ខេត្តព្រៃវែង ៖ កាលពីវេលាម៉ោង៧និង៣០នាទីព្រឹកថ្ងៃទី១៩ តុលា ២០១៥ អង្គការតំណក់ទឹកបានរៀបចំពិធីដង្ហែក្បួនយុទ្ធនាការប្រមូលកុមារឲ្យមកចុះឈ្មោះចូលរៀន ដោយមានការចូលរួមពីសំណាក់អាជ្ញាធរស្រុក
ខេត្តព្រៃវែង ៖ កាលពីវេលាម៉ោង៧និង៣០នាទីព្រឹកថ្ងៃទី១៩ តុលា ២០១៥ អង្គការតំណក់ទឹកបានរៀបចំពិធីដង្ហែក្បួនយុទ្ធនាការប្រមូលកុមារឲ្យមកចុះឈ្មោះចូលរៀន ដោយមានការចូលរួមពីសំណាក់អាជ្ញាធរស្រុក ក្រុមប្រឹក្សារឃុំ លោកគ្រូ អ្នកគ្រូ សិស្សានុសិស្សចំនួន១.០៣០នាក់ មកពីសាលាបឋមសិក្សាចំនួន១០ក្នុងស្រុកពាមរក៍ ។
កម្មវិធីនេះរៀបចំនៅក្នុងសាលាបឋមសិក្សា ប៊ុន រ៉ានី ហ៊ុន សែន ឧត្តមសមាគម ស្ថិតនៅភូមិឧត្តម ឃុំព្រែកខ្សាយ ស្រុកពាមរក៍ ហើយបានដង្ហែក្បួនចេញពីសាលាបឋមសិក្សា ប៊ុន រ៉ានី ហ៊ុន សែន ឧត្តមសមាគម តាមរង្វង់មូលផ្សារអ្នកលឿង ផ្លូវជាតិលេខ១ ទំនប់ឆ្ពស់ មកផ្លូវជាតិ រួចទៅកាន់សាលាបឋមសិក្សាពាមរក៍ ព្រមទាំងមានចងបដា និងសម្រែកជ័យឃោស អំពីសិទ្ធិកុមារយ៉ាងកងរំពងផងដែរ ។
ក្នុងឱកាសនេះដែរ លោក ទា អ៊ាង តំណាងអង្គការតំណត់ទឹកកម្មវិធីអ្នកលឿងបានមានប្រសាសន៍ថា យុទ្ធនាការនេះ ដើម្បីចូលរួមលើកកម្ពស់ចំនួននៃការចុះឈ្មោះចូលរៀនថ្មីសម្រាប់កុមារដែលទើបគ្រប់អាយុចូលរៀន និងកុមារនៅតាមសហគមន៍នានា អង្គការតំណក់ទឹកសហការជាមួយការិយល័យអប់រំស្រុកពាមរក៍ ហើយបានរៀបចំធ្វើយុទ្ធនាការជាទ្រង់ទ្រាយធំមួយក្រោមប្រធានបទ «យុទ្ធនាការប្រមូលសិស្សចូលរៀនក្នុងឆ្នាំសិក្សា២០១៥_២០១៦» ។
យុទ្ធនាការនេះមានការចូលរួមពីសិស្សានុសិស្សមកពីសាលាបឋមសិក្សារដ្ឋចំនួន១០សាលា ក្នុងឃុំចំនួន៦នៃស្រុកពាមរក៍ និងសិស្សានុសិស្សក្នុងគម្រោងអង្គការតំណក់ទឹកសរុប១.០៣០នាក់ ។
លោកស្រី ស្រេង ស៊ាង អភិបាលរងស្រុកពាមរក៍ បានមានប្រសាសន៍ថា ក្នុងនាមអាជ្ញាធរ សូមគាំទ្រនិងជំរុញការងារលើកកម្ពស់យុទ្ធនាការចុះឈ្មោះកុមារគ្រប់អាយុនៅក្នុងស្រុកពាមរក៍ឲ្យមកចុះឈ្មោះចូលរៀនឲ្យបានច្រើនគ្រប់ៗគ្នា ។ បន្ទាប់ពីរសំណេះសំណាលរួចមកពិធីដង្ហែក្បួនចេញដំណើរនិងបញ្ចប់នៅវេលាម៉ោង១០ព្រឹក ៕
ចែករំលែកព័តមាននេះ