រាជធានីភ្នំពេញ ៖ ជនសង្ស័យម្នាក់ត្រូវបានកម្លាំងនគរបាលប៉ុស្តិ៍ច្បារអំពៅ២ឃាត់ខ្លួនកាលពីវេលាម៉ោង១ និង៣០នាទីរំលងអធ្រាត្រឈានចូលថ្ងៃទី១៨ តុលា ២០១៥ នៅចំណុចផ្ទះជួលតាមបណ្តោយផ្លូវលំ ស្ថិតក្នុងភូមិដើមស្លែង សង្កាត់ច្បារអំពៅ២ ខណ្ឌច្បារអំពៅ រាជធានីភ្នំពេញ ពាក់ព័ន្ធការជួញដូរដោយខុសច្បាប់នូវសារធាតុញៀន ។
សមត្ថកិច្ចបានឱ្យដឹងថា ជនសង្ស័យដែលសមត្ថកិច្ចឃាត់មានឈ្មោះ ចាន់ វាសនា ហៅ ខ្មៅ ភេទ ប្រស អាយុ៣១ឆ្នាំ មុខរបរមិនពិតប្រាកដ ស្នាក់នៅផ្ទះជួលក្នុងភូមិទួលពង្រ សង្កាត់ដង្កោ ខណ្ឌដង្កោ រាជធានីភ្នំពេញ ជនសង្ស័យរូបនេះធ្លាប់ជាប់ពន្ធនាគាររយៈពេល៦ឆ្នាំពីបទប្លន់ទៀតផង ។ ក្រោយពេលឃាត់ខ្លួន សមត្ថកិច្ចដកហូតបានវត្ថុតាងរួមមាន ម្ស៉ៅក្រាមពណ៌សថ្លា១កញ្ចប់តូច, លោហធាតុមួយខ្សែប្រវែង៤តឹក, ទូរស័ព្ទដៃម៉ាកសាំស៊ុង១គ្រឿង, ម៉ូតូម៉ាកហុងដា សេ១២៥ ស៊េរី២០០៩ ឡើងតែម២០១៥ ពណ៌ខ្មៅ១គ្រឿង ពាក់ផ្លាកលេខ កំពត 1E-7124 ។
សមត្ថកិច្ចដដែលបន្តទៀតថា ខណៈកម្លាំងសមត្ថកិច្ចប៉ុស្តិ៍ច្បារអំពៅ២កំពុងជិះម៉ូតូល្បាតក្នុងមូលដ្ឋានរបស់ខ្លួន ស្រាប់តែឃើញជនសង្ស័យជិះម៉ូតូគួរឱ្យសង្ស័យ សមត្ថកិច្ចក៏ឃាត់ខ្លួនឆែកឆេររកឃើញថ្នាំញៀនតែម្តង ។ បច្ចុប្បន្ន ជនសង្ស័យ និងវត្ថុតាង ត្រូវបានបញ្ជូនទៅអធិការដ្ឋាននគរបាលខណ្ឌច្បារអំពៅ ដើម្បីចាត់ការបន្តតាមច្បាប់ ៕
ចែករំលែកព័តមាននេះ