រាជធានីភ្នំពេញ ៖ ជនសង្ស័យម្នាក់ត្រូវប្រជាពលរដ្ឋនាំគ្នាដេញចាប់វាយម្នាក់មួយដៃម្នាក់មួយជើងស្ទើរស្លាប់ ទើបប្រគល់ឱ្យសមត្ថកិច្ចប៉ុស្តិ៍បឹងកេងកងទី១ បន្ទាប់ពីធ្វើសកម្មភាពឆក់កាបូបស្ពាយពីនារីបរទេសម្នាក់ ដែលកំពុងជិះម៉ូតូជាមួយប្ដី បណ្តាលឱ្យដួលរងរបួសធ្ងន់ ដែលហេតុការណ៍នេះ កើតឡើងកាលពីវេលាម៉ោង១២ និង៥០នាទីថ្ងៃទី១៩ តុលា ២០១៥ ស្ថិតនៅចំណុចផ្លូវលេខ២៧៨ ក្នុងសង្កាត់បឹងកេងកងទី១ ខណ្ឌចំការមន រាជធានីភ្នំពេញ ។
ប្រភពបានឱ្យដឹងថា ជនសង្ស័យឈ្មោះសុខ ឈាង ភេទប្រុស អាយុ២៧ឆ្នាំ មុនរបរមិនពិតប្រាកដ មានទីលំនៅក្នុងខណ្ឌសែនសុខ ខណ្ឌសែនសុខ រាជធានីភ្នំពេញ ត្រូវបានឃាត់ខ្លួន ក្រោយពីរូបគេជិះម៉ូតូម៉ាកហុងដា C125 ពណ៌ខ្មៅ ពាក់ស្លាកលេខភ្នំពេញ1FE-536មួយគ្រឿងម្នាក់ឯង ។
មុនពេលកើតហេតុ គេឃើញប្ដី-ប្រពន្ធ២នាក់ជិះម៉ូតូមួយគ្រឿង ម៉ាកឃ្លីក ពណ៌.ស ពាក់ស្លាកលេខកណ្ដោល1H-0524 ធ្វើដំណើរតាមបណ្តោយផ្លូវ២៨៨ក្នុងទិសដៅពីលិចទៅកើត ខណៈមកដល់ចំណុចកើតហេតុ ស្រាប់តែលេចមុខជនសង្ស័យម្នាក់ជិះម៉ូតូមកពីក្រោយ ហើយក៏ធ្វើសកម្មភាពឆក់កាបូបស្ពាយពីនារីរងគ្រោះ តែមិនបានសម្រេច បណ្តោយដួលរងរបួសធ្ងន់ទៅនឹងថ្នល់ ទើបបង្កឱ្យមានការភ្ញាក់ផ្អើលដល់ប្រជាពលរដ្ឋដែលនៅក្បែរនាំគ្នាដេញចាប់វាយអ្នកមួយដៃអ្នកមួយជើងស្ទើររស់ស្ទើស្លាប់ ទើបប្រគល់ឱ្យសមត្ថកិច្ចប៉ុស្តិ៍បឹងកេងកងទី១ ។
ចែករំលែកព័តមាននេះ