ខេត្តកំពង់ធំ ៖ បច្ចុប្បន្ននេះគេសង្កេតឃើញបញ្ហារៀបចំសណ្តាប់ធ្នាប់នៅក្នុងក្រុងស្ទឹងសែនមានការធ្លាក់ចុះយ៉ាងខ្លាំង ចំណែកអាជ្ញាធរក្រុងស្ទឹងសែន និងខេត្តកំពង់ធំ ហាក់ដូចជាគ្មានវិធានការរៀបចំឲ្យមានប្រសិទ្ធភាពទាល់តែសោះ ។
ប្រជាពលរដ្ឋនិយាយរិះគន់បែបនេះដោយសារតែពួកលោកសង្កេតឃើញថា កន្លងមកឃើញតែកម្លាំងចម្រុះ មានលោកចៅសង្កាត់កំពង់ធំ ប៉ូលិសប៉ុស្តិ៍ និងសន្តិសុខផ្សារកំពង់ធំរៀបចំតែខាងក្រោយផ្សារកំពង់ធំតែប៉ុណ្ណោះ ចំណែកនៅម្តុំផ្ទះថ្មខាងក្រោយផ្សារផ្នែកខាងជើង និងខាងត្បូងផ្សារវិញហាក់ដូចជាមិនអើពើសោះ ។ ដោយសារតែមានការធូរលុងពីអាជ្ញាធរក្រុងស្ទឹងសែនបែបនេះហើយ ទើបធ្វើឲ្យម្ចាស់ផ្ទះថ្មមួយចំនួនបានតសំយ៉ាបដំបូលមកដល់ចិញ្ចើមថ្នល់ផ្ទុកអីវ៉ាន់ពេញ ខ្លះធ្វើទ្វារដែកទាញបិតលើដីចំណីផ្លូវថ្នល់សម្រាប់អ្នកថ្មើរជើងធ្វើដំណើរទៀតផង ដែលច្រើនជំនាន់មកហើយមិនដែលមានអ្នកធ្វើយ៉ាងដូច្នេះទេ រីឯនៅចំណុចក្បែរព្រហ្មបាយ័ន្ត ដែលជាកន្លែងសម្រាប់ឲ្យអ្នករត់ម៉ូតូឌុបចតហៅម៉ូយនោះ ត្រូវបានគេឲ្យអ្នកផ្សេងដាក់លក់ទំនិញយ៉ាងអនាធិបតេយ្យ រួចដើរប្រមូលលុយក្នុង១កន្លែង២ម៉ឺនរៀលក្នុង១ថ្ងៃ ធ្វើឲ្យអ្នកម៉ូតូឌុបចតគ្មានសណ្តាប់ធ្នាប់ បូករួមនិងម៉ូតូប្រជាពលរដ្ឋ និងអាជីវករ ធ្វើឲ្យផ្លូវដ៏ធំទូលាយមួយនេះត្រូវកកស្ទះស្ទើរតែរាល់ថ្ងៃ ។
ជាពិសេសទៅទៀតនោះគឺនៅមុខសណ្ឋាគារ ភោជនីយដ្ឋាន និងផ្ទះសំណាក់ អរុណរះ ដែលកំពុងតែយកដីចំណីផ្លូវ និងទ្រូងផ្លូវសារធារណៈធ្វើអាជីវកម្មសម្រាប់ចតរថយន្តតូច-ធំទាំងយប់ទាំងថ្ងៃ ប៉ុន្តែបែរជាអាជ្ញាធរក្រុង និងខេត្តមើលមិនឃើញពីបញ្ហានេះទៅវិញ ឬមួយក៏បានទទួលនូវលាភសក្ការៈពីកន្លែងនេះ?
ពាក់ព័ន្ធបញ្ហាខាងលើនេះ លោកវរសេនីយ៍ឯក កែវ ហួ ស្នងការរងនគរបាលខេត្តទទួលផែនសណ្តាប់ធ្នាប់ បានប្រាប់«កោះសន្តិភាព»ថា កម្លាំងរបស់លោកចាំតែអនុវត្តតាមទេ ឲ្យតែមានបទបញ្ជាពីលោកអភិបាលក្រុង និងលោកអភិបាលខេត្ត បើពុំមានបទបញ្ជាទេ លោកក៏មិនហានធ្វើដែរ ។
លោក ហុក រិន អភិបាលក្រុងស្ទឹងសែន មានប្រសាសន៍កាលពីថ្ងៃទី១៩ ខែតុលា ឆ្នាំ ២០១៥ថា រឿងឲ្យអ្នកលក់ដូរក្បែរព្រហ្មបាយ័ន្ត កន្លែងម៉ូតូឌុបនោះ លោកមិនបានអនុញ្ញាតនោះទេ លោកនឹងចាត់ការចំពោះបញ្ហានេះ រឿងអ្នកដែលតសំយ៉ាបផ្ទះដល់ចិញ្ចើមថ្នល់ និងថែមទាំងធ្វើទ្វារដែក លោកពុំបានបញ្ជាក់នោះទេ ។ ចំណែកនៅចំណុចមុខ សណ្ឋាគារ ភោជនីយដ្ឋាន និងផ្ទះសំណាក់ អរុណរះ នោះ វាមិនមែនទើបតែមាននៅជំនាន់លោកនោះទេ គឺមានច្រើនជំនាន់មកហើយ បើទោះបីជាច្បាប់ផ្លូវថ្នល់ចេញមកឲ្យអនុវត្តក្តី ក៏យើងមិនអាចធ្វើទាំងបង្ខំបានដែរ លោកសន្យាថានឹងរៀបចំ តែត្រូវធ្វើដោយសន្តិវិធី ។
នៅថ្ងៃទី១៩ តុលាដដែលនេះ «កោះសន្តិភាព» ពុំអាចសុំការបំភ្លឺពីលោក អ៊ុត សំអន អភិបាលខេត្តកំពង់ធំបាននោះទេ ដោយទូរស័ព្ទពុំអាចទំនាក់ទំនងបាន ។
លោក ហួន វណ្ណនិត អភិបាលរងខេត្ត និងជាប្រធានរៀបចំកែលម្អសោភ័ណភាពខេត្ត បានមានប្រសាសន៍ឲ្យដឹងថា ចំពោះភាពអនាធិបតេយ្យនៅខាងក្រោយផ្សាកំពង់ធំ និងអ្នកតសំយ៉ាបផ្ទះ រួចធ្វើទ្វារដែកមកដល់ចិញ្ចើមថ្នល់នេះ លោកបានប្រាប់ទៅអាជ្ញាធរក្រុងរួចហើយ មិនដឹងជាយ៉ាងម៉េចបានជាគ្មានចំណាត់ការ រីឯនៅមុខ សណ្ឋាគារ ភោជនីយដ្ឋាន និងផ្ទះសំណាក់ អរុណរះ លោកបានប្រជុំឲ្យខាងសណ្តាប់ធ្នាប់ខេត្តយកថ្នាំទៅបាញ់កំណត់ឲ្យរថយន្តចត ក៏គេមិនឃើញធ្វើតាមដែរ លោកនឹងរាយការណ៍ពីបញ្ហានេះទៅលោកអភិបាលខេត្ត ៕
ចែករំលែកព័តមាននេះ