រដ្ឋាភិបាលយេម៉ែនប្រកាសកាលពីថ្ងៃទី១៨ តុលា ថា ខ្លួនទទួលយកការចូលរួមក្នុងការចរចាសន្តិភាពជាមួយពួកឧទ្ទាមហ៊ូធី និងបណ្តាអ្នកគាំទ្រអតីតប្រធានាធិបតី លោកអាលី អាប់ដាល់ឡាហ៍ សាឡេហ៍ ដែលរៀបចំធ្វើក្រោមការឧបត្ថម្ភរបស់ អ.ស.ប ។
លោក RADJEH BADI អ្នកនាំពាក្យរដ្ឋាភិបាលយេម៉ែន ថ្លែងប្រាប់រ៉យទ័រថា ការសម្រេចចិត្តត្រូវបានធ្វើសម្រាប់ការចូលរួមចរចា ហើយសារលិខិតមួយច្បាប់ពីរឿងនេះនឹងត្រូវបញ្ជូនឱ្យដល់អគ្គលេខាធិការ អ.ស.ប លោកបាន គីមូន ។
ប្រទេសយេម៉ែនធ្លាក់ក្នុងសង្គ្រាមស៊ីវិលមួយចាប់តាំងពីឆ្នាំទៅមិញមក រវាងពួកជីវពលស៊ីអីុតហ៊ូធី គាំទ្រដោយកងយោធារបស់លោកសាឡេហ៍ និងកងកម្លាំងដែលស្មោះត្រង់នឹងប្រធានាធិបតីលោកអាបដ៍ រ៉ាប៊ូម៉ាន់សួរ ហាឌី គាំទ្រ ដោយក្រុមចម្រុះអារ៉ាប់នាំមុខដោយអារ៉ាប៊ី សាអ៊ូឌីត ។
អគ្គលេខាធិការរង អ.ស.ប លោក JAN ELISSON ថ្លែងកាលពីថ្ងៃទី១៥ តុលា ដោយសង្ឃឹមថា ការចរចាសន្តិភាពអាចចាប់ផ្តើមនាចុងខែតុលានេះ ទោះបីមានការមិនទុកចិត្តគ្នាខ្លាំងរវាងអីុរ៉ង់ ដែលគាំទ្រពួកហ៊ូធី និងអារ៉ាប៊ី សាអ៊ូឌីត ក្តី ។
មនុស្សយ៉ាងតិច៥.៤០០០នាក់ត្រូវស្លាប់ តាំងពីចាប់ផ្តើមសង្គ្រាមនេះពីដំណាច់ខែមីនាមក ជាមួយការវាយប្រហាររបស់ក្រុមចម្រុះអារ៉ាប់នាំមុខដោយអារ៉ាប៊ី សាអ៊ូឌីត ប្រឆាំងពួកបះបោរ ៕
ចែករំលែកព័តមាននេះ