ខេត្តបន្ទាយមានជ័យ ៖ បុរស២នាក់បានស្លា.ប់ភ្លាមៗនៅនឹងកន្លែង ក្នុងករណីគ្រោះថ្នាក់ចរាចរណ៍ រវាងរថយន្តម៉ាកស៊ីណា បុ.កជាមួយម៉ូតូមួយគ្រឿង ខណៈពេលជនរងគ្រោះកំពុងបណ្តើរម៉ូតូអស់សាំង ។
ហេតុការណ៍ខាងលើនេះបង្កឲ្យមានការភ្ញាក់ផ្អើលបានកើតឡើងកាលពីវេលាម៉ោង៥និង២០នាទីព្រឹកថ្ងៃទី៣០ ខែមេសា ឆ្នាំ២០២១ នៅលើំណាត់ផ្ឡូវជាតិលេខ៥ ត្រង់ចំណុចខាងលិចស្ថានីយថ្លឹងរថយន្តកូនដំរី ប្រហែល១៥០ម៉ែត្រ,ស្ថិតក្នុងភូមិកូនដំរី សង្កាត់និមិត្ត ក្រុងប៉ោយប៉ែត ខេត្តបន្ទាយមានជ័យ ។
តាមប្រភពពីនគរបាលចរាចរណ៍ក្រុងប៉ោយប៉ែតបានឲ្យដឹងថា ជនរងគ្រោះដែលស្លា.ប់ទាំង២នាក់ខាងលើ ក្នុងនោះម្នាក់ឈ្មោះ អៀង ម៉េងលី ភេទប្រុស អាយុ២៧ឆ្នាំ មុខរបរធ្វើស្រែ ជាអ្នកបណ្តើរម៉ូតូ និងឈ្មោះ អាង ធឿន ភេទប្រុស អាយុ៣៦ឆ្នាំ មុខរបរធ្វើស្រែ អ្នកដើរពីក្រោយជួយរុញម៉ូតូ ។ ជនរងគ្រោះទាំង២នាក់ រស់នៅក្នុងភូមិកូនដំរី សង្កាត់និមិត្ត ក្រុងប៉ោយប៉ែត ខេត្តបន្ទាយមានជ័យ។ ដោយឡែកភាគីខាងរថយន្តមួយគ្រឿងខាងលើម៉ាកស៊ីណា ពណ៏ប្រផេះ ពាក់ផ្លាកលេខ ភ្នំពេញ 2T-2327 អ្នកបើកបរមិនស្គាល់អត្តសញ្ញាណ ។
តាមប្រភពដដែលបានបញ្ជាក់ថា នៅមុនពេលកើតហេតុ ជនរងគ្រោះមានគ្នាចំនួន៣នាក់ បានជិះម៉ូតូ១គ្រឿងម៉ាកហុងដាវ៉េវ ពណ៏ក្រហម ពុំមានផ្លាកលេខ ទៅឆ្លុះកង្កែប លុះពេលនាំគ្នាត្រឡប់មកផ្ទះវិញជិះម៉ូតូមកដល់លើផ្លូវជាតិ ម៉ូតូក៏អស់សាំង ក្នុងនោះមាន១នាក់បានដើរទៅរកទិញសាំង ហើយឲ្យឈ្មោះអើង ម៉េងលី ជាអ្នកបណ្តើរម៉ូតូនិងឈ្មោះអាង ធឿន ជាអ្នកជួយរុញម៉ូតូពីក្រោយ ក្នុងទិសដៅពីកើតទៅលិច ។
តាមប្រភពដដែលបានបន្តទៀតថា ខណៈពេលជនរងគ្រោះបណ្តើរម៉ូតូមកដល់ចំណុចកើតហេតុខាងលើ ស្រាប់តែមានរថយន្តមួយគ្រឿង បើកបរពីលិចទៅកើត ហើយបានរេចង្កូតទៅបុ.កជនរងគ្រោះទាំង២នាក់ កំពុងតែដើរបណ្តើរម៉ូតូ និងរុញពីក្រោយ បណ្តាលឱ្យប៉ើងខ្ទាតធ្លាក់ចេញពីថ្នល់ទាំងមនុស្សនិងម៉ូតូ ស្លា.ប់ទាំង២នាក់តែម្តង។ ដោយឡែកអ្នកបើកបររថយន្ត ក្រោយពីបង្កហេតុរួច បានដោះស្លាកលេខរថយន្តរត់គេចខ្លួនបាត់ ។
ករណីខាងលើនេះសមត្ថកិច្ចដាក់ការសង្ស័យថា អ្នកបើកបររថយន្តងងុយដេក ។
ក្រោយពេលកើតហេតុ ស.ពជនរងគ្រោះទាំង២នាក់ត្រូវបានក្រុមគ្រួសារយកទៅចាត់ចែងធ្វើបុណ្យតាមប្រពៃណី ចំណែកអ្នកបើកបររថយន្ត ត្រូវបានកម្លាំងនគរបាលជំនាញកំពុងធ្វើការស្រាវជ្រាវ ដើម្បីនាំខ្លួនយកមកទទួលខុសត្រូចចំពោះមុខច្បាប់ រីឯវត្ថុតាងម៉ូតូនិងរថយន្ត ត្រូវបានសមត្ថកិច្ចនាំយកមករក្សាទុកនៅអធិការដ្ឋាននគរបាលក្រុងប៉ោយប៉ែត ៕
ចែករំលែកព័តមាននេះ