រាជធានីភ្នំពេញ ៖ ភូមិទួលលៀប មានទីតាំងស្ថិតនៅក្នុងសង្កាត់ស្នោរ ខណ្ឌកំបូល រាជធានីភ្នំពេញ ត្រូវបានកំណត់ជាតំបន់លឿងទុំ បន្ទាប់ពីរកឃើញស្ត្រីអាជីវករអាយុ៣០ឆ្នាំម្នាក់លក់ដូរនៅក្នុងផ្សារទួលលៀប មានវិជ្ជមាន COVID-19…
រាជធានីភ្នំពេញ ៖ ភូមិទួលលៀប មានទីតាំងស្ថិតនៅក្នុងសង្កាត់ស្នោរ ខណ្ឌកំបូល រាជធានីភ្នំពេញ ត្រូវបានកំណត់ជាតំបន់លឿងទុំ បន្ទាប់ពីរកឃើញស្ត្រីអាជីវករអាយុ៣០ឆ្នាំម្នាក់លក់ដូរនៅក្នុងផ្សារទួលលៀប មានវិជ្ជមាន COVID-19 កាលពីវេលារសៀលថ្ងៃទី១២ ខែមេសា ឆ្នាំ២០២១ ប៉ុន្មានថ្ងៃមុនកន្លងទៅនេះ។
តាមប្រភពព័ត៌មានបានឲ្យដឹងថា បន្ទាប់មកភូមិនេះ ត្រូវបានបិទខ្ទប់មួយរយៈពេលដើម្បីអនុវត្តនូវវិធានការស្របតាមសេចក្ដីសម្រេច លេខ៥៤ សសរ ចុះថ្ងៃទី២៦ ខែមេសា ឆ្នាំ២០២១ របស់រាជរដ្ឋាភិបាលកម្ពុជា ស្ដីពីការបិទខ្ទប់ភូមិសាស្ដ្ររាជធានីភ្នំពេញ និងក្រុងតាខ្មៅ នៃខេត្តកណ្ដាល ដើម្បីទប់ស្កាត់ការឆ្លងរាលដាល នៃជំងឺកូវីដ១៩»។
ប្រភពដដែលបានបន្តទៀតថា ប៉ុន្តែរហូតមកដល់ថ្ងៃទី១ ខែឧសភា ឆ្នាំ២០២១ ដោយសារស្ថានភាពបានធូរស្រាលជាងមុននោះ ទើបរដ្ឋបាលរាជធានីភ្នំពេញ បានចេញសេចក្ដីសម្រេច ០៩៩/២១ សសរ កំណត់ភូមិទួលលៀប សង្កាត់ស្នោរ ខណ្ឌកំបូល នេះពី «តំបន់លឿងទុំ» មកជា «តំបន់លឿង» វិញ។
ទោះបីជាមានការធូរស្រាលជាងមុនបន្តិចក្ដី តែអាជ្ញាធរនៅតែក្រើនរម្លឹកសុំឲ្យបងប្អូនប្រជាពលរដ្ឋទាំងអស់ប្រកាន់ខ្ជាប់នូវការប្រុងប្រយ័ត្នជាប់ជានិច្ចមិនត្រូវធ្វេសប្រហែសឡើយ។
ប្រភពខាងលើបានបញ្ជាក់ឲ្យដឹងបន្ថែមទៀតថា ស្របពេលថ្ងៃដែល ភូមិ និងផ្សារទួលលៀបខាងលើ បានធូរស្រាលនៅត្រឹមជា «តំបន់លឿង»នោះ ស្រាប់តែមានភូមិមួយទៀត ស្ថិតនៅជិតគ្នានោះតែម្ដង គឺភូមិពាំងពោធិ៍ ស្ថិតនៅក្នុងសង្កាត់ឪឡោក ខណ្ឌកំបូល រាជធានីភ្នំពេញ ត្រូវបានបិទខ្ទប់ថ្ងៃដំបូង បន្ទាប់ពីបានរកឃើញអ្នករស់នៅទីនោះមានវិជ្ជមាន COVID-19។
ក្រុមគ្រូពេទ្យជំនាញ និងអាជ្ញាធរពាក់ព័ន្ធបានចុះយកសំណាក និងធ្វើចត្តាឡីស័កអ្នកជំងឺខាងលើ ហើយក៏បានធ្វើការស្រាវជ្រាវរកអ្នកពាក់ព័ន្ធជាមួយអ្នកវិជ្ជមានខាងលើ ដើម្បីចាត់វិធានការសុខាភិបាលទប់ស្កាត់ការឆ្លងរាលដាលជំងឺ COVID-19 នេះ។
ទន្ទឹមនឹងនេះដែរ អាជ្ញាធរសម្ដែងការព្រួយបារម្ភ និងណែនាំសុំឲ្យប្រជាពលរដ្ឋទាំងអស់ បើពុំមានការចាំបាច់ទេ សូមកុំចាកចេញពីផ្ទះឲ្យសោះ ហើយអ្នកដែលពាក់ព័ន្ធជាមួយអ្នកជំងឺខាងលើ សូមចូលរួមសហការជាមួយអាជ្ញាធរ និងក្រុមជំនាញសុខាភិបាល ដើម្បីយកសំណាក និងធ្វើចត្តាឡីស័កជាបន្ទាន់ ជាពិសេសត្រូវអនុវត្តវិធានការ «៣កុំ ៣ការពារ» ទាំងអស់គ្នា ដើម្បីភាពសុខសាន្តចៀសផុតពីជំងឺដ៏កាចសាហា.វមួយនេះ៕
ចែករំលែកព័តមាននេះ