាមប្រពៃណី ក្រោយពីធ្វើការពិនិត្យរួច ៕
ចែករំលែកព័តមាននេះ