ខេត្តកណ្ដាល ៖ គិតត្រឹមថ្ងៃទី៣០ ខែមេសា ឆ្នាំ២០២១នេះ ដោយសារតែមានការឆ្លងរាលដាលខ្លាំងដោយសារជំងឺ COVID-19 គួរឲ្យព្រួយបារម្ភនោះ អាជ្ញាធរខេត្តកណ្ដាល បានកំណត់ភូមិចំនួន៥…
ខេត្តកណ្ដាល ៖ គិតត្រឹមថ្ងៃទី៣០ ខែមេសា ឆ្នាំ២០២១នេះ ដោយសារតែមានការឆ្លងរាលដាលខ្លាំងដោយសារជំងឺ COVID-19 គួរឲ្យព្រួយបារម្ភនោះ អាជ្ញាធរខេត្តកណ្ដាល បានកំណត់ភូមិចំនួន៥ និងផ្សារចំនួន១ នៅក្នុងស្រុកអង្គស្នួល ជាតំបន់ក្រហម និងលឿងទុំ ហើយត្រូវបានបិទខ្ទប់មិនឲ្យប្រជាពលរដ្ឋចេញពីផ្ទះ និងអាជីវករបន្តការលក់ដូរឡើយ ដើម្បីទប់ស្កាត់ការឆ្លងរាលដាលកាន់តែខ្លាំង និងប្រយុទ្ធប្រឆាំងជាមួយនឹងជំងឺមួយនេះ។
តាមប្រភពព័ត៌មានបានឲ្យដឹងថា ទីតាំងដែលត្រូវបានកំណត់ជាតំបន់ក្រហម និងលឿងទុំ ព្រោះតែទទួលរងនូវការញាំញីដោយសារតែជំងឹ COVID-19 ហើយត្រូវបានអាជ្ញាធរ សម្រេចបិទខ្ទប់ជាបណ្ដោះអាសន្ននោះរួមមាន ៖ ១-ភូមិស្វាយជ្រុំ ២-ភូមិគម្ពោធស្បូវ ៣-ភូមិត្នោតម្តើម ៤-ភូមិអណ្តូង ៥-ភូមិចក និង៦-ផ្សារបែកចាន ស្ថិតនៅក្នុងឃុំបែកចាន ស្រុកអង្គស្នួល ខេត្តកណ្ដាល។ ហើយនៅក្នុងរយៈពេលប៉ុន្មានថ្ងៃកន្លងមកនេះ ក្រុមការងាររបស់ខេត្តកណ្ដាល និងស្រុកអង្គស្នួល ក៏បានរកឃើញអ្នកវិជ្ជមានជំងឺ COVID-19 ជាច្រើនផងដែរ ជាពិសេសក្រុមកម្មករ កម្មការិនីរោងចក្រ នៅតំបន់ខាងលើនេះតែម្ដង។
ប្រភពដដែលបានបន្តថា ដោយសារតែការឆ្លងរាលដាលយ៉ាងឆាប់រហ័សគួរឲ្យព្រួយបារម្ភបែបនេះ ក្រុមការងាររបស់ខេត្តកណ្ដាល និងស្រុកអង្គស្នួល ក្រោមការដឹកនាំដោយផ្ទាល់ដោយលោកគង់ សោភ័ណ អភិបាលខេត្តកណ្ដាល និងលោកឧត្តមសេនីយ៍ទោ ឈឿន សុចិត្រ ស្នងការនគរបាលខេត្តកណ្ដាល បានចុះធ្វើការយ៉ាងដុតដៃដុតជើងតាមរយៈការចុះពិនិត្យតំបន់ដែលផ្ទុះឡើងនៃជំងឺនេះ ជាពិសេសការចុះយកសំណាក និងធ្វើតេស្តអ្នកដែលពាក់ព័ន្ធដោយផ្ទាល់ និងដោយប្រយោលជាមួយអ្នកជំងឺ ព្រមទាំងរៀបចំទីតាំងចត្តាឡីស័ក ទីតាំងយកសំណាកធ្វើតេស្ត ព្រមទាំងរិះរកវិធីដើម្បីទប់ទល់នឹងវីរុសចង្រៃនេះភ្លាមៗផងដែរ។
ប្រភពខាងលើបានបញ្ជាក់បន្ថែមទៀតថា ដោយឡែកនៅវេលាយប់ទី២៩ ខែមេសា ឆ្នាំ២០២១ លោកឧត្តមសេនីយ៍ទោ ឈឿន សុចិត្រ ស្នងការនគរបាលខេត្តកណ្តាល បានដឹកនាំក្រុមការងារពាក់ព័ន្ធចុះត្រួតពិនិត្យស្ថានការណ៍ និងយករបាំងដែក (បារ៉ាស់) ទៅបិទខ្ទប់ទាំង៥ខាងលើ រួមទាំងផ្សារបែកចានផងដែរ។ ទីតាំងទាំងអស់ខាងលើនោះ គឺជាទីប្រជុំជនដែលមានមនុស្សរស់នៅច្រើន ជាតំបន់រោងចក្រ សហគ្រាស និងមានផ្ទះជួលជាច្រើន ហើយរោងចក្រនៅប្លុកនោះក៏មានកម្មករឆ្លងជំងឺ COVID-19 ជាពិសេសរោងចក្រស្តាម៉ាស្ទ័រ និង ហ្វ្រែង (ខេមបូឌា) ដែលស្ថិតនៅមិនឆ្ងាយពីទីនោះប៉ុន្មាន ដែលមានកម្មករឆ្លងរហូតដល់ទៅ៤០០នាក់ឯណោះ។
ដូច្នេះការកំណត់តំបន់ក្រហម និងលឿងទុំ ព្រមទាំងសម្រេចការបិទខ្ទប់នេះ គឺជាវិធានការសុខាភិបាលដើម្បីកម្ចាត់វីរុសចង្រៃនេះ ហើយដើម្បីទទួលបានជោគជ័យ ត្រូវមានការចូលរួមពីបងប្អូនប្រជាពលរដ្ឋ កម្មករកម្មការិនី និងអាជីវករគ្រប់រូប ដោយអនុវត្តតាមគោលការណ៍ និងវិធានការរបស់រដ្ឋអំណាច ជាពិសេសអនុវត្តតាមវិធានការ «៣កុំ និង៣ការពារ» ទាំងអស់គ្នា៕
ចែករំលែកព័តមាននេះ