រាជធានីភ្នំពេញ ៖ លោកតាវ័យ៦២ឆ្នាំ នៅផ្ទះដាំអំពៅបានផលហើយយកអំពៅនោះទៅគាបទឹកអំពៅទុកប្រគេនព្រះសង្ឃ លុះម៉ាស៊ីនសម្រាប់គាបទឹកអំពៅមួយគ្រឿងខូច ក៏យកមកជួសជុលរួចរាល់ហើយចាប់ផ្តើមកិនសាកល្បងបណ្តាលឱ្យចូលម្រាមដៃគាបបាក់អស់២ម្រាម កាលពីវេលាម៉ោង៥ល្ងាចថ្ងៃទី១៦ តុលា ២០១៥ ស្ថិតក្នុងភូមិច្រេះ សង្កាត់ភ្នំពេញថ្មី ខណ្ឌសែនសុខ ។
លោកតារងគ្រោះឈ្មោះ ម៉ម សុផា មុខរបរនៅផ្ទះដាំអំពៅ ស្នាក់នៅក្នុងភូមិកើតហេតុខាងលើ មានស្រុកកំណើតក្នុងភូមិតាឃ្លាំង ឃុំតាឃ្លាំង ស្រុកល្វាអែម ខេត្តកណ្ដាល បានរៀបរាប់ថា គាត់ចាស់ហើយធ្វើការធ្ងន់មិនបាននៅផ្ទះពីរនាក់ប្តីប្រពន្ធ ហើយកូនៗទៅធ្វើការអស់ប្រពន្ធរបស់គាត់នៅមើលចៅ ចំណែកគាត់មួយថ្ងៃៗគិតតែពីដាំអំពៅ ពេលទទួលបានផលហើយបានយកមកគៀបយកទឹកទៅប្រគេនព្រះសង្ឃដែលគង់នៅតាមវត្តនៅក្នុងខណ្ឌសែនសុខ ។ កន្លងមក គាត់ធ្លាប់គាបទឹកអំពៅដោយប្រើដៃទេ ប៉ុន្តែគាបហត់ពេកក៏មានគេឲ្យម៉ាស៊ីនគាបមួយគ្រឿង ប៉ុន្តែម៉ាស៊ីននោះខូចទៀត នៅវេលាម៉ោង១១ព្រឹកថ្ងៃទី១៦ តុលា គាត់បានជួសជុលម៉ាស៊ីនគៀបទឹកអំពៅនោះរហូតដល់៥ម៉ោងល្ងាចទើបរួចរាល់គាត់បានយកអំពៅមកគាបសាកល្បងមើលខ្វះការប្រុងប្រយ័ត្ន ហើយម្យ៉ាងទៀតគាត់មិនដែលគាបផង ក៏បួងម្រាមដៃចូលទៅក្នុងម៉ាស៊ីនបណ្តាលឲ្យគាបបាក់មេដៃ ចង្អុលដៃខាងឆ្វេងជាប់ក្នុងម៉ាស៊ីនរយៈពេលមួយម៉ោងទើបសាច់ញាតិ និងក្មួយជួយកាត់ម៉ាស៊ីននោះទាញដៃចេញពីក្នុងម៉ាស៊ីនបាន ។
ក្រោយពេលកើតហេតុ សាច់ញាតិបានដឹកតាមម៉ូតូយកទៅព្យាបាលនៅមន្ទីរពេទ្យព្រះកុសុមៈ ៕
ចែករំលែកព័តមាននេះ