ខេត្តបន្ទាយមានជ័យ ៖ ភាគីថៃបានបញ្ជូនសពពលករកម្ពុជាមកឲ្យសាច់ញាតិតាមច្រកទ្វារអន្តរជាតិប៉ោយប៉ែត កាលពីវេលាម៉ោង៨យប់ ថ្ងៃទី១៩ តុលា ២០១៥ បន្ទាប់ពីស្លាប់ដោយចាក់គ្នា និងគ្រោះថ្នាក់ចរាចរណ៌។
ករណីចាក់ស្លាប់បានកើតឡើងកាលពីវេលាម៉ោង៩ និង៣០នាទីយប់ ថ្ងៃទី១៨ តុលា ២០១៥ នៅក្រុងបាងកក។
ជនរងគ្រោះជាកម្មករលក់បាយម្ហូបនៅហាងមួយ។ ជនរងគ្រោះឈ្មោះហ៊ាន រ៉េត ភេទប្រុស អាយុ៣៦ឆ្នាំ មានទីលំនៅភូមិទួលជ្រៃ ឃុំអំពិលក្រៅ ស្រុកស៊ីធរកណ្តាល ខេត្តព្រៃវែង។ ដោយឡែកករណីគ្រោះថ្នាក់ចរាចណ៌បានកើតឡើង កាលពីវេលាម៉ោង៣រសៀល ថ្ងៃទី១៨ តុលា ដូចជនរងគ្រោះខាងលើដែរ តែនៅខេត្តឆាក់ឆឺនសៅ។
ជនរងគ្រោះឈ្មោះសន ម៉ៃ ភេទប្រុស អាយុ២៧ឆ្នាំ មានទីលំនៅភូមិអង្គរខ្មៅ ឃុំកុយម៉ែង ស្រុកមង្គលបូរី ។ មន្ត្រីទំនាក់ទំនងព្រំដែនកម្ពុជា-ថៃប្រាប់តាមទូរស័ព្ទថា យោងតាមការសួរនាំពីសាច់ញាតិសពទាំង២ជនរងគ្រោះស្លាប់ដោយគេចាក់ គឺដោយសារជម្លោះចាក់ភ្នាល់បាល់ទាត់នៅក្នុងខេត្តកើតហេតុ។ មន្ត្រីដដែលបន្តថា ជនដៃដល់ជាពលករខ្មែរដូចគ្នាពេលនេះត្រូវសមត្ថកិច្ចថៃចាប់ខ្លួនបានហើយ។
ចំណែកជនរងគ្រោះស្លាប់ដោយគ្រោះថ្នាក់ចរាចណ៌ត្រូវមន្ត្រីខាងលើប្រាប់ថា ដោយសារជិះម៉ូតូដួលខ្លួនឯង។ ចំពោះករណីគ្រោះថ្នាក់ចរាចរណ៍ខាងលើសមត្ថកិច្ចនៅមាត់ច្រកទ្វារអន្តរជាតិប៉ោយប៉ែតប្រាប់ថាសាច់ញាតិសពនិយាយថា ក្នុងហេតុការណ៍គ្រោះថ្នាក់ចរាចណ៍នេះមានអ្នកស្លាប់រហូតដល់ទៅ៣នាក់ ប៉ុន្តែសព២ទៀតជាប្រុសៗដូចគ្នាត្រូវសាច់ញាតិបូជានៅទឹកដីថៃ។
សពទាំង២ត្រូវសាច់ញាតិជួលរថយន្តដឹកទៅស្រុកកំណើតដើម្បីធ្វើបុណ្យតាមប្រពៃណី៕
ចែករំលែកព័តមាននេះ