រាជធានីភ្នំពេញ ៖ សមត្ថកិច្ចនគរបាលប៉ុស្តិ៍បឹងទំពុនដឹកនាំដោយលោកអនុសេនីយ៍ឯក ឡូ ភារម្យ នាយប៉ុស្តិ៍រដ្ឋបាលបឹងទំពុនបានឃាត់ខ្លួនជនសង្ស័យម្នាក់ពាក់ព័ន្ធនឹងបទល្មើសគាស់ផ្ទះប្រជាពលរដ្ឋ ។ ការឃាត់ខ្លួនខាងលើនេះធ្វើឡើងកាលពីម៉ោង៣ទៀបភ្លឺថ្ងៃទី១៨ តុលា ២០១៥ ស្ថិតនៅភូមិសន្សំកុសល សង្កាត់បឹងទំពុន ខណ្ឌមានជ័យ ខណៈកម្លាំងមានសមត្ថកិច្ចកំពុងជិះម៉ូតូល្បាតក្នុងមូលដ្ឋានរបស់ខ្លួន ។
លោកអនុសេនីយ៍ឯក ឡូ ភារម្យ បានឱ្យដឹងថា ជនសង្ស័យដែលឃាត់ខ្លួនខាងលើនេះមានឈ្មោះ ឈីម ហ៊ាន អាយុ៣០ឆ្នាំ មុខរបរមិនពិតប្រាកដ ស្នាក់នៅផ្ទះជួលក្នុងសង្កាត់ស្រះចក ខណ្ឌដូនពេញ ។
មុនពេលឈានដល់ការឃាត់ខ្លួនជនសង្ស័យនេះ គឺកម្លាំងសមត្ថកិច្ចប៉ុស្តិ៍បឹងទំពុនបានជិះម៉ូតូល្បាតក្នុងមូលដ្ឋានរបស់ខ្លួនដើម្បីការពារសុវត្ថិភាពប្រជាពលរដ្ឋ ស្របតាមគោលនយោបាយភូមិ-សង្កាត់មានសុវត្ថិភាព ខណៈជិះល្បាតដល់ផ្លូវបេតុងត្រង់កន្លែងកើតខាងលើ ស្រាប់តែឃើញជនសង្ស័យកំពុងធ្វើសកម្មភាពគាស់ផ្ទះប្រជាពលរដ្ឋ កម្លាំងសមត្ថកិច្ចក៏ចាប់ក្របួចយកមកកាន់ស្នាក់ការនគរបាលប៉ុស្តិ៍បឹងទំពុនភ្លាមៗ ដើម្បីបន្តការសាកសួរ ។
នៅចំពោះមុខសមត្ថកិច្ច ជនសង្ស័យបានឆ្លើយសារភាពថា រូបគេពិតជាបានធ្វើសកម្មភាពគាស់ផ្ទះប្រជាពលរដ្ឋ និងបានលួចយកសម្ភារមួយចំនួនផងដែរ ។ យោងតាមចម្លើយសារភាពរបស់ជនសង្ស័យ សមត្ថកិច្ចបានកសាងសំណុំរឿងបញ្ជូនជនសង្ស័យរូបនោះទៅកាន់សាលាដំបូងរាជធានីភ្នំពេញ ដើម្បីផ្តន្ទាទោសតាមច្បាប់ ៕
ចែករំលែកព័តមាននេះ