រាជធានីភ្នំពេញ ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា មានប្រសាសន៍ក្នុងឱកាសប្រគល់សញ្ញាបត្រជូនដល់និស្សិតសាកលវិទ្យាល័យ វេស្ទើន នាព្រឹកថ្ងៃទី១៩ ខែតុលា ឆ្នាំ២០១៥ នៅវិទ្យាស្ថានជាតិអប់រំ ដែលបានបញ្ចប់ការសិក្សាចំនួន១.៧៦៨នាក់ ឆ្នាំសិក្សា២០១២-២០១៣ និងឆ្នាំសិក្សា២០១៣-២០១៤ ថា សូមក្រុមហ៊ុនលក់ប្រេងសាំងនានានៅកម្ពុជា បើបានជាចុះតម្លៃហើយសូមកុំឡើងវិញ ចុះត្រឹមតម្លៃ១០០រៀលនោះ ។ ប្រយ័ត្នចុះត្រឹម១០០រៀល ស្រាប់តែឡើង៣០០រៀលអត់បានទេណា ។
ចំពោះ ករណីនេះ មានអ្នកផ្តល់ដំណឹងឱ្យខ្ញុំតាមគេហទំព័រចូលមក សូមប្រយ័ត្នចុះ១០០រៀលមុនភ្ជុំឡើង៣០០រៀលក្រោយភ្ជុំណា កុំណា សូមផ្តាំផ្ញើទៅអ្នកលក់សាំងទាំងឡាយអើយ ។ បើមិនបានចុះបន្តទេ សូមអាណិតកុំដំឡើងថ្លៃ ។
សម្តេចតេជោមានប្រសាសន៍ថា មានហេតុផលដែលអាចយោគយល់នៅត្រង់ថា ពេលដែលប្រេងចុះថ្លៃ អ្នកលក់ថាគាត់មិនទាន់ចុះបានទេ ព្រោះគាត់បានទិញយកមកពីមុនមានតម្លៃថ្លៃ ដូច្នេះគាត់ស្តុកទុករក្សាតម្លៃនេះមួយរយៈ ដល់ទិញប្រេងថ្មីមកទើបគាត់ចុះ ។
ប៉ុន្តែរឿងគួរឱ្យអស់សំណើច គឺនៅត្រង់កន្លែងឮសូរថា ប្រេងឡើងថ្លៃនៅទីក្រុងឡុង ញូវយ៉ក…គាត់ដំឡើងថ្លៃភ្លាមនៅភ្នំពេញ ក្នុងពេលដែលគាត់មិនទាន់បាននាំប្រេងដែលឡើងថ្លៃនៅទីក្រុងឡុង ញូវយ៉ក មួយតំណក់មកសោះ ។ ត្រង់ហ្នឹងដែលយល់គ្នាអត់បាន ។
ទាក់ទិន នឹងបញ្ហានេះ សម្តេចតេជោមានប្រសាសន៍ថា សម្តេចនឹងជួបជាមួយអ្នកលក់សាំងដោយផ្ទាល់តែម្តង ហើយឱ្យលោករដ្ឋមន្ត្រីក្រសួងពាណិជ្ជកម្មធ្វើមេគុណឱ្យខ្ញុំ ដើម្បីកំណត់និយាយជាមួយគ្នាអំពីបញ្ហាឡើងថ្លៃ ចុះថ្លៃនេះកុំឱ្យតាមស្រេចតែនឹងរបស់ខ្លួនពេក ។
យោគយល់បាន ពេលដែលក្នុង១បារ៉ែល៥៥ដុល្លារ លុះដល់គេចុះមកនៅ៥០ដុល្លារ ខ្លួនមិនទាន់ចុះបានទេក្នុងប៉ុន្មានថ្ងៃដំបូង ដោយសារតែខ្លួនដឹក៥៥ដុល្លារនោះមកស្តុក ។ នេះយោគយល់បាន ប៉ុន្តែរឿងដែលយោគយល់មិនបាននៅត្រង់ដល់ប្រេងឡើងដល់៦០ដុល្លារ គាត់ដំឡើងនៅភ្នំពេញភ្លាម ក្នុងពេលដែលគាត់អត់ទាន់បាននាំយកមកមួយតំណក់សោះ ស្រាប់តែគាត់ឡើង ដូច្នេះខ្ញុំនឹងត្រូវធ្វើការផ្ទាល់ហៅមេធំៗទៅជួប…។ ប៉ុន្តែក្រុមហ៊ុនស្រុកខ្មែររកស៊ីស្រួលនិយាយគ្នាជាងក្រុមហ៊ុនមកពី ក្រៅប្រទេស គេសួរមេរបស់គេនៅក្រៅប្រទេស ។
ដូច្នេះ ខ្ញុំចង់ឱ្យកម្ពុជាខ្លួនឯងពង្រីកសមត្ថភាពអ្នករកស៊ីឱ្យកាន់តែធំ …។ ប៉ុន្តែអ្នករកស៊ីនេះត្រូវគេគំរាមបង្កើតតុលាការកាត់ទោសក្រោយគេ ឈ្នះទៀត ។ សង្គ្រាមផ្ទៃក្នុងផ្ទុះ ដាច់ខាតត្រូវតែផ្ទះ ព្រោះអ្វី ?
ប៉ុល ពត ឆ្នាំ១៩៧០-៧៥ ថានឹងកាត់ទោសលន់ នល់, សិរីមតៈ, ចេង ហេង, អ៊ិន តាំ, សុស្តែន,ឡុង បូរ៉េត,ហង្ស ធុនហាក់ ៧នាក់ ដល់រួចហើយ ប៉ុល ពត កាត់ទោសមួយប្រទេស ។
ឥឡូវសារនយោបាយរបស់គេ បើគេឈ្នះ គេនឹងបង្កើតតុលការកាត់ទោសអ្នករកស៊ីខុសច្បាប់ ។ ដូច្នេះសំណួរថា តើប្រព័ន្ធតុលាការបច្ចុប្បន្ននឹងត្រូវបោះបង់ចោល ច្បាប់បច្ចុប្បន្ននឹងត្រូវបោះបង់ចោល អ្វីៗចោលទាំងអស់ បង្កើតឡើងនូវតុលាការមួយ នូវច្បាប់ថ្មីមួយ ។ ដើមចោទជានរណា ?
ចុងចោទងាយយល់ទេ អ្នកណាអ្នកមានគឺជាចុងចោទទាំងអស់ ប៉ុន្តែដើមចោទគេនឹងដើរចង្អុលដូចសម័យ ប៉ុល ពត ចង្អុលអ្នកនេះម្ចាស់ដី១០ហិកតា នេះគ្រូបង្រៀន សាស្ត្រាចារ្យ ។ ដូច្នេះហើយ សង្គ្រាមនឹងកើត ហើយកុំថាខ្ញុំគំរាម ។ សំឡេងរិះគន់ថា ចុះចាំបាច់ដល់ឈ្នះ ចុះប្តឹងពីឥឡូវទៅថាអ្នកណាខ្លះ?
រកស៊ីខុសច្បាប់ប្តឹងទៅតុលាការទៅ ម៉េចក៏មិនប្ដឹងទៅ ហើយចាំដល់ខ្លួនឈ្នះបានខ្លួន…បើដូច្នេះ រឿងប៉ុល ពត មកដល់ទៀត ។
សម្តេចតេជោមានប្រសាសន៍ថា ជឿខ្ញុំទៅនឹងកើតសង្គ្រាមសាជាថ្មី មិនមែនបន្លាចទេ នឹងកើតមែន ៕
ចែករំលែកព័តមាននេះ