រាជធានីភ្នំពេញ ៖ សិក្ខាសាលាស្ដីពីការអភិវឌ្ឍអត្តពលិកវ័យក្មេងដែលបានរៀបចំធ្វើឡើងអស់រយៈពេល៣ថ្ងៃ ចាប់តាំងពីថ្ងៃទី១៥ តុលា មកនោះ បានបញ្ចប់ទៅដោយជោគជ័យ ហើយពិធីបិទវគ្គសិក្ខាសាលានេះត្រូវបានគេរៀបចំធ្វើកាលពីថ្ងៃទី១៧ តុលា នៅគណៈកម្មាធិការជាតិអូឡាំពិកកម្ពុជា ។
សិក្ខាសាលានេះមានសិក្ខាកាមចូលរួមចំនួន២៤នាក់មកពីតាមសហព័ន្ធកីឡាជាតិនានា ហើយត្រូវបានគេចាត់ទុកថាមានសារៈសំខាន់បំផុត ។
លោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកម្ពុជា ដែលបានអញ្ជើញចូលរួមជាគណៈអធិបតីក្នុងពិធីបិទសិក្ខាសាលានេះបានមានប្រសាសន៍ថ្លែងនូវការកោតសរសើរយ៉ាងខ្លាំងចំពោះសិក្ខាកាមទាំងអស់ ដែលមានវត្តមានគ្រប់ចំនួនចាប់ពីដើមរហូតដល់ចប់ ។ លោកបានសំណូមពរដល់សិក្ខាកាមទាំងអស់ធ្វើយ៉ាងណាត្រូវតែយកចំណេះដឹងទាំងនេះទៅចែករំលែកដល់គ្រូបង្វឹកឬមន្ត្រីសហព័ន្ធឱ្យបានយល់ដឹងទាំងអស់គ្នា ។ ទន្ទឹមគ្នានេះ លោកបានសម្ដែងការព្រួយបារម្ភផងដែរ សម្រាប់សហព័ន្ធនីមួយៗដែលកន្លងមកមិនសូវចេះធ្វើការរួមគ្នាធ្វើឱ្យដំណើរការនៃការអភិវឌ្ឍវិស័យកីឡាមានការរីកចម្រើនយឺត។ ដូច្នេះក្រោយពីបានឆ្លងកាត់វគ្គសិក្ខាសាលានេះទៅ លោកសំណូមពរដល់សិក្ខាកាមទាំងអស់ត្រូវចេះរៀបចំធ្វើផែនការ ដោយខ្លួនឯង ស្វែងរកកីឡាករល្អៗ និងមានទេពកោសល្យសម្រាប់ត្រៀមប្រកួតកីឡាស៊ីហ្គេម ដែលកម្ពុជាទទួលធ្វើជាម្ចាស់ផ្ទះនៅឆ្នាំ២០២៣ ។
លោកJoreg Techmen ដែលជាគ្រូបង្គោលប្រចាំវគ្គនេះបានថ្លែងនូវការកោតសរសើរយ៉ាងខ្លាំងដល់សិក្ខាកាមទាំងអស់ដែលមានចិត្តក្លាហានហ៊ានសួរ ហ៊ានឆ្លើយ នូវរាល់ចម្ងល់ទាំងឡាយ និងខិតខំត្រងត្រាប់ស្ដាប់ដោយយកចិត្តទុកដាក់បំផុត ។ ដូច្នេះលោកសង្ឃឹមថា ក្រោយពីបញ្ចប់សិក្ខាសាលានេះទៅ សិក្ខាកាមទាំងអស់នឹងទទួលបានចំណេះដឹង និងបទពិសោធន៍ថ្មីបន្ថែមទៀតយកទៅចែករំលែកបន្តដើម្បីភាពជោគជ័យនិងទទួលបានមេដាយនៅក្នុងការប្រកួតកីឡាស៊ីហ្គេមលើកទី៣២ឆ្នាំ២០២៣ខាងមុខ៕
ចែករំលែកព័តមាននេះ