រាជធានីភ្នំពេញ៖ រដ្ឋបាលខណ្ឌមានជ័យ នាល្ងាចថ្ងៃទី២ ខែឧសភា ឆ្នាំ២០២១នេះ បានសេចក្តីប្រកាសព័ត៌មាន ជាសាធារណៈមួយ ជូនដំណឹងដល់បងប្អូនសប្បុរសជន និងអង្គការ សមាគមនានាទាំងអស់…
រាជធានីភ្នំពេញ៖ រដ្ឋបាលខណ្ឌមានជ័យ នាល្ងាចថ្ងៃទី២ ខែឧសភា ឆ្នាំ២០២១នេះ បានសេចក្តីប្រកាសព័ត៌មាន ជាសាធារណៈមួយ ជូនដំណឹងដល់បងប្អូនសប្បុរសជន និងអង្គការ សមាគមនានាទាំងអស់ ដែលមានបំណងយកអំណោយចែកជូនដល់បងប្អូនពលរដ្ឋ ដែលជាប់ក្នុងតំបន់ក្រហម និងតំបន់លឿងទុំ ក្នុងភូមិសាស្ត្រខណ្ឌមានជ័យ រាជធានីភ្នំពេញ សូមទាក់ទងមកអាជ្ញាធរ ដើម្បីរៀបចំលក្ខណៈសម្បត្តិ ក្នុងការចុះចែកជូនអោយមានរបៀបរៀបរយ ជៀសវៀងការចុះចែកដោយខ្លួនឯង បង្កអោយមានការប្រមូលផ្តុំមនុស្សច្រើន។
សេចក្តីប្រកាសព័ត៌មានបែបនេះ ធ្វើឡើង បន្ទាប់ពីនៅវេលាម៉ោង១២ថ្ងៃត្រង់ទី២ ខែឧសភា ឆ្នាំ២០២១ មានអង្គការមួយឈ្មោះ « អង្គការតុកកែញញឹមកម្ពុជា » បាននាំយកអំណោយមួយចំនួន ចែកជូនដល់បងប្អូន ស្ថិតក្នុងភូមិភ្នាត សង្កាត់ស្ទឹងមានជ័យ២ ខណ្ឌមានជ័យ ដែលជាតំបន់ក្រហម កំពុងធ្វើការបិទខ្ទប់។ ការនាំយកអំណោយចែកជូននោះ ដោយពុំបានសុំការសហការជាមួយអាជ្ញាធរមូលដ្ឋាម មានមេភូមិ ចៅសង្កាត់ ឬថ្នាក់ខណ្ឌឡើយ ជាហេតុធ្វើអោយបងប្អូនពលរដ្ឋជាង ១០០គ្រួសារ ដែលបានទៅទទួលអំណោយពីអង្គការនោះ បានប្រមូលផ្តុំគ្នាឈរតម្រង់ជួរគ្នាយ៉ាងរដឹក ដើម្បីរង់ចាំទទួលអំណោយ ដោយគិតថា ជាការផ្តល់អោយពីសំណាក់រដ្ឋាភិបាលសារជាថ្មីម្តងទៀត ខណៈដែលពលរដ្ឋនៅតំបន់នោះ ប្រមាណ ៨០ភាគរយ គឺធ្លាប់ទទួលបានអំណោយកាលពីពេលថ្មីៗនេះ។
បាតុភាព ចុះនាំយកអំណោយចែកជូន ដោយមិនសហការជាមួយអាជ្ញាធរមូលដ្ឋានខាងលើ ធ្វើអោយពលរដ្ឋមានការប្រមូលផ្តុំគ្នា ក្នុងចំនួនមនុស្សច្រើន បង្កជាហនិភ័យខ្ពស់ក្នុងការរីករាលដាលឆ្លង នៃជម្ងឺកូវីដ១៩ ពិសេសនោះ គឺធ្វើអោយបងប្អូនពលរដ្ឋ យល់ច្រលំថា ជាអំណោយថ្មីរបស់រាជរដ្ឋភិបាលក្នុងការចែកជូន ម្យ៉ាងប្រសិនក្នុងករណីចែកជូនមិនបានគ្រប់ៗគ្នាទៀតនោះ ធ្វើអោយពួកគាត់កើតនូវចិត្តខឹងសម្បាជាមួយអាជ្ញាធរ ថាផ្តល់អំណោយជូនមិនបានគ្រប់គ្នា។
ជុំវិញបាតុភាពខាងលើនេះ បន្ទាប់ពីមានការប្រមូលផ្តុំ ក្នុងចំនួនមនុស្សប្រមាណ ២០០នាក់រួចមក អាជ្ញាធរខណ្ឌមានជ័យ ដឹកនាំដោយលោកឌី រ័ត្នខេមរុណ បានចុះសម្របសម្រួល និងពន្យល់ណែនាំដល់បងប្អូនពលរដ្ឋ កុំមានការយល់ច្រលំចំពោះអំណោយខាងលើ និងសូមចូលតាមលំនៅឋានរៀងៗខ្លួន ជៀសវៀងការផ្តុំគ្នា អាចមានការឆ្លងកាន់តែខ្លាំង នៃជំងឺកូវីដ។
ក្រោយទទួលបានការណែនាំហើយនោះ បងប្អូនពលរដ្ឋ ក៏នាំគ្នា ចូលតាមលំនៅឋានរៀងៗខ្លួនអស់តែម្តង ។
ទន្ទឹមនឹងនោះ អាជ្ញាធរខណ្ឌ បានណែនាំដល់លោកមេភូមិ អោយចុះស្រង់ស្ថិតិពលរដ្ឋក្នុងភូមិរបស់ខ្លួន អោយបានគ្រប់ៗគ្នា ពិសេសបងប្អូនពលរដ្ឋក្រីក្រ កម្មករកម្មការិនីរោងចក្រ អ្នកដែលមានកម្រិតជីវភាពខ្វះខាត ដើម្បីអាជ្ញាធរមូលដ្ឋាន ធ្វើការនាំយកអំណោយរដ្ឋាភិបាល ចែកជូនពួកគាត់ជាអាទិ៍ភាព និងបន្តចែកបងប្អូនពលរដ្ឋផ្សេងទៀត តាមក្រោយ អោយទទួលបានគ្រប់ៗគ្នា។
ក្នុងនោះដែរ ប្រសិនបើបងប្អូនពលរដ្ឋ ធ្លាប់ទទួលបានហើយ ក៏ប៉ុន្តែអំណោយដែលបានចែកជូន គឺទទួលទានបរិភោគអស់ ដូច្នោះហើយសូមបងប្អូន ទាក់ទងជាមួយលោកមេភូមិ ដើម្បីអោយមេភូមិបញ្ចូនឈ្មោះ និងចំនួនច្បាស់លាស់អំពីកង្វះខាតស្បៀងអាហាររបស់បងប្អូន ងាយនឹងអាជ្ញាធរ ធ្វើការកំណត់ថ្ងៃ និងស្បៀងអាហារ ដែលជាអំណោយរដ្ឋាភិបាល អោយបានគ្រប់គ្រាន់ ក្នុងការយកទៅចែកជូនដល់បងប្អូន ដែលកំពុងខ្វះខាត អោយទទួលបានគ្រប់ៗគ្នាតែម្តង៕ លីហេង
ចែករំលែកព័តមាននេះ