រាជធានីភ្នំពេញ ៖ ដើម្បីឲ្យវិនិយោគិនជាតិ និងអន្តរជាតិ ព្រមទាំងសាធារណជនទូទៅចាប់អារម្មណ៍ក្នុងការវិនិយោគលើការបោះផ្សាយលក់ភាគហ៊ុន កំពង់ផែស្វយ័តក្រុងភ្នំពេញបានរៀបចំកម្មវិធីរ៉ូដសូ ស្តីពី «ការបោះផ្សាយលក់មូលបត្រកម្មសិទិ្ធលើកដំបូងជាសាធារណៈ» នាព្រឹកថ្ងៃទី១៩ តុលា នៅសណ្ឋាគារសូហ្វីតែលភ្នំពេញ ភូគីត្រា ដោយមានក្រុមហ៊ុន យាន់តា ស៊ីឃ្យួរឹធី ជាក្រុមហ៊ុនធានាទិញមូលបត្រ បានផ្តល់ការគាំទ្រ និងសហការយ៉ាងសកម្មក្នុងការជួយរៀបចំដំណើរការនៃកម្មវិធីនេះ ។
លោក ហ៊ឺ បាវី ប្រតិភូរាជរដ្ឋាភិបាល ទទួលបន្ទុកអគ្គនាយកកំពង់ផែស្វយ័តភ្នំពេញ បានមានប្រសាសន៍ថា ៖ «ការរៀបចំកម្មវិធីរ៉ូដសូនេះឡើង ដើម្បីផ្តល់ព័ត៌មានជូនដល់វិនិយោគិនសាធារណៈជាតិ និងអន្តរជាតិ ព្រមទាំងសាធារណជនទូទៅ ស្តីពីការបោះផ្សាយលក់មូលបត្រកម្មសិទិ្ធលើកដំបូងជាសាធារណៈរបស់កំពង់ផែស្វយ័តភ្នំពេញ (ក.ស.ភ) ដែលជាវេទិកាជំនួបដំបូងរវាង ក.ស.ភ និងវិនិយោគិនសាធារណៈទាំងទ្បាយក្នុងការស្វែងយល់ពីគ្នាទៅវិញទៅមក មុននឹងធ្វើការសម្រេចចិត្តវិនិយោគលើការធ្វើបរិវិសកម្មមូលបត្រកម្មសិទិ្ធរបស់ខ្លួន» ។
លោកបន្តថា ៖ «បច្ចុប្បន្ននេះ ក.ស.ភ កំពុងធ្វើប្រតិបត្តិការចំណតផែសំខាន់ៗចំនួន៤ ៖ ១-ចំណតផែកុងតឺន័រ LM១៧ ។ ២-ចំណតផែពហុបំណង TS៣ ។ ៣-ចំណតផែអ្នកដំណើរ និងទេសចរណ៍ TS១ និង៤-ចំណតផែទន្លេបិទ UM២ រួមនឹងប្រតិបត្តិការចំណតស្តុកកុងតឺន័រ ICD មួយកន្លែង ។ ក.ស.ភ បាននិងកំពុងធ្វើអាជីវកម្មចម្បងៗ ដូចជា ការលើកដាក់ ផ្ទេរផ្ទុកកុងតឺន័រ និងទំនិញរាយសេវាកម្មស្តុកទំនិញ រៀបនិងរើទំនិញចេញចូលកុងតឺន័រ និងដឹកជញ្ជូនកុងតឺន័រនាំចេញនាំចូលបរិវេណផែ។ បរិមាណកុងតឺន័របានកើនទ្បើងទ្វេដងចាប់ពីចំនួន៦២.២៥៦ TEUs ក្នុងឆ្នាំ២០១០ ដល់ចំនួន១៣៣.៦៦៦ TEUs ក្នុងឆ្នាំ២០១៤ ដែលអត្រាកំណើនគិតជាមធ្យមប្រចាំឆ្នាំមានចំនួន២១,៥% ។ ចំណូលបានកើនទ្បើងទ្វេដងក្នុងចំនួន២១,២០% ។ នៅក្នុងរយៈពេល៥ឆ្នាំចុងក្រោយ គិតចាប់ពីឆ្នាំ២០១០-២០១៤ ដែលមានចំនួនពី៦,១៦លានដុល្លារអាមេរិកក្នុងឆ្នាំ២០១០ ដល់១៣,២៩លានដុល្លារអាមេរិកក្នុងឆ្នាំ២០១៤ ដោយមានអត្រាកំណើនជាមធ្យមប្រចាំឆ្នាំ» ។
លោក រស់ សីលវ៉ា អនុរដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងប្រធានក្រុមការងារចម្រុះដើម្បីអនុវត្តគម្រោងធ្វើ IPO របស់កំពង់ផែស្វយ័តភ្នំពេញ បានមានប្រសាសន៍ថា ៖ «កម្មវិធីរ៉ូដសូក្នុងថ្ងៃនេះ គឺជាវេទិកាដ៏សំខាន់មួយក្នុងដំណើរការ IPO របស់ ក.ស.ភ ក្នុងគោលបំណងសំខាន់ដើម្បីធ្វើបទបង្ហាញជូនវិនិយោគិនសាធារណៈទាំងអស់ដែលមានវត្តមាននៅទីនេះ អំពីព័ត៌មានអាជីវកម្មរបស់កំពង់ផែស្វយ័តភ្នំពេញ រួមមាន ប្រតិបត្តិការអាជីវកម្មស្នូល ស្ថានភាពហិរញ្ញវត្ថុ និងគម្រោងអាជីវកម្មនាពេលអនាគត ជាពិសេសសក្តានុពល និងការធ្វើ IPO របស់ខ្លួន» ។
លោកបន្តទៀតថា ៖ «ការបោះផ្សាយលក់មូលបត្រកម្មសិទ្ធិជាសាធារណៈ (IPO) របស់ ក.ស.ភ គឺជាព្រឹត្តិការណ៍ដ៏សំខាន់មួយដែលគូសបញ្ជាក់ពីការផ្លាស់ប្តូរទាំងក្នុងវិស័យហិរញ្ញវត្ថុ ក៏ដូចជាវិស័យដឹកជញ្ជូន និងឡូជីស្ទីក ។ ខ្ញុំសង្ឃឹមថា ការចូលទីផ្សារមូលបត្ររបស់ ក.ស.ភ នឹងរួមវិភាគទានដល់កំណើនសេដ្ឋកិច្ចជាតិរួម ជាពិសេសការអនុវត្តគោលនយោបាយអភិវឌ្ឍន៍ឧស្សាហកម្មឆ្នាំ២០១៥-២០១៥ របស់រាជរដ្ឋាភិបាល» ។
លោក រស់ សីលវ៉ា បន្តថា ៖ «គិតមកត្រឹមថ្ងៃនេះ មានរយៈពេលមួយឆ្នាំកន្លះប៉ុណ្ណោះ ដែលការធ្វើ IPO របស់ ក.ស.ភ ឈានមកដល់ដំណាក់កាលនៃការធ្វើរ៉ូដសូ និង Bookbuilding នាពេលនេះ ដោយសម្រេចបានការងារប្រមាណ៨០% គ្រោងនឹងបញ្ចប់ដំណើរការទាំងស្រុងតាមផែនការនៅក្នុងខែធ្នូ ឆ្នាំ២០១៥ ដ៏ខ្លីខាងមុខនេះ ។ ការសម្រេចបានលទ្ធផលមកត្រឹមពេលនេះ ចាត់ទុកជាជោគជ័យមួយនៃដំណើរការនៃការធើ្វ IPO របស់ ក.ស.ភ ព្រោះក្នុងការរៀបចំខ្លួនធ្វើ IPO របស់ ក.ស.ភ ជាសហគ្រាសរដ្ឋ យើងត្រូវដោះស្រាយបញ្ហាប្រឈមស្មុគស្មាញជាច្រើនទាំងក្នុងផ្នែកច្បាប់គណនេយ្យ និងអភិបាលកិច្ច ។ លទ្ធផលទាំងអស់នេះឆ្លុះបញ្ចាំងពីការខិតខំប្រឹងប្រែង និងឆន្ទៈមោះមុតរបស់គ្រប់ភាគីពាក់ព័ន្ធ ជាពិសេសថ្នាក់ដឹកនាំរបស់ ក.ស.ភ ក្នុងការនាំយក ក.ស.ភ ឲ្យបោះផ្សាយលក់មូលបត្រជាសាធារណៈ» ។
លោកបន្តថា ៖ «ខ្ញុំមានជំនឿយ៉ាងមុតមាំថា ក.ស.ភ នឹងបន្តដំណើរការនៃការធ្វើ IPO ទៅមុខទៀតដោយរលូន ដើម្បីឈានដល់ការចុះបញ្ជីលក់មូលបត្រជាផ្លូវការនាដំណាច់ឆ្នាំ២០១៥ តាមការគ្រោងទុក ។ ទន្ទឹមនឹងនេះ ក្រុមការងារចម្រុះដើម្បីអនុវត្តគម្រោងធ្វើ IPO របស់ ក.ស.ភ បានត្រៀមខ្លួនរួចជាស្រេចក្នុងការបន្តដោះស្រាយរាល់បញ្ហាប្រឈមនានាដើម្បីសម្រេចបានគោលដៅនេះ ។ យ៉ាងណាក៏ដោយ ការធ្វើ IPO របស់ ក.ស.ភ នឹងមិនទទួលបានជោគជ័យទេ ប្រសិនបើគ្មានការគាំទ្រ និងការចាប់អារម្មណ៍ពីវិនិយោគិនជាតិ និងអន្តរជាតិទាំងអស់ដែលមានវត្តមាននៅទីនេះ» ។
លោក ស៊ូ សុជាតិ អគ្គនាយកគណៈកម្មការមូលបត្រកម្ពុជា បានមានប្រសាសន៍ថា ៖ «ការអភិវឌ្ឍទីផ្សារមូលបត្ររបស់យើងកំពុងបន្តដើរ ថ្វីដ្បិតនៅមានភាពយឺតយ៉ាវបន្តិច ប៉ុន្តែយើងបានឆ្ពោះទៅមុខជានិច្ច ។ ការធ្វើ Bookbuilding ពេលនេះផ្អែកទៅលើផែនទីបង្ហាញផ្លូវដែលហៅថា យុទ្ធសាស្ត្រអភិវឌ្ឍវិស័យហិរញ្ញវត្ថុរបស់រាជរដ្ឋាភិបាលកម្ពុជា ។ កំពង់ផែស្វយ័តភ្នំពេញ ជាសហគ្រាសសាធារណៈទី២ ដែលបានបោះផ្សាយលក់មូលបត្រជាសាធារណៈ ហើយក៏ជាការចាប់ផ្តើមបន្ថែមនូវទម្ងន់លើទីផ្សាររបស់យើងឱ្យកាន់តែមានភាពរឹងមាំបន្ថែមទៀត ។ ថ្ងៃនេះជាការបើកទំព័រថ្មី ហើយទំព័រថ្មីនេះនឹងបង្ហាញពីក្រុមហ៊ុនដែលបានបោះផ្សាយលក់មូលបត្រជាបន្តបន្ទាប់ផងដែរ» ។
បើតាមលោក ហ៊ឺ បាវី អគ្គនាយកកំពង់ផែស្វយ័តភ្នំពេញ មានប្រសាសន៍បញ្ជាក់ថា ៖ «កំពង់ផែស្វយ័តភ្នំពេញនឹងបោះផ្សាយលក់មូលបត្រលើទី១ ក្នុងភាគហ៊ុនជាង៤លានហ៊ុន ហើយលើកទី២ អាចបន្ថែម២លានហ៊ុន ស្មើនឹង១០% នៃភាគហ៊ុនសរុបរបស់កំពង់ផែស្វយ័តភ្នំពេញ ។ តម្លៃលក់ភាគហ៊ុនរបស់កំពង់ផែស្វយ័តភ្នំពេញ ក្នុងមួយហ៊ុនមានតម្លៃចាប់ពី១.០៨ដុល្លារទៅ១.៥៥ដុល្លារ ក្នុងនោះទាំងអស់គ្នាបានដាក់ពាក្យទិញ និងដេញថ្លៃនៅចុងក្រោយនេះ អុីចឹងអ្នកណាដែលហ៊ានដាក់ថ្លៃខ្ពស់ នឹងបានទៅអ្នកនោះ» ។
បើតាមទិន្នន័យពីកំពង់ផែស្វយ័តក្រុងភ្នំពេញបង្ហាញថា ទំនិញដែលឆ្លងកាត់កំពង់ផែនេះក្នុងរយៈពេល៧ខែដំបូងក្នុងឆ្នាំ២០១៥នេះ មានចំនួន៧៩.៨៨៤TEUs កើនឡើង៨ ភាគរយ បើធៀបនឹងរយៈពេលដូចគ្នាកាលពីឆ្នាំ២០១៤ ដែលមាន៧៣.៧៤៦TEUs។ ការសម្រេចឡើងផ្សារហ៊ុននាពេលនេះ គឺដើម្បី បង្កើនមូលនិធិសម្រាប់ពង្រីកការអភិវឌ្ឍដំណាក់កាលទី២របស់ខ្លួននៅចំណតផែថ្មីស្ថិតស្រុក កៀនស្វាយ ខេត្តកណ្តាល ដោយបានចាប់ផ្ដើមដំណើរការដំណាក់កាលពី១ ក្នុងឆ្នាំ២០១៣ ដែលចំណាយទឹកប្រាក់អស់ជាង២៨លានដុល្លារ ជាការផ្ដល់ ហិរញ្ញប្បទានដោយរដ្ឋាភិបាលចិន ៕
ចែករំលែកព័តមាននេះ