ខេត្តព្រៃវែង ៖ សាលាបឋមសិក្សា ប៊ុន រ៉ានី ហ៊ុន សែន ឧត្តមសមាគម នៅព្រឹកថ្ងៃទី១៧ តុលា ២០១៥ បើកយុទ្ធនាការផ្សព្វផ្សាយកម្មវិធីថ្នាក់ពន្លឿនការសិក្សានៅបឋមសិក្សា ដោយមានការចូលរួមពីលោកនាយក លោកគ្រូ អ្នកគ្រូ សិស្សានុសិស្សជាច្រើននាក់ មានទាំងអាជ្ញាធរភូមិឃុំ បានចូលរួមផងដែរ ។
លោក សេន វាសនា នាយកសាលាបឋមសិក្សា បានឱ្យដឹងថា ក្រសួងអប់រំ យុវជន និងកីឡា សហការជាមួយអង្គការដើម្បីភាពញញឹមនៃកុមារ(PSE) ក្នុងការបង្កើតថ្នាក់ពន្លឿនការសិក្សានៅបឋមសិក្សាចាប់ពីឆ្នាំសិក្សា២០១៤-២០១៥ តទៅ នៅរាជធានី/ខេត្តចំនួន៥ រួមមាន រាជធានីភ្នំពេញ ខេត្តព្រៃវែង កំពង់ស្ពឺ ព្រះសីហនុ និងខេត្តសៀមរាប ។
លោកបានបញ្ជាក់ថា ការប្រើឧបករណ៍បំពងសំឡេង មាន ម៉ូតូ រថយន្ត ដោយមានបិទផ្ទាំងរូបភាពផ្សព្វផ្សាយ ក្រដាសព័ត៌មានចំនួន២០០សន្លឹក រួមទាំងបដាចំនួន៣ផ្ទាំង ក្នុងគោលបំណង ទី១-ដើម្បីផ្សព្វផ្សាយកម្មវិធីថ្នាក់ពន្លឿនការសិក្សានៅបឋមសិក្សា ដល់អាណាព្យាបាលសិស្ស និងសហគមន៍ឱ្យយល់ដឹង និងឱ្យពួកគាត់ជួយជំរុញ កុមារដែលបោះបង់ការសិក្សា ឬកុមារនៅក្រៅសាលារៀនឱ្យមកចុះឈ្មោះចូលរៀន តាមរយៈកម្មវិធីថ្នាក់ពន្លឿនការសិក្សាចាប់ពីថ្ងៃជូនដំណឹងនេះតទៅ ។
គោលបំណងទី២-ចង់ឱ្យអាណាព្យាបាល និងក្មួយៗជាសិស្សានុសិស្សបានជ្រាបថា កុមារដែលមានអាយុច្រើនក៏អាចមានឱកាសបានសិក្សាទាន់កម្មវិធីដូចសិស្សដទៃទៀតដែរ ព្រោះថ្នាក់ពន្លឿនការសិក្សាអាចជួយកុមារដែលមានអាយុច្រើនឱ្យបានសិក្សាពីរកម្រិតក្នុងរយៈពេល១ឆ្នាំ ឬចប់បឋមសិក្សាត្រឹមតែរយៈពេល៣ឆ្នាំប៉ុណ្ណោះ ។
លោកក៏បានអំពាវនាវ សូមឱ្យមាតាបិតា ដែលមានកូនអាយុច្រើន និងសិស្សដែលបានបោះបង់ការសិក្សា សូមមកចុះឈ្មោះចូលរៀនឡើងវិញ តាមរយៈកម្មវិធីថ្នាក់ពន្លឿនការសិក្សានៅបឋមសិក្សា ១ឆ្នាំសិក្សាបាន២កម្រិត ។
សូមបញ្ជាក់ថា រាជរដ្ឋាភិបាលបានប្តេជ្ញាចិត្តខ្ពស់ក្នុងការលុបបំបាត់អនក្ខរភាពរបស់ប្រជាពលរដ្ឋតាមរយៈការធ្វើយុទ្ធនាការអក្ខរកម្មជាតិឆ្នាំ២០១៥ និងផ្តល់សេវាកម្មអប់រំទាំងក្នុងនិងក្រៅប្រព័ន្ធ ហើយការអប់រំក្នុងប្រព័ន្ធ និងក្រៅប្រពន្ធ មានតួនាទីសំខាន់ចាំបាច់ដូចគ្នា និងបំពេញឱ្យគ្នាទៅវិញទៅមកនៅគ្រប់ទីកន្លែង គ្រប់ស្ថានភាព ទាំងនៅតំបន់ជួបការលំបាក និងតំបន់ដាច់ស្រយាល ដើម្បីផ្តល់សេវាអប់រំតាមគ្រប់រូបភាពដល់កុមារ និងយុវជនក្រៅសាលា ព្រមទាំងប្រជាពលរដ្ឋគ្រប់រូបភាពឱ្យបានចូលរៀនប្រកបដោយសមធម៌ និងគុណភាព ៕
ចែករំលែកព័តមាននេះ