រាជធានីភ្នំពេញ ៖ តាកែវជាខេត្តមួយស្ថិតនៅភាគខាងត្បូងនៃប្រទេស ដែលមានព្រំប្រទល់ជាប់ប្រទេសវៀតណាម ។ សេដ្ឋកិច្ចនៃខេត្តមួយនេះ ភាគច្រើនពឹងផ្អែកលើវិស័យកសិកម្ម និងមានច្រកសេដ្ឋកិច្ចអន្តរជាតិភ្នំដិន ព្រមទាំងច្រករបៀងសំខាន់ៗមួយចំនួនទៀត ។ ក្រៅពីនេះ ក៏មានតំបន់ទេសចរណ៍ធម្មជាតិ វប្បធម៌ និងប្រវត្តិសាស្ត្រផងដែរ ដែលជាប្រភពចំណូលសម្រាប់ទ្រទ្រង់ និងអភិវឌ្ឍន៍នៅក្នុងខេត្ត ។
លោកឡាយ វណ្ណៈ អភិបាលខេត្តតាកែវបានប្រាប់កោះសន្តិភាពថា នៅឆ្នាំ២០១៥នេះខេត្តមានគម្រោងត្រូវអភិវឌ្ឍន៍ច្រើន ដូចជាគម្រោងសាងសង់ផ្លូវ១៦ខ្សែបន្ថែម គម្រោងកែលម្អសួនច្បារ គម្រោងជួសជុលវិមានឯករាជ្យ និងគម្រោងផ្សេងទៀតៗ ហើយគម្រោងទាំងនេះក៏បានដាក់ឲ្យដេញថ្លៃរួចរាល់អស់ដែរ ។
លោកអភិបាលខេត្តបន្ដថា ថ្មីៗនេះខេត្តបានចងសម្ព័ន្ធមេត្រីភាពជាមួយទីក្រុងស៊ាងយ៉ាង ខេត្តហ៊ូប៉ី ប្រទេសចិន ហើយប្រហែលជានៅខែតុលា ឬចុងខែក្រោយនេះ ប្រតិភូរបស់ខេត្តតាកែវនឹងធ្វើដំណើរទៅចុះហត្ថលេខាលើអនុស្សរណៈលើការចងសម្ព័ន្ធមេត្រីភាពជាមួយទីក្រុងស៊ាងយ៉ាង ដោយលោកសង្ឃឹមថា នឹងទាញបានអ្នកវិនិយោគមកពីទីក្រុងស៊ាយ៉ាងច្រើន ព្រោះទីក្រុងស៊ាងយ៉ាងមានលក្ខណៈអភិវឌ្ឍន៍ទៅលើវិស័យកសិកម្មប្រហាក់ប្រហែលខេត្តតាកែវដែរ ។
លោកអភិបាលខេត្តបានមានប្រសាសន៍យ៉ាងដូច្នេះថា ៖ « គោលបំណងរបស់ខេត្តសុំឲ្យអ្នកវិនិយោគចិនមកបណ្តាក់ទុនវិនិយោគលើវិស័យកសិកម្ម ។ យើងចង់បានការវិនិយោគ ផ្នែករោងចក្រផលិតជីធំមួយ ដើម្បីផ្គត់ផ្គង់ដល់ប្រជាពលរដ្ឋនៅក្នុងខេត្ត និងខេត្តផ្សេងៗទៀតលើវិស័យកសិកម្ម ហើយចង់ឲ្យមានការវិនិយោគទៅលើផ្នែកចិញ្ចឹមសត្វ ផ្តល់ការងារជូនប្រជាពលរដ្ឋ និងចង់ឲ្យអ្នកវិនិយោគក្នុងស្រុកដែលមានដើមទុនទទួលបានបទពិសោធន៍ ដើម្បីចូលរួមវិនិយោគបន្ថែមទៅលើវិស័យទាំងនេះ»។
លោកអភិបាលខេត្តបន្ដថា ៖ « សព្វថ្ងៃនេះខេត្តបានទទួលការអនុញ្ញាតពីរាជរដ្ឋាភិបាលឲ្យចងសម្ព័ន្ធមេត្រីភាពជាមួយខេត្តហ៊ូប៉ីរបស់ប្រទេសចិន ហើយយើងកំពុងតែរងចាំការឆ្លើយតបមកវិញថា គួរកំណត់ឲ្យប្រតិភូខេត្តតាកែវត្រូវទៅនៅថ្ងៃណា ដល់ពេលនោះ យើងនឹងបញ្ជូនមន្ត្រីជំនាញៗរបស់ខ្លួនទៅធ្វើបទបង្ហាញពីសក្តានុពលខេត្តដើម្បីទាក់ទាញអ្នកវិនិយោគ។ យើងចង់បានរោងចក្រពីរមកពីខាងខេត្តហ៊ូប៉ី ផលិតគ្រឿងចក្រកសិកម្មច្រើន ចង់ឲ្យមានក្រុមហ៊ុនដំឡើងត្រាក់ទ័ រថយន្ត នៅក្នុងខេត្តតាកែវដើម្បីផ្តល់ការងារជូនពលរដ្ឋយើង ហើយនៅចុងឆ្នាំនេះ នឹងមានក្រុមហ៊ុនខ្លះៗ ប្រសិនបើនៅចុងខែតុលានេះ យើងបានទៅជួបភាគីចិន។ ខ្ញុំជឿថា នឹងមានអ្នកវិនិយោគចិនមក ព្រោះកន្លងមក ខាងប្រតិភូខាងចិនបានមកទស្សនកិច្ចនៅខេត្តតាកែវ ហើយយើងបានធ្វើបទបង្ហាញពីសក្តានុពលមួយចំនួនជូនប្រតិភូចិនបានស្វែងយល់ » ។
ដើម្បីជំរុញការអភិវឌ្ឍខេត្តឲ្យមានការរីកចម្រើន និងទាក់ទាញអ្នកវិនិយោគ លោកអភិបាលខេត្តលើកឡើងថា ទិសដៅនៅពេលខាងមុខ យើងនឹងខិតខំអនុវត្តបន្តនូវយុទ្ធសាស្ត្រចតុកោណរបស់រាជរដ្ឋាភិបាលកម្ពុជា ដោយជំរុញការសាងសង់ហេដ្ឋារចនាសម្ព័ន្ធទាំងនៅក្នុងក្រុងនិងតាមភូមិ ឃុំបន្ថែមទៀត ដើម្បីសម្រួលដល់ការធ្វើដំណើរ និងដឹកជញ្ជូនផលិតផលរបស់ប្រជាពលរដ្ឋពីតំបន់ឆ្ងាយអាចមករកទីផ្សារបានដោយងាយស្រួល ។ លើសពីនេះអាចជាការទាក់ទាញអ្នកវិនិយោគផងដែរឲ្យពួកគាត់ចូលមកបណ្តាក់ទុន តាមរយៈការអភិវឌ្ឍហេដ្ឋារចនាសម្ព័ន្ធនេះ ។ លើសពីនេះ ខេត្តនឹងបន្តអភិវឌ្ឍន៍ទៅលើបណ្តាញអគ្គិសនីនៅតំបន់ដាច់ស្រយាលមួយចំនួនឲ្យមានអគ្គិសនីប្រើប្រាស់គ្រប់គ្នា រួមទាំងអភិវឌ្ឍន៍នូវប្រព័ន្ធធារាសាស្ត្រដើម្បីបម្រើទៅដល់វិស័យកសិកម្មឲ្យបានគ្រប់គ្រាន់ផងដែរ ។
លោកអភិបាលខេត្ត បានគូសបញ្ជាក់ថា ៖ «ខេត្តតាកែវមានតំបន់ទេសចរណ៍វប្បធម៌ជាច្រើនកន្លែង តែយើងមិនទាន់មានលទ្ធភាពអភិវឌ្ឍន៍ឲ្យបានខ្លាំងក្លានៅឡើយ » ។
ដោយឡែកនៅក្នុងវិស័យកាត់ដេរ ខេត្តទទួលបានវិនិយោគិនចូលមកបង្កើតោងចក្រច្រើន គិតមកដល់ពេលនេះមានរោងចក្រនិងសិប្បកម្មតូចធំសរុបចំនួន២៧កន្លែង ដែលផ្តល់ការងារដល់ពលរដ្ឋ ហើយនៅក្នុងឆ្នាំថ្មីខាងមុខនេះ នឹងមានរោងចក្រប្រហែល៥ទៀត គ្រោងនឹងបើកដំណើរដែលអាចផ្តល់ការងារដល់ពលរដ្ឋប្រហែល៦ពាន់នាក់បន្ថែមទៀត ។ ចំណែកវិស័យសាងសង់កំពុងកំរើកឡើង បើទោះជាការសាងសង់នៅក្នុងវិស័យនេះ មិនមានសន្ទុះខ្លាំងក្លាដូចនៅក្រុងភ្នំពេញ តែនេះវាជាសញ្ញារីកចម្រើនមួយរបស់ខេត្តផងដែរ ៕
ចែករំលែកព័តមាននេះ