រាជធានីភ្នំពេញ ៖ បុរសម្នាក់បើកបរក្នុងស្ថានភាពស្រវឹងមិនប្រយ័ត្នជិះម៉ូតូធ្លាក់ជង្ហុកដួលសន្លប់បង្កការភ្ញាក់ផ្អើលកាលពីវេលាម៉ោង៨និង១៥នាទីយប់ថ្ងៃទី១៨ តុលា តាមបណ្ដោយមហាវិថីម៉ៅសេទុង នៅមុខសណ្ឋាគារអ៊ិនធើរខន ស្ថិតក្នុងសង្កាត់ទួលស្វាយព្រៃ២ ខណ្ឌចំការមន ។
សាក្សីនៅកន្លែងកើតហេតុ បានឱ្យដឹងថា មុនពេលកើតហេតុ គេឃើញបុរសរងគ្រោះជិះម៉ូតូមាកហុងដា ស៊េរីឆ្នាំ២០១០ ពណ៌ខ្មៅ ពាក់ស្លាកលេខភ្នំពេញ1AB-8396 ម្នាក់ឯង មិនស្គាល់អត្តសញ្ញាណ អាយុប្រមាណជា២៥ឆ្នាំ ទិសដៅពីជើងទៅត្បូង ក្នុងស្ថានភាពស្រវឹង លុះមកដល់កន្លែងកើតហេតុបានជិះធ្លាក់ជង្ហុកបណ្តាលឲ្យដួលសន្លប់ ភ្លាមៗត្រូវបានអ្នកលក់ដូរនៅក្បែរនោះជួយលើកមកដាក់នៅលើចិញ្ចើមផ្លូវ ព្រោះខ្លាចរថយន្តបើកមកកិន ។
ក្រោយពេលកើតហេតុ ជិតមួយម៉ោងទើបមានរថយន្តសង្គ្រោះបន្ទាន់មកដឹកបុរសរងគ្រោះយកទៅសង្គ្រោះ រីឯម៉ូតូត្រូវបានសមត្ថកិច្ចយកទៅរក្សាទុកនៅប៉ុស្ដិ៍នគរបាលរដ្ឋបាលទួលស្វាយព្រៃទី២ ដើម្បីរង់ចាំបុរសរងគ្រោះមកយកទៅវិញ ។
ប្រជាពលរដ្ឋរស់នៅម្ដុំកន្លែងកើតហេតុ សំណូមពរចំពោះអាជ្ញាធរនៅក្នុងមូលដ្ឋានជួយមើលផ្លូវដែរមានជង្ហុកធំៗ ពិសេសនៅមហាវិថីម៉ៅសេទុងនេះតែម្តង និងនៅមុខចំណតរថយន្តផ្សារដើមគឃើញជង្ហុកមានយូរមកហើយ តែគ្មានអ្នកណាអើពើសោះឡើយ ៕
ចែករំលែកព័តមាននេះ