ខេត្តកំពង់ឆ្នាំង ៖ រថយន្តកាមរីបាឡែនមួយគ្រឿងជារបស់ភ្ញៀវ បានខ្ទេចអស់មួយចំហៀង ព្រមទាំងបែកកាងខាងមុខនិងបែកកង់ខាងឆ្វេងមុខក្រោយទាំង២ បន្ទាប់ពីកម្មករលាងរថយន្តម្នាក់ឡើងបើកច្រឡំជាន់ហ្គែរថាជាហ្វ្រាំង ស្រាប់តែស្ទុះទៅបុកសសររោងលាងរថយន្តធ្លាក់ចុះមកក្រោម បណ្តាលឱ្យរងការខូចខាតតែម្តង។
ហេតុការណ៍រខាងលើនេះបានកើតឡើងកាលពីវេលាម៉ោង10និង50នាទីព្រឹកថ្ងៃទី30 ខែមេសាឆ្នាំ 2021 នៅកន្លែងលាងរថយន្តមួយកន្លែង ស្ថិតក្នុងភូមិម៉ុងបារាំង សង្កាត់ប្អេរ ក្រុងកំពង់ឆ្នាំង ខេត្តកំពង់ឆ្នាំង។
សមត្ថកិច្ចនគរបាលដែលបានទៅសម្របសម្រួលនៅកន្លែងកើតហេតុបានឲ្យដឹងថា រថយន្តមួយគ្រឿងដែលរងការខូចខាតខាងលើម៉ាកកាមរីបាឡែន ពណ៌ស ពាក់ស្លាកលេខ កំពង់ឆ្នាំង 2A-1894 មានម្ចាស់ឈ្មោះ ទាំ ស៊ឹម អាយុ 29 ឆ្នាំ មានទីលំនៅភូមិអូរតានីស ឃុំជើងគ្រាវ ស្រុករលៀប្អៀ ។
តាមប្រភពដដែលបានបន្តថា មុនពេលកើតហេតុ គេឃើញម្ចាស់បានយករថយន្តមួយគ្រឿងនោះមកលាងនៅកន្លែងលាងរថយន្តខាងលើក្រោយពីលាងស្អាតរួចរាល់ហើយ ក៍មានកម្មករម្នាក់ឈ្មោះ ធីម ដែលចេះបើករថយន្តមិនស្ទាត់ ក៏សុំបើករថយន្តចុះពីលើកន្លែងលាងមកក្រោម ហើយគេបានឃើញរថយន្តមកដល់ក្រោមទៅហើយ ស្រាប់តែគេឃើញរថយន្តស្ទុះទៅមុខឡើងទៅលើកន្លែងលាងវិញ ហើយបុកយ៉ាងពេញទំហឹងជាមួយនឹងសសររោងលាងរថយន្ត ទើបធ្លាក់មកចំហៀងខាងឆ្វេង បណ្ដាលឱ្យបាក់កញ្ចក់មើលក្រោយ ចំណែកកង់ខាងឆ្វេងខាងមុខ និងខាងក្រោយ ផ្ទុះបែកទាំង២ ។ ជាមួយគ្នានេះ ទ្វាររថយន្តទាំង២ ផ្នែកខាងឆ្វេងបានក្រពិតខ្ទេចទាំងអស់ ក្រៅពីនោះ កាងខាងមុខរថយន្តក៏បានបាក់ធ្លាក់ បន្ទាប់ពីបុកទៅនឹងរនាំងសំរាប់អូសរាំងបិទជារបងនៅពេលយប់ ។
ក្រោយពេលកើតហេតុ ម្ចាស់កន្លែងលាងរថយន្តបានសុំធ្វើការសម្របសម្រួលជាមួយនិងម្ចាស់រថយន្តដើម្បីជួសជុលសងការខូចខាត ។
ដោយឡែកអ្នកដែលបានទៅមើលហេតុការណ៍នាំគ្នានិយាយថា «បើខ្លួនមិនចេះបើករថយន្តទេ ម្ដេចក៏ហ៊ានបើករថយន្តរបស់គេដែលមានតម្លៃថ្លៃយ៉ាងនេះ ហើយនេះសំណាងល្អដែលបានរនាំងជួយទប់ជាប់ បើចេញមកខាងក្រៅច្បាស់ជាបុកនិងអ្នកធ្វើដំណើរតាមដងផ្លូវជាពុំខានឡើយ» ៕
ចែករំលែកព័តមាននេះ