ខេត្តប៉ៃលិន ៖ កាលពីវេលាម៉ោង០៨ និង៣០នាទីព្រឹកថ្ងៃទី១៩ តុលា ២០១៥ កន្លងទៅនេះ លោកឯល ប៉ែត អាយុ៤៨ឆ្នាំ ជាប្រធានផ្នែកសន្តិសុខពន្ធនាគារខេត្ត រស់នៅភូមិអូរច្រាកណ្តាល សង្កាត់ទួលល្វា ក្រុងប៉ៃលិន បានដាក់ពាក្យចូលទៅលោកជុំ សែនសទ្ធា ព្រះរាជអាជ្ញាអមសាលាដំបូងខេត្ត ប្តឹងលោកនៅ ធឿង អាយុ៤៩ឆ្នាំ រស់នៅភូមិអូរតាប្រាង សង្កាត់ប៉ៃលិន ក្រុងប៉ៃលិន ជាប្រធានពន្ធនាគារខេត្តប៉ៃលិន ។
បើតាមសម្តីលោកឯល ប៉ែត បានអានក្នុងលិខិតបញ្ជាក់ថា បញ្ហាដែលលោកដាក់ពាក្យប្តឹងទៅតុលាការខេត្ត ទី១-ពីបទហិង្សា ដោយចេតនានៅពន្ធនាគារចាស់កន្លែងរោងកុន ដោយធ្វើទៅលើរូបគេយ៉ាងព្រៃផ្សៃបំផុត បានហក់ទៅទះកំផ្លៀងយ៉ាងខ្លាំង ធ្វើឱ្យបែកឈាមហូរចេញពីមាត់ រួចក៏ដួលទៅលើឥដ្ឋការ៉ូ រួចយកជង្គង់សង្កត់ទៅលើរូបគេដោយស្រែកបញ្ជាឱ្យមន្ត្រីថ្មីយកខ្នោះទៅដាក់ដៃគេទៀតកាលពីវេលាម៉ោង៧ និង៣៩នាទីយប់ថ្ងៃទី០២ មីនា ២០១៤ កន្លងទៅ ។
ក្នុងលិខិតបញ្ជាក់ទៀតថា សាក្សីទី១-លោកសរ សុជាតិ ជាប្រធានផ្នែកសុខាភិបាលពន្ធនាគារខេត្តបានឃើញ ទី២-លោកស៊ិន ខឿន ជា ប្រធានការិយាល័យប្រតិបត្តិពន្ធនាគារខេត្ត ទី៣-លោកសុខ សារូ ជាអនុប្រធានពន្ធនាគារខេត្ត ។
លោកបន្តទៀតថា បញ្ហាទី២-ពីបទប្រមាថបាញ់បំបែកក្បាលចោលជាសាធារណៈនៅមុខជាងសំណង់ និងអ្នកទោសជាច្រើននាក់ ដែលប្រព្រឹត្តនៅកន្លែងគុកថ្មីកាលពីវេលាម៉ោង៨ និង២០នាទីព្រឹកថ្ងៃទី១៣ មិថុនា ២០១៤ ទី១-លោកអ៊ុយ វិចិត្រ ជាអនុប្រធានពន្ធនាគារខេត្តទទួលផែនប្រតិបត្តិ, ទី២-លោកសែស ចន្ថា ជាមន្ត្រីពន្ធនាគារខេត្ត ទី៣-ពីបទប្រមាថដាក់ខ្នោះម្តងហើយម្តងទៀត និងយកទៅដាក់ទ្រុងសារិកាកែវស្រែកដាក់ឡូឡាពេញកន្លែងគុកថ្មី ហើយក្នុងរឿងនេះ លោកទាមទារសំណងជំងឺចិត្តចំនួន៤លានរៀល ព្រមទាំងសូមឱ្យតុលាការផ្តន្ទាទោសទៅតាមផ្លូវច្បាប់ ។
ពាក់ព័ន្ធទៅនឹងបញ្ហានេះ លោក នៅ ធឿង ប្រធានពន្ធនាគារខេត្តប៉ៃលិនបានឱ្យដឹងតាមទូរស័ព្ទកាលពីរសៀលថ្ងៃទី១៩ តុលា នេះថា ខាងលោកអត់បានវាយទៅលើមន្ត្រី ឬអនុរក្សពន្ធនាគារណាម្នាក់ឡើយ ហើយក៏មិនបានជេរប្រមាថដល់ពួកគេទាំងនោះដែរ មានតែពួកគេទេដែលមើលងាយ និងជេរប្រមាថទៅលើរូបលោកវិញនោះ ៕
ចែករំលែកព័តមាននេះ